১৯৫৩ চনৰ মাউণ্ট এভাৰেষ্ট অভিযানৰ শেষৰজন জীৱিত সদস্য কাঞ্চা শ্বেৰ্পাৰ ৯২ বছৰ বয়সত নেপালত মৃত্যু হৈছে। তেওঁৰ নাতিয়েক টেনজিং চোগ্যাল শ্বেৰ্পাই জনোৱা মতে কাঠমাণ্ডুৰ নিজ গৃহতে শ্বেৰ্পাৰ মৃত্যু হয়।
টেনজিঙে সংবাদ মাধ্যমক কয়, ‘শেহতীয়াকৈ তেওঁৰ ডিঙিৰ কিছু সমস্যা হৈছিল। নহ’লে তেওঁৰ বয়সৰ ব্যক্তিৰ বাবে কোনো ডাঙৰ স্বাস্থ্যজনিত সমস্যা নাছিল।‘
নেপাল পৰ্বতাৰোহণ সংস্থাৰ সভাপতি ফুৰ গেলজে শ্বেৰ্পাই ফেচবুক পোষ্টযোগে তেওঁক শ্ৰদ্ধাঞ্জলি জনাই তেওঁৰ মৃত্যুক নেপালৰ পৰ্বতাৰোহী সমাজৰ বাবে এক বৃহৎ ক্ষতি বুলি অভিহিত কৰে।
তেওঁ লিখিছে, “পৰ্বতাৰোহণ আৰু পৰ্যটনৰ ক্ষেত্ৰত তেওঁৰ অৱদান অমূল্য আছিল আৰু ই নেপালক বিশ্বৰ সৈতে পৰিচয় কৰাই দিয়াত সহায় কৰিছিল।” তেওঁ লগতে কয়, “এজন প্ৰেৰণাদায়ক ব্যক্তিত্ব, ইতিহাস আৰু গৌৰৱৰ প্ৰতীক”ৰ মৃত্যুত সংস্থাই গভীৰ শোক প্ৰকাশ কৰিছে।
১৯৩২ চনত এভাৰেষ্টৰ দুৱাৰমুখ নামচে বজাৰত আং ফুৰ্বা শ্বেৰ্পা নামেৰে জন্মগ্ৰহণ কৰা কাঞ্চাই কামৰ সন্ধানত ঘৰৰ পৰা পলাই দাৰ্জিলিংলৈ যোৱাৰ পিছতে কৈশোৰৰ শেষৰ ফালে পৰ্বতাৰোহণ যাত্ৰা আৰম্ভ কৰিছিল।
তাত তেওঁ টেনজিং নৰ্গেক লগ পায়, যিয়ে তেওঁক ব্ৰিটিছ নেতৃত্বাধীন দলটোক সমৰ্থন কৰা ১০৩ জন শ্বেৰ্পাৰ ভিতৰত এজন হিচাপে এডমাণ্ড হিলাৰীৰ অভিযানত যোগদান কৰাত সহায় কৰে।
পুত্ৰ শ্বেৰিং শ্বেৰ্পাই কয়, ‘তেওঁৰ জন্মৰ নাম আছিল আং ফুৰ্বা শ্বেৰ্পা, কিন্তু পিতৃ-মাতৃয়ে তেওঁক মৰমেৰে কাঞ্চা বুলি মাতিছিল।
সেই সময়ত ৩৯ বছৰীয়া হিলাৰী আৰু নৰ্গেই ১৯৫৩ চনৰ ২৯ মে’ত ৮,৮৪৮.৮৬ মিটাৰ দৈৰ্ঘ্যৰ এই শিখৰত উপনীত হোৱা প্ৰথমগৰাকী পৰ্বতাৰোহী হিচাপে পৰিগণিত হয়। তেতিয়াৰ পৰাই এভাৰেষ্টত প্ৰায় ১৩ হাজাৰ বাৰ আৰোহণ কৰা হৈছে।
