কৃত্ৰিম বুদ্ধিমত্তাৰ সহায়ত সৃষ্টি কৰা এটা চৰিত্ৰক মন্ত্ৰী হিচাপে নিযুক্তি দিয়া হৈছিল। সেই ‘এ আই’ মানৱীয়েই হেনো গৰ্ভৱতী! আলবেনিয়াৰ প্ৰধানমন্ত্ৰী এডি ৰামাই নিজেই এই কথা ঘোষণা কৰে। তেওঁ কয় যে তেওঁৰ চৰকাৰৰ ‘এ আই’ মানৱী মন্ত্ৰীজনৰ এটা বা যমজ সন্তান নহয়, এবাৰতে ৮৩টা সন্তান হ’ব, যিয়ে মাতৃৰ দৰে চৰকাৰৰ বাবে কাম কৰিব।
শেহতীয়াকৈ আলবেনিয়াই এগৰাকী ‘এআই’ মানৱীক দেশৰ মন্ত্ৰী হিচাপে ঘোষণা কৰি আলোড়ণৰ সৃষ্টি কৰে। সেই সময়ত কোৱা হৈছিল যে দুৰ্নীতি ৰোধৰ বাবে এনে সিদ্ধান্ত লোৱা হৈছে। সেই ‘এ আই’ মানৱীৰ নাম হৈছে ডিয়েলা।
আলবেনিয়াৰ প্ৰধানমন্ত্ৰীয়ে দাবী কৰিছে যে ডিয়েলাৰ ৮৩টা সন্তান হ’ব। তেওঁ কয় যে ডিয়েলাৰ প্ৰতিটো সন্তানে তেওঁৰ ছ’চিয়েলিষ্ট পাৰ্টিৰ প্ৰতিজন জনপ্ৰতিনিধিৰ সহায়ক হিচাপে কাম কৰিব।
আন্তঃৰাষ্ট্ৰীয় মঞ্চত থিয় হৈ এডিয়ে এই কথা ঘোষণা কৰে। তেওঁৰ এই মন্তব্যত প্ৰথমতে সকলোৱে স্তম্ভিত হৈ পৰিছিল। পিছত বুজা গ’ল যে তেওঁ ‘এআই সহায়ক’ৰ কথা কৈছে।
বাৰ্লিনত ‘গ্ল’বেল ডাইলগ’ত ভাষণ দি এডিয়ে কয়, ‘আমি ডিয়েলাৰ সৈতে আজি এটা ডাঙৰ ৰিস্ক লৈছিলো আৰু সেয়া ভালেই হ’ল। এইবাৰ প্ৰথমবাৰৰ বাবে ডিয়েলা ৮৩টা সন্তানৰ সৈতে গৰ্ভৱতী হৈছে। তেওঁৰ সন্তানসকলে সংসদৰ সকলো পৰিঘটনা ৰেকৰ্ড কৰিব, দৈনিক আলোচনাৰ বিষয়ে জনপ্ৰতিনিধিসকলক অৱগত কৰিব। তেওঁলোকে তেওঁলোকৰ অনুপস্থিতিত ঘটা সকলো কথা ক’ব।”
এডিয়ে লগতে কয়, “তেওঁলোকে প্ৰতিজন জনপ্ৰতিনিধিৰ সহায়ক হিচাপে কাম কৰিব। সংসদৰ অধিৱেশনত নিয়মিতভাৱে অংশগ্ৰহণ কৰিব। তেওঁলোক মাতৃৰ দৰে জ্ঞানেৰে ভৰপূৰ হ’ব।”
তেওঁ ২০২৬ চনৰ শেষৰ ফালে ডিয়েলাৰ সন্তানসকলকো নিযুক্তি দিয়া হ’ব বুলিও কয়। তেওঁলোকে কেনেকৈ কাম কৰিব সেই বিষয়েও বুজাই দিয়ে। এডিয়ে কয়, “ধৰক আপুনি কফি খাবলৈ গ’ল। কিবা কাৰণত ঘুৰি আহিবলৈ পাহৰি গ’ল। আপোনাৰ অনুপস্থিতিত কি হৈছিল ডিয়েলাৰ সন্তানবোৰে ক’ব। কাক আক্ৰমণ কৰিব লাগে সেইটোও ক’ব। তাৰ পিছত যেতিয়া আপোনালোকে মোক নিমন্ত্ৰণ কৰিব, তেতিয়া ডিয়েলাৰ ৮৩টা সন্তানকো পৰ্দাত দেখা পাব।”
ডিয়েলাৰ অৰ্থ হৈছে সূৰ্য্য। ছেপ্টেম্বৰ মাহত আলবেনিয়া চৰকাৰে তেওঁক দেশৰ মন্ত্ৰী হিচাপে নিযুক্তি দিয়ে। চৰকাৰী ব্যৱস্থা স্বচ্ছ, কলংকমুক্ত, দুৰ্নীতিমুক্ত কৰি ৰাখিবলৈ তেওঁক মন্ত্ৰী হিচাপে নিযুক্তি দিয়া হৈছিল।
অৱশ্যে জানুৱাৰী মাহতে গোটেই দেশখনকে পুৰণি সাজত ডিয়েলাৰ লগত চিনাকি কৰাই দিয়া হৈছিল। আলবেনিয়াৰ চৰকাৰী পৰ্টেলত নথি-পত্ৰৰে নাগৰিকক সহায় কৰি আছিল। পিছত মন্ত্ৰী হিচাপে ঘোষণা কৰি সকলোকে আচৰিত কৰি দিয়ে। নিবিদাৰ সৈতে জড়িত সকলো সিদ্ধান্ত ডিয়েলাই লয়। এইবাৰ আলবেনিয়াই তেওঁৰ সন্তান হিচাপে ‘এআই শিশু’ সৃষ্টি কৰিবলৈ ওলাইছে।
