দেশৰ কিছুমান প্ৰান্তত এতিয়াও অব্যাহত আছে বাল্য বিবাহ প্ৰথা। অসমত বাল্য বিবাহ প্ৰতিৰোধ কৰাত বিশেষ সফলতা দেখিবলৈ পোৱা গৈছে। শেহতীয়া প্ৰতিবেদন অনুসৰি বিগত তিনি বছৰত অসমত ছোৱালীৰ বাল্যবিবাহৰ হাৰ ৮৪% আৰু ল’ৰাৰ মাজত ৯১% হ্ৰাস পাইছে, যিটো ৰাষ্ট্ৰীয় গড়তকৈ বহু বেছি।
শেহতীয়াকৈ নিউয়ৰ্কত ৰাষ্ট্ৰসংঘৰ সাধাৰণ পৰিষদৰ সময়ত এক অনুষ্ঠানত প্ৰকাশিত “টিপিং পইণ্ট টু জিৰ’: এভিডেন্স টুৱাৰ্ডছ এ চাইল্ড মেৰেজ-ফ্ৰী ইণ্ডিয়া” শীৰ্ষক প্ৰতিবেদনত এই তথ্য প্ৰকাশ পাইছে। এন জি অ’ জাষ্ট ৰাইটছ ফৰ চিলড্ৰেন (জে আৰ চি) আৰু ইয়াৰ অংশীদাৰ ইণ্ডিয়া চাইল্ড প্ৰটেকচনৰ পদক্ষেপ চেণ্টাৰ ফৰ লিগেল একচন এণ্ড বিহেভিয়াৰ চেঞ্জ ফৰ চিলড্ৰেন (চি-লেব)ৰ দ্বাৰা প্ৰস্তুত কৰা এই প্ৰতিবেদনত ২০২২ চনৰ এপ্ৰিলৰ পৰা ২০২৫ চনৰ মাৰ্চলৈকে পাঁচখন ৰাজ্যৰ তথ্য সামৰি লোৱা হৈছে।
উল্লেখ্য যে ৰাষ্ট্ৰীয় পৰ্যায়ত বাল্যবিবাহ ছোৱালীৰ মাজত ৬৯% আৰু ল’ৰাৰ মাজত ৭২% হ্ৰাস পাইছে। সমীক্ষাত অংশগ্ৰহণ কৰা ৰাজ্যসমূহৰ ভিতৰত অসমে ছোৱালীৰ তালিকাত শীৰ্ষস্থান দখল কৰাৰ বিপৰীতে মহাৰাষ্ট্ৰ আৰু বিহাৰত ৭০%কৈ, ৰাজস্থানে ৬৬%, আৰু কৰ্ণাটক ৫৫% হ্ৰাস পাইছে।
জে আৰ চি হৈছে শিশু সুৰক্ষাৰ ক্ষেত্ৰত কৰ্মৰত অন্যতম বৃহৎ নেটৱৰ্ক, য’ত ২৫০ টাতকৈও অধিক বেচৰকাৰী সংস্থা অন্তৰ্ভুক্ত আৰু কেৱল অসমতেই ইয়াৰ আঠটা অংশীদাৰ সংগঠনে ৰাজ্যৰ ৩৫খন জিলাৰ ভিতৰত ৩০খন জিলাত সক্ৰিয়ভাৱে কাম কৰি আছে।
এই শেহতীয়া সমীক্ষাত বাল্যবিবাহ হ্ৰাসত সজাগতা অভিযানক আটাইতকৈ কার্যকৰী কাৰক হিচাপে চিহ্নিত কৰা হৈছে, ৭৬ শতাংশ এফআইআৰ দাখিল আৰু গ্ৰেপ্তাৰ গুৰুত্বপূৰ্ণ কাৰক বুলি উল্লেখ কৰিছে। অৱশ্যে শিশু কল্যাণ সমিতি আৰু হেল্পলাইনৰ বিষয়ে যথাক্ৰমে কেৱল ৩১ শতাংশ আৰু ২২ শতাংশ লোকেহে সজাগ। প্ৰতিবেদনত উল্লেখ কৰা হৈছে যে অসম চৰকাৰে বাল্যবিবাহ প্ৰতিৰোধৰ বাবে কেইবাটাও পদক্ষেপ গ্ৰহণ কৰিছে, বিশেষকৈ শিক্ষাৰ্থী ছোৱালীক আৰ্থিক সাহায্য প্ৰদান কৰি বিবাহ পলম কৰিবলৈ উৎসাহিত কৰা “নিজুত মইনা ২.০” আঁচনি উল্লেখযোগ্য। ইয়াত দেখা গৈছে যে ৯৯ শতাংশ অংশগ্ৰহণকাৰী বাল্যবিবাহ আইন সম্পৰ্কে সজাগ, য’ত টেলিভিছন (৯২ শতাংশ) আৰু এন জি অ’ (৭৬ শতাংশ) তথ্যৰ মুখ্য উৎস। ২০২৪ চনত কেন্দ্ৰীয় চৰকাৰে আৰম্ভ কৰা “শিশু বিবাহ মুক্ত ভাৰত” অভিযানৰ প্ৰভাৱো প্ৰায় সাৰ্বজনীনভাৱে অনুভূত হৈছে (৯৯ শতাংশ), আৰু ৮৮ শতাংশ এন জি অ’ক মূল সুবিধা প্ৰদানকাৰী হিচাপে স্বীকৃত হৈছে, লগতে ৯৫ শতাংশ লোকেই এই প্ৰথাৰ বিৰুদ্ধে প্ৰতিশ্ৰুতি গ্ৰহণ কৰিছে।
প্ৰতিবেদনখনৰ পৰামৰ্শৱলীত বাল্যবিবাহ ৰোধৰ বাবে কঠোৰ আইন প্ৰয়োগ, উন্নত প্ৰতিবেদন ব্যৱস্থা, বাধ্যতামূলক বিবাহ পঞ্জীয়ন, গাঁও পৰ্যায়ত “বাল্য বিবাহ মুক্ত ভাৰত” পৰ্টেলৰ প্ৰচাৰ আৰু ৰাষ্ট্ৰীয় বাল্যবিবাহ বিৰোধী দিৱস ঘোষণা আদি দিশ ফলপ্ৰসূ বুলি উল্লেখ কৰিছে।
