দিন উকলি যোৱাৰ লগে-লগে জুবিন গাৰ্গৰ মৃত্যু সম্পৰ্কে উন্মোচিত হৈছে ন-ন তথ্য। এইবাৰ শ্যামকানু মহন্ত, সিদ্ধাৰ্থ শৰ্মা, শেখৰ গোস্বামীৰ পাছত সন্দেহৰ আৱৰ্তত সোমাই পৰিছে অসম আৰক্ষী সেৱাৰ বিষয়া সন্দীপন গাৰ্গ। বৰ্তমান বকো সম-জিলাৰ উপ-আৰক্ষী আয়ুক্ত হিচাপে কাৰ্যনিৰ্বাহ কৰি আছে সন্দীপনে। উল্লেখ্য যে, জুবিন গাৰ্গৰ সৈতে ছিংগাপুৰলৈ যোৱা দলটোত থকা লোকসকলৰ ভিতৰত সন্দীপন আছিল অন্যতম।
প্ৰাপ্ত তথ্য অনুসৰি জুবিন গাৰ্গৰ সৈতে বিলাসী জাহাজত সাগৰলৈ যোৱা দলটোৰো সদস্য আছিল অসম আৰক্ষীৰ উচ্চপদস্থ বিষয়া সন্দীপন গাৰ্গ। স্মৰ্তব্য যে, ২০২০-২০২১ বৰ্ষৰ অসম লোকসেৱা আয়োগৰ পৰীক্ষাৰ ফলাফলত অসম আৰক্ষী সেৱাত ৬০ সংখ্যক স্থান লাভ কৰা সন্দীপনৰ ঘৰ ডিব্ৰুগড় জিলাৰ নামৰূপত। জানিব পৰা মতে, সন্দীপনৰ পিতৃ বিজু মোহন বৰঠাকুৰ নামৰূপৰ ব্ৰহ্মপুত্ৰ ভেলী ফাৰ্টিলাইজাৰ কৰ্পোৰেশ্যন লিমিটেডত কৰ্মৰত আছিল। সন্দীপনে অৰুণাচল প্ৰদেশস্থিত উত্তৰ-পূব আঞ্চলিক বিজ্ঞান আৰু প্ৰযুক্তি প্ৰতিষ্ঠানৰ পৰা চিভিল ইঞ্জিনিয়াৰিঙৰ শিক্ষা সাং কৰিছিল।
এতিয়া জুবিনৰ অনুৰাগীয়ে প্ৰশ্ন উত্থাপন কৰিছে যে, জুবিন গাৰ্গৰ অতি ঘনিষ্ঠ তথা সম্পৰ্কীয় ভাতৃ সন্দীপন সেই সময়ত যদি য়াটত আছিল তেন্তে জুবিন গাৰ্গক কিয় বচাব পৰা নগ’ল? সেই সময়ত কি কৰি আছিল সন্দীপনে? এজন প্ৰশিক্ষণপ্ৰাপ্ত আৰক্ষী বিষয়া হোৱাৰ পাছতো জুবিনক কিয় পানীৰ পৰা ততালিকে জুবিনক উদ্ধাৰ কৰিব পৰা নগ’ল? এই প্ৰশ্নবোৰৰ উত্তৰ সন্দীপনৰ বিচাৰিছে অসমবাসীয়ে।
