প্ৰাণৰ শিল্পী জুবিন গাৰ্গৰ হত্যাকাণ্ডৰ ঘটনাৰ উচিত তদন্ত আৰু ন্যায়ৰ দাবীত অসম প্ৰদেশ কংগ্ৰেছ কমিটিয়ে ৰাজপথত মমশিখা লৈ শান্তি সমদল কৰে। এই শান্তি সমদলত আৰক্ষীৰ তৰফৰ পৰা প্ৰচুৰ বাধা আহে।
আৰক্ষীয়ে কংগ্ৰেছ দলৰ কৰ্মীসকলৰ লগতে জুবিনৰ ন্যায়ৰ দাবীত উলিওৱা মমশিখা সমদলত অংশগ্ৰহণ কৰিবলৈ অহা সাধাৰণ ৰাইজক আগভেটি ধৰে। আৰক্ষীৰ বাধা নেওচি কটন মহাবিদ্যালয়ৰ সমুখৰ পৰা নেহৰু পাৰ্কেৰে অসম প্ৰদেশ কংগ্ৰেছ কমিটিৰ সভাপতি গৌৰৱ গগৈ, সাংসদ ৰকিবুল হুছেইন, প্ৰাক্তন সভাপতি ভূপেন বৰা, ৰিপুন বৰা, মহিলা কংগ্ৰেছৰ সভানেত্ৰী মীৰা বৰঠাকুৰে কিছুদূৰ আগুৱাই যায় যদিও আৰক্ষীয়ে পুনৰাই বাধা প্ৰদান কৰে।
এইক্ষেত্ৰত অসম আৰক্ষীৰ ‘খেনোক দেখি ৰন্ধা-বঢ়া, খেনোক দেখি দুৱাৰ মৰা’ নীতি প্ৰত্যক্ষ কৰি আশ্চৰ্য প্ৰকাশ কৰিছে অসম প্ৰদেশ কংগ্ৰেছ কমিটিৰ সভাপতি গৌৰৱ গগৈয়ে।
জুবিনৰ ন্যায়ৰ লগত আপোচ নহ’ব বুলি উল্লেখ কৰি প্ৰদেশ কংগ্ৰেছৰ সভাপতি তথা সাংসদ গৌৰৱ গগৈয়ে কয় যে জুবিন গাৰ্গৰ ন্যায় বিচাৰি উলিওৱা সমদলত আৰক্ষীয়ে এনেদৰে বাধা দিয়াতো আশ্চৰ্যজনক কথা। অসম প্ৰদেশ কংগ্ৰেছৰ আন শীৰ্ষ নেতাসকলেও অসম আৰক্ষীৰ এনে বৈষম্যমূলক কাৰ্যক নিন্দা কৰিছে।
