প্ৰসিদ্ধ পপ তাৰকা চেলেনা গোমেজে যোৱা বছৰৰ ডিচেম্বৰ মাহত দীৰ্ঘদিনৰ প্ৰেমিক বেনি ব্লাংকোৰ সৈতে নিজৰ বাগদান সম্পূৰ্ণ কৰিছিল। ন মাহৰ পাছত তেওঁলোকে বিবাহপাশত আৱদ্ধ হ’ল; তেওঁলোকৰ দীৰ্ঘদিনীয়া প্ৰেমে পূৰ্ণতা পালে।
দেওবাৰে (২৮ ছেপ্টেম্বৰ) ইনষ্টাগ্ৰামত চেলেনা গোমেজে বিয়াৰ খবৰ নিশ্চিত কৰে। শিল্পীগৰাকীয়ে একেলগে এই অনুষ্ঠানৰ কেইবাখনো ফটোও প্ৰকাশ কৰে। কেপচনত তেওঁ বিশেষ তাৰিখটো উল্লেখ কৰিছিল – ‘৯-২৭-২৫’। অৰ্থাৎ শনিবাৰে ২৭ ডিচেম্বৰত বিবাহপাশত আবদ্ধ হৈছে তাৰকা দম্পতীহাল।
ফটোসমূহত নৱবিবাহিত দম্পতীয়ে চুম্বনৰত হৈ আলিংগন কৰা দেখা গৈছে। চেলেনাই ইনষ্টাগ্ৰামত ফটোখন পোষ্ট কৰাৰ পিছত বেনি ব্লাংকোৱে মন্তব্য কৰে, ‘মোৰ প্ৰকৃত পত্নী’। বিয়াৰ সাজ-পোছাকত চেলেনা আছিল অনবদ্য। বগা ৰঙৰ গাউন পিন্ধি থকা দেখা গৈছে শিল্পীগৰাকীক। পোছাকত ফুলৰ এম্ব্ৰয়ডাৰী আছিল। আনহাতে, বেনি ব্লাংকোৱেও ৰালফ লৰেনৰ ক’লা টাক্সেডো আৰু ব’ টাই পিন্ধিছিল।
দুয়োকে দেখাত ৰূপকথাৰ নায়ক-নায়িকা যেন লাগিছিল। চেলেনা গোমেজৰ নতুন জীৱনযাত্ৰক অনুৰাগী আৰু সহকৰ্মীসকলে মৰমেৰে উপচাই দিছে। মাত্ৰ তিনি ঘণ্টাৰ ভিতৰতে চেলেনাৰ এই পোষ্টটোৱে লাভ কৰিছে ৭০ লাখৰো অধিক প্ৰতিক্ৰিয়া।
বিয়াখনৰ আয়োজনত আছিল তাৰকাৰ সমাৱেশ। পৰিকল্পনা কৰিছে মিণ্ডী ৱেইছে। এল এনকেণ্টো হোটেলত এৰাতিৰ বাবে অতিথিসকলৰ বাবে কোঠা বুকিং কৰা হৈছিল, য’ত এটা কোঠাৰ ভাড়া ৩৫০০ ডলাৰতকৈও অধিক। এই বিয়াত চেলেনা আৰু বেনীৰ পৰিয়াল, তেওঁলোকৰ ঘনিষ্ঠ দীৰ্ঘদিনীয়া বন্ধু কেইগৰাকীমান আৰু সহকৰ্মীও উপস্থিত থাকে।
উল্লেখ্য যে অনুৰাগীসকলে বহুদিনৰ পৰাই চেলেনা গোমেজৰ ব্যক্তিগত জীৱনক লৈ কৌতুহলী হৈ আহিছে। বিশেষকৈ কানাডাৰ গায়ক জাষ্টিন বিবাৰৰ সৈতে থকা সম্পৰ্কৰ বাবে বহুবাৰ বাতৰিৰ শিৰোনাম দখল কৰিবলৈ সক্ষম হৈছে। কিন্তু, সেই সম্পৰ্কটোও স্থায়ী নহ’ল। ৬ বছৰীয়া সম্পৰ্ক বিচ্ছিন্ন হোৱাৰ পিছত ২০১৮ চনত হেলী বাল্ডউইনৰ সৈতে জাষ্টিনে বাগ্দান কৰে। চেলেনাই এই কথা গম পাই যথেষ্ট আঘাত পাইছিল।
ইয়াৰ পিছত চেলেনাই নিজৰ কামত মনোনিৱেশ কৰে। ২০১৯ চনত সংগীতজ্ঞ বেনি ব্লাংকোৰ সৈতে এটা গীতৰ কাম কৰিছিল কণ্ঠশিল্পীগৰাকীয়ে। তাৰ পিছত কেইবছৰমান পাৰ হৈ গ’ল। ২০২৩ চনৰ ডিচেম্বৰ মাহত তেওঁলোকৰ প্ৰেম ৰাজহুৱা কৰিছিল। বেনিৰ সৈতে ৫ বছৰীয়া সম্পৰ্কৰ পিছত অৱশেষত চেলেনাৰ প্ৰেমে পূৰ্ণতা লাভ কৰিলে।
