দেওবাৰে নৱী মুম্বাইত অনুষ্ঠিত ভাৰত বনাম বাংলাদেশৰ খেলৰ পূৰ্বে ভাৰতৰ উপ-অধিনায়ক স্মৃতি মান্ধনাৰ পৰা এদিনীয়া টুপী লাভ কৰে অসম কন্যা উমা চেত্ৰীয়ে। এই সুযোগ লাভ কৰি আৱেগিক হৈ পৰে উমা।
এইদৰে বোকাখাতৰ উইকেটকীপাৰ বেটাৰগৰাকী আইচিচিৰ বিশ্বকাপৰ খেলত অৱতীৰ্ণ হোৱা অসম তথা উত্তৰ-পূৰ্বাঞ্চলৰ প্ৰথমগৰাকী খেলুৱৈ হিচাপে পৰিগণিত হয়।
ভাৰতৰ হৈ ১৫৭ নং কেপ লাভ কৰা উমাক সতীৰ্থ স্মৃতি মান্ধানা আৰু স্নেহ ৰাণাই সাৱটি ধৰাত আপ্লুত হৈ পৰে খেলুৱৈগৰাকী। স্মৃতিয়ে কয়, ‘ভাৰতত অভিষেক ঘটোৱাটো অতি বিশেষ, আৰু বিশ্বকাপত স্থান লাভ কৰাটো আৰু অধিক বিশেষ।‘
তেওঁ কয়, ‘আমি সকলোৱে তোমাক কঠোৰ পৰিশ্ৰম কৰা দেখিছো। তুমি আটাইতকৈ কঠোৰ পৰিশ্ৰমী খেলুৱৈসকলৰ ভিতৰত এগৰাকী, আৰু আমি সকলোৱে তোমাৰ ফিটনেছ আৰু ক্ৰীড়া শক্তিৰ শলাগ লওঁ – ই আমাক আৰু ভাল কাম কৰিবলৈ প্ৰেৰণা দিয়ে। কঠোৰ পৰিশ্ৰম কৰি যোৱা, আমাক প্ৰেৰণা দি যোৱা, আৰু ভাৰতৰ বাবে মেচ জয়ী হৈ থাকা। তুমি খেলি জয়ী হ’বলৈ আৰু বহু মেচ শাৰী পাতি আছে।”
২০২৪ চনৰ ৭ জুলাইত চেন্নাইত দক্ষিণ আফ্ৰিকাৰ বিৰুদ্ধে দ্বিতীয়খন টি-২০ আন্তঃৰাষ্ট্ৰীয় খেলত উমা চেত্ৰীয়ে আন্তঃৰাষ্ট্ৰীয় পৰ্যায়ত অভিষেক ঘটায়।
২০২৩ চনৰ জুলাই মাহত প্ৰথমবাৰৰ বাবে ৰাষ্ট্ৰীয় দলত স্থান লাভ কৰা উমাই তেতিয়া খেলাৰ সুযোগ পোৱা নাছিল। পিছত বাংলাদেশ ভ্ৰমণ কৰি এছিয়ান গেমছত সোণৰ পদক লাভ কৰা ভাৰতীয় দলৰ অংশ আছিল।
আনহাতে, ঘৰুৱা প্ৰতিযোগিতাত উমাই মহিলা প্ৰিমিয়াৰ লীগত ইউ পি ৱাৰিয়ৰ্জক প্ৰতিনিধিত্ব কৰে।
