তীব্ৰতৰ হৈ পৰিছে জুবিন গাৰ্গৰ আকস্মিক মৃত্যুৰ ন্যায়ৰ দাবী। শিল্পীগৰাকীৰ আকস্মিক মৃত্যুৰ ন্যায়ৰ দাবীত এতিয়া সামাজিক মাধ্যমত আৰম্ভ হৈছে ডিজিটেল আন্দোলন। হেচটেগ #we_Need_ZubeenGargJustice_within_10days আৰু #JusticeForZubeenGarg লিখি ন্যায়ৰ দাবীত সৰৱ হৈ পৰিছে অসংখ্য অনুৰাগীয়ে ।
উল্লেখ্য যে জুবিন গাৰ্গৰ পত্নী গৰিমা শইকীয়া গাৰ্গে ১০ দিনৰ ভিতৰত জুবিনৰ ন্যায় প্ৰদানৰ দাবী কৰি সামাজিক মাধ্যমত এক প’ষ্ট কৰিছিল। গৰিমাৰ লগতে জুবিন গাৰ্গৰ ভগ্নী ডঃ পামী বৰঠাকুৰেও সামাজিক মাধ্যমত একেই দাবী উত্থাপন কৰে।
গৰিমাৰ এই আহ্বানৰ পাছত সামাজিক মাধ্যমত এক তীব্ৰ প্ৰতিক্ৰিয়াৰ ঢৌ উঠিছে। সকলো শ্ৰেণীৰ মানুহে, বিশেষকৈ যুৱ সমাজে, জুবিন গাৰ্গৰ ন্যায় বিচাৰি সমাজিক মাধ্যমত #we_Need_ZubeenGargJustice_within_10days আৰু #JusticeForZubeenGarg লিখি শিল্পীগৰাকীৰ মৃত্যুৰ ন্যায়ৰ দাবী জনায়।
ইফালে তদন্ত প্ৰক্ৰিয়াটো অগ্ৰগতি দেখিবলৈ পোৱা গৈছে। চিআইডিয়ে আজি গুৱাহাটীস্থিত মুখ্য কাৰ্যালয়ত ছিংগাপুৰৰ “য়ট পাৰ্টি”ত উপস্থিত থকা তিনিজন প্ৰবাসী অসমীয়াক জেৰা কৰিছে। এই তিনিজন হ’ল — পৰীক্ষিত শৰ্মা, সিদ্ধাৰ্থ বৰা আৰু জলংসাত নাৰ্জাৰী। তেওঁলোকেই জুবিন গাৰ্গৰ মৃত্যুৰ দিনা ছিংগাপুৰত অনুষ্ঠিত উক্ত পাৰ্টিত উপস্থিত আছিল বুলি নিশ্চিত কৰা হৈছে।
বিশেষ তদন্তকাৰী দলৰ (SIT) মুৰব্বী তথা চিআইডিৰ বিশেষ ডিজিপি মুন্না প্ৰসাদ গুপ্তাই সংবাদ মাধ্যমৰ আগত কয়, “তদন্ত দ্ৰুতগতিত আগবাঢ়িছে আৰু আইনী প্ৰক্ৰিয়া অনুসৰি সকলো কাম কৰা হৈছে।” গুপ্তাই লগতে কয়, “গোচৰৰ সৈতে জড়িত কেইবাজনো গুৰুত্বপূৰ্ণ ব্যক্তি সোধা-পোছাৰ বাবে হাজিৰ হৈছে। আহা কেইদিনৰ ভিতৰত আৰু কেইজনমান গুৰুত্বপূর্ণ ব্যক্তি উপস্থিত হোৱাৰ সম্ভাৱনা আছে।”
তেওঁ লগতে জানায় যে মৰণোত্তৰ পৰীক্ষাৰ প্ৰতিবেদন ৰাজহুৱা কৰা নহ’ব। গুপ্তাই স্পষ্ট কৰি কয় “মৰণোত্তৰ প্ৰতিবেদন কাইলৈ বিয়লি ৪ বজাত প্ৰকাশ কৰা নহ’ব। এই প্ৰতিবেদন পোনপটীয়াকৈ আদালতৰ সন্মুখত দাখিল কৰা হ’ব।”
সামাজিক মাধ্যমত আৰম্ভ হোৱা এই ডিজিটেল আন্দোলনে এতিয়া এক বৃহৎ গণমতৰ সৃষ্টি কৰিছে ।
