অখিল গগৈয়ে সামৰিলে অৱস্থান ধৰ্মঘট। জুবিন গাৰ্গৰ ন্যায়ৰ দাবীত চচলত অকলেই ধৰ্মঘটত বহিছিল অখিল গগৈয়ে। জুবিন গাৰ্গে ন্যায় নোপোৱালৈকে অবিৰতভাবে এই প্ৰতিবাদ চলি থাকিব বুলি ঘোষণা কৰিছিল অখিল গগৈয়ে। লগতে জুবিন গাৰ্গে ন্যায় নাপালে তেওঁ বিধায়ক পদ ত্যাগ কৰাৰো অঙ্গীকাৰ কৰিছিল।
বুধবাৰে ৰাইজৰ দলৰ মুখ্য কাৰ্যালয়ৰ পৰা প্ৰকাশিত এক প্ৰেছ বিবৃতিৰ জৰিয়তে দলৰ সভাপতি অখিল গগৈয়ে কয় যে জুবিন গাৰ্গৰ মৃ্ত্যুৰ মূল অভিযুক্ত আত্মসমর্পন অথবা গ্ৰেপ্তাৰৰ প্ৰেক্ষাপটত সাময়িকভাৱে প্ৰতিবাদ স্থগিত ৰখাৰ সিদ্ধান্ত গ্রহণ কৰা হৈছে।
আজি বিয়লি ২ বজাত চচলৰ ধৰ্ণাস্থলীত আয়োজিত এক সংবাদ মেলত ৰাইজৰ দলে কয় যে সাময়িকভাৱে আন্দোলনৰ কাৰ্যসূচী স্থগিত ৰাখিলেও দলটো চৰকাৰ তদন্তত মুঠেও সুখী নহয়।
সংবাদ মেলত ৰাইজৰ দলৰ নেতৃবৰ্গই কয়, মূল অভিযুক্তকেইজনক গ্ৰেপ্তাৰৰ লগে লগে অসমবাসীয়ে সাময়িকভাৱে আংশিক সন্তুষ্টি লাভ কৰিলেও মৃত্যুৰ প্ৰকৃত ৰহস্য উদ্ঘাটন নোহোৱা পর্যন্ত আমি আন্দোলনৰ কাৰ্যসূচী অব্যাহত ৰাখিলেহে বিজেপি চৰকাৰে বাধ্যত পৰি এই ঐতিহাসিক ঘটনাৰ যথোপযুক্ত তদন্ত কৰিব পাৰে। সকলো অভিযুক্তকে গ্ৰেপ্তাৰ আৰু আন তিনিটা মূল দাবী গোচৰৰৰ তদন্ত উচ্চ ন্যায়ালয়ৰ কাৰ্যৰতঃ ন্যায়াধীশৰ তত্বাৱধানত চিবিআইক প্রদান, নৰ্থ ইষ্ট ইণ্ডিয়া ফেষ্টিভেলৰ বিত্তীয় অনিয়মৰ পুংখানুপুংখ তদন্তৰ বাবে ইডিক অর্পন আৰু জুবিন গাৰ্গৰ ন্যায় বিচাৰি আন্দোলন কৰাসকলৰ ওপৰত জাপি দিয়া ৰাষ্ট্ৰদ্ৰোহৰ গোচৰ উঠাই লোৱাৰ দাবীত অসমবাসীৰ আন্দোলন অব্যাহত ৰাখিব লাগিব। সেয়েহে এই আটাইকেইটা বিষয় সমাধানৰ বাবে চৰকাৰৰ বিৰুদ্ধে প্ৰতিবাদৰ কাৰ্যসূচী অব্যাহত থাকিব বুলি দলৰ সভাপতিগৰাকীয়ে আজি স্পষ্ট কৰি দিয়ে।বিবৃতিটোত উল্লেখ কৰে যে জুবিন গাৰ্গৰ পৰিয়ালৰ লগতে সমগ্ৰ অসম পৰিয়ালক ন্যায় প্ৰদান কৰাটো চৰকাৰখনৰ সাংবিধানিক দায়িত্ব। সেয়ে দুজন মূল অভিযুক্তক গ্ৰেপ্তাৰৰ পিছত এতিয়া তদন্ত প্রক্রিয়া ত্বৰান্বিত কৰিবলৈ ল’বলগীয়া প্রতিটো ব্যৱস্থাতে চৰকাৰে স্বচ্ছতা প্ৰদৰ্শন কৰক আৰু অসমবাসীক আস্বস্ত কৰিব পৰাকৈ প্ৰতিটো পদক্ষেপৰে প্ৰতিদিনে ৰাইজক সম্ভেদ দিয়ক। তৎকালীনভাৱে প্রযোজ্য হোৱাকৈ সকলো কাম নিৰপেক্ষভাৱে সমাপন কৰাৰ দিহা কৰক বুলি আজিৰ সংবাদ মেলত দলটোৱে উল্লেখ কৰে। জুবিন গাৰ্গৰ দুয়োখন মৰণোত্তৰ পৰীক্ষাৰ প্ৰতিবেদন ৰাজহুৱা কৰিবলৈও দলটোৱে দাবী জনায়।
