টীম ইণ্ডিয়াই বিদেশত কঠিন যুঁজ দি আহিছে। তাৰ তুলনাত ঘৰুৱা খেলপথাৰত ৱেষ্ট ইণ্ডিজ বহুত সহজ প্ৰতিদ্বন্দ্বী। কেৰিবিয়ান এতিয়া আগৰ দৰে দুৰ্দান্ত দল নহয়, বৰঞ্চ দিশহাৰা সৈনিকৰ দলহে। দ্বিতীয় দিনৰ শেষলৈকে স্পষ্ট হৈ পৰিছিল যে আহমেদাবাদৰ নৰেন্দ্ৰ মোডী ষ্টেডিয়ামত ভাৰতেই জয়লাভ কৰিব।
তৃতীয় দিনটোৰ আধাখিনি সময়ো ভাৰতক জয়ৰ প্ৰয়োজন হোৱা নাছিল। দ্বিতীয় ইনিংছত ১৪৬ ৰান সংগ্ৰহ কৰিয়েই অল আউট হয় ৱেষ্ট ইণ্ডিজ। অধিনায়ক শুভমন গিলৰ বাবে ঘৰুৱা টেষ্টত জয়ৰ ‘ভাল আৰম্ভণি’ ঘটিল। প্ৰথমখন টেষ্টত ভাৰতে এক ইনিংছ আৰু ১৪০ ৰানত জয়লাভ কৰে।
মেচখন আছিল প্ৰায় একপক্ষীয়। য’ত ক্ৰিকেট জগতৰ এসময়ৰ দুৰ্দান্ত ৱেষ্ট ইণ্ডিজ ভাৰতৰ আধিপত্যৰ সন্মুখত অস্বস্তিকৰ অৱস্থাত পৰিছিল। প্ৰথম ইনিংছত ১৬২ ৰান সংগ্ৰহ কৰে। ইয়াৰ প্ৰত্যুত্তৰত ভাৰতৰ প্ৰথম ইনিংছত ৫ উইকেটত ৪৪৮ ৰান। টীম ইণ্ডিয়াই ২৮৬ ৰানত আগবাঢ়ি থাকে। কে এল ৰাহুল আৰু ধ্ৰুৱ জুৰেলৰ পিছত ৰবীন্দ্ৰ জাদেজাইও শতক অৰ্জন কৰে।
তৃতীয় দিনৰ আৰম্ভণিতে ভাৰতীয় অধিনায়ক শুভমন গিলে ইনিংছ ঘোষণা কৰে। ভাৰতৰ বিজয়ত কোনো সন্দেহ নাছিল। প্ৰশ্ন আছিল কিমান সময় লাগিব। প্ৰথম ইনিংছত পেচাৰসকল যদি ভয়ংকৰ হৈ উঠিছিল, তেন্তে দ্বিতীয় ইনিংছত স্পিনাৰসকলে যাদু দেখুৱাইছিল। পিটচখন কেৰিবিয়ানসকলৰ বাবে সম্পূৰ্ণ বুজিব নোৱাৰা আছিল। সেই সুযোগতে জাদেজাই ৪টা উইকেট দখল কৰে।
তৃতীয় দিনা দুপৰীয়াৰ মধ্যাহ্ন ভোজন বিৰতিলৈকে কেৰিবিয়ান দলে ৫ উইকেটত ৬৬ ৰান সংগ্ৰহ কৰে। পিটচৰ অৱস্থা, জাডেজা-কুলদীপৰ ঘূৰ্ণী আৰু ৱেষ্ট ইণ্ডিজৰ বেটছমেনৰ দুৰ্দশাই যেন স্পষ্ট কৰি তুলিছি যে যিকোনো মুহূৰ্ততে আন এটা উইকেট পৰিব পাৰে।
মধ্যাহ্ন ভোজন বিৰতিৰ পিছত কিছু সময় যুঁজ দিছিল আলিক আথাঞ্জে (৩৮) আৰু জাষ্টিন গ্ৰীভছ (২৫)। ৱাশ্বিংটন সুন্দৰে প্ৰথমজনক আউট কৰে। দ্বিতীয়জন ছিৰাজৰ বলত আউট হয়। ইংলেণ্ডৰ পিছত ঘৰুৱা মাটিতো তাৰকা পেচাৰগৰাকীয়ে বিৰাট ফৰ্মত আছিল। তেওঁ মুঠ তিনিটা উইকেট দখল কৰে। শেষৰটো উইকেট দখল কৰে কুলদীপ যাদৱে (২/২৩)।
ঘৰৰ মাটিত ভাৰতৰ অন্তিমখন টেষ্ট শৃংখলাৰ ফলাফল ভাল নাছিল। ২০২৪ চনৰ অক্টোবৰ মাহত নিউজিলেণ্ডে ৰোহিত শৰ্মা-বিৰাট কোহলী বাহিনীক হোৱাইটৱাছ কৰিছিল। তাৰ পিছত আহে হতাশাজনক অষ্ট্ৰেলিয়া ভ্ৰমণ। তাৰ পিছতে ভাৰতীয় ক্ৰিকেটত এক বৃহৎ পৰিৱৰ্তন আহিল। শুভমন গিল অধিনায়ক হয়। ইংলেণ্ডৰ পৰা ছিৰিজত ড্ৰ’ কৰি উভতি আহিছিল ‘নিউ ইণ্ডিয়া’। এইবাৰ ৩৬৮ দিনৰ অন্তত ঘৰুৱা খেলপথাৰত টেষ্টত জয়লাভ কৰিলে ভাৰতে।
সংক্ষিপ্ত স্কোৰঃ
প্ৰথম ইনিংছ
ৱেষ্ট ইণ্ডিজঃ ১৬২ (গ্ৰিভছ ৩২, হোপ ৩২, ছিৰাজ ৪০/৪, বুমৰাহ ৪২/৩)
ভাৰতঃ ৪৪৮/৫ ঘোষণা (জুৰেল ১২৫, জাডেজা ১০৪*, ৰাহুল ১০০, চেজ ৯০/২, জেডেন ৫৩/১)
দ্বিতীয় ইনিংছ
ৱেষ্ট ইণ্ডিজঃ ১৪৬ (আথাঞ্জে ৩৮, জাডেজা ৫৪/৪, ছিৰাজ ৩১/৩)
ভাৰতে এক ইনিংছ আৰু ১৪০ ৰানত জয়লাভ কৰে।
