প্ৰথমবাৰৰ বাবে ভাৰত আৰু ভূটানৰ মাজত নিৰ্মাণ হ’ব দুটাকৈ ৰে’লপথ। এই দুয়োখন দেশৰ মাজত বাণিজ্য আৰু বৈদেশিক সম্পৰ্কক অধিক শক্তিশালী কৰিব। মুঠ ৮৯ কিলোমিটাৰ দৈৰ্ঘ্যৰ এই ৰে’লপথসমূহৰ কাম তিনি-চাৰি বছৰৰ ভিতৰত সম্পূৰ্ণ হ’ব বুলি জানিব পৰা গৈছে। ভাৰতৰ বৈদেশিক সচিব বিক্ৰম মিশ্ৰীয়ে জনাই দিয়ে যে পশ্চিমবংগৰ বানাৰহাটৰ পৰা ভূটানৰ সামচেলৈ এটা ৰে’লপথ আৰু অসমৰ কোকৰাঝাৰৰ পৰা ভূটানৰ গেলেফুৰলৈ আনটো ৰে’লপথ নিৰ্মাণৰ কাম আৰম্ভ হ’ব। ৰে’ল মন্ত্ৰালয়ে এই দুটা প্ৰকল্পৰ বাবে প্ৰায় ৪,০৩৩ কোটি টকাৰ ব্যয় অনুমান কৰিছে।
২০২৪ বৰ্ষতে প্ৰধানমন্ত্ৰী নৰেন্দ্ৰ মোদীয়ে ভূটান ভ্ৰমণৰ সময়ত এই ৰে’ল প্ৰকল্পৰ সন্দৰ্ভত এক চুক্তিত স্বাক্ষৰ কৰিছিল, যিখন সোমবাৰে ভূটানৰ বৈদেশিক সচিবে আনুষ্ঠানিকভাৱে প্ৰকাশ কৰিছে। কেন্দ্ৰীয় ৰে’ল মন্ত্ৰী অশ্বিনী বৈষ্ণৱে “ভাৰত ভূটানৰ সৰ্ববৃহৎ বাণিজ্যিক অংশীদাৰ বুলি মত পোষণ কৰি কয় যে, ভূটানৰ প্ৰায় সকলো ৰপ্তানি আৰু আমদানি ভাৰতীয় বন্দৰৰ জৰিয়তে হয়। সেয়েহে ভূটানৰ অৰ্থনীতিৰ দ্ৰুত বিকাশৰ বাবে এই ৰে’ল সংযোগ অতি গুৰুত্বপূৰ্ণ।” এই ৮৯ কিলোমিটাৰ ৰে’লপথে ভূটানক ভাৰতৰ ১,৫০,০০০ কিলোমিটাৰ দীঘল ৰে’ল নেটৱৰ্কৰ সৈতে সংযোগ কৰাৰ বাবে বাণিজ্য সহজ কৰি তুলিব।
উল্লেখ্য যে বানাৰহাট-সামচেলৰ ৰে’ল লাইনত দুটা ষ্টেচন, এখন বৃহৎ উৰণীয়া সেতু, ২৪খন সৰু সেতু আৰু ৩৭টা সুৰংগ পথ নিৰ্মাণ হ’ব, যাৰ ব্যয় প্ৰায় ৫৭৭ কোটি টকা। ইয়াৰো পৰি কোকৰাঝাৰ-গেলেফুৰত ছটা ষ্টেচন, দুখন ওখ দলং, ২৯খন বৃহৎ দলং, ৬৫খন সৰু দলং, এখন উৰণীয়া সেতু আৰু দুটা গুদাম থাকিব। কেন্দ্ৰই চাৰি বছৰৰ ভিতৰত এই কাম সম্পূৰ্ণ কৰাৰ পৰিকল্পনা কৰিছে।
