দেশত চলি থকা নক্সালবিৰোধী অভিযানত পুনৰ এজন জোৱান শ্বহীদ হৈছে। ঝাৰখণ্ডৰ পশ্চিম সিংভূম জিলাত চলি থকা অভিযানৰ সময়ত আই ই ডি বিস্ফোৰণত শ্বহীদ হয় অসমৰ এজন বীৰ জোৱান। শ্বহীদ জোৱানজনৰ নাম মহেন্দ্ৰ লস্কৰ।
নগাঁও জিলাৰ কামপুৰৰ বাসিন্দা মহেন্দ্ৰ লস্কৰ কেন্দ্ৰীয় সংৰক্ষিত আৰক্ষী বাহিনী (CRPF)ৰ ৬০ নং বেটেলিয়নত হেড কনষ্টিবল হিচাপে কৰ্মৰত আছিল। শুকুৰবাৰে সন্ধিয়া জৰাইকেলা আৰক্ষী থানাৰ অন্তৰ্গত সাৰন্দা বনাঞ্চলত চলি থকা নক্সালবিৰোধী অভিযানৰ সময়তে সংঘটিত হয় ভয়ংকৰ আই ই ডি বিস্ফোৰণ।
এই বিস্ফোৰণত মহেন্দ্ৰ লস্কৰ গুৰুতৰভাৱে আহত হয়। তেওঁৰ সৈতে উপস্থিত থকা পৰিদৰ্শক কে.কে. মিশ্ৰ আৰু সহকাৰী উপ-পৰিদৰ্শক ৰামকৃষ্ণ গাগাৰাও আহত হয়। কিন্তু গুৰুতৰ অৱস্থাত ৰৌৰকেলাৰ এপ’ল’ হাস্পতালত চিকিৎসাধীন অৱস্থাত মহেন্দ্ৰ লস্কৰে মৃত্যুক সাৱটি লয়।
শ্বহীদ মহেন্দ্ৰ লস্কৰৰ মৃত্যুৰ খবৰে অসমৰ লগতে সম্পূৰ্ণ চি আৰ পি এফ পৰিয়ালৰ মাজত গভীৰ শোকৰ সঞ্চাৰ ঘটাইছে। চি আৰ পি এফৰ সূত্ৰই প্ৰকাশ কৰিছে যে, “দেশৰ সুৰক্ষাৰ ক্ষেত্ৰত মহেন্দ্ৰ লস্কৰৰ ত্যাগ আৰু বীৰত্ব সদায় জাতিয়ে স্মৰণ কৰিব।”
ইপিনে, বিস্ফোৰণৰ ঘটনাৰ পিছতেই নিৰাপত্তা বাহিনীয়ে নক্সাল বিৰোধী অভিযান তীব্ৰতৰ কৰিছে। পশ্চিম সিংভূমৰ সাৰন্দা বনাঞ্চলত বৃহৎ পৰিসৰত অনুসন্ধান অভিযান চলি থকা জানিব পৰা গৈছে।
