প্ৰয়াত শিল্পী জুবিন গাৰ্গৰ শেষৰখন ছবি ‘ৰৈ ৰৈ বিনালে’ই আজি মুক্তি লাভ কৰে। কিন্তু ছবিখন মুক্তিৰ প্ৰথম দিনাই বঙাইগাঁও চহৰৰ এটা ছবিগৃহত যান্ত্ৰিক বিজুতিৰ ফলত পুৱাৰ দৰ্শনী বাতিল হোৱাত একাংশ জনতাৰ মাজত তীব্ৰ ক্ষোভৰ সৃষ্টি হয়।
খবৰ অনুসৰি, বঙাইগাঁৱৰ জলী মেক্সৰ অডি-২ত পুৱা ৭ বজাৰ দৰ্শনীৰ সময়ত যান্ত্ৰিক বিজুতি হয়। যাৰ ফলত কৰ্তৃপক্ষই দৰ্শনীটো বাতিল কৰিবলগীয়া হয়।
এই বিশেষ দৰ্শনীৰ বাবে বৰপেটা, চাপৰ আদি দূৰণিৰ ঠাইৰ পৰা বহু অনুৰাগী আহিছিল। তেওঁলোকে পুৱা ৩ বজাৰ পৰা লাইনত থিয় হৈ ছবিখন চাবলৈ অপেক্ষা কৰিছিল। কিন্তু শেষ মুহূৰ্তত দৰ্শনী বাতিল হোৱাৰ খবৰ পোৱাত তেওঁলোক উত্তেজিত হৈ পৰে আৰু ক্ষোভ প্ৰকাশ কৰে।
ক্ষুব্ধ অনুৰাগীসকলে তেওঁলোকৰ আৱেগ ব্যক্ত কৰি কয় যে, তেওঁলোকক টিকটৰ পইচা ঘূৰাই নালাগে, কিন্তু কিয় এনেকুৱা হ’ল, তাৰ উত্তৰ লাগে। তেওঁলোকৰ এজন অনুৰাগীয়ে কয়, “আমি আজি পুৱা ৩ বজাতে উঠি চিনেমা চাবলৈ আহিছিলো। কিন্তু চাবলৈ নাপালো”। পাছত আৰক্ষীয়ে উপস্থিত হৈ পৰিস্থিতি নিয়ন্ত্ৰণ কৰে।
উল্লেখ্য যে, জুবিন গাৰ্গৰ সপোনৰ ছবি ‘ৰৈ ৰৈ বিনালে’ অসমৰ প্ৰায় সকলো ছবিগৃহতে মুক্তি দিয়া হৈছে। গুৱাহাটীৰ মেট্ৰিক্সত পুৱা ৪.২৫ বজাত ছবিখনৰ প্ৰথম দৰ্শনী প্ৰদৰ্শন কৰা হয়।
বঙাইগাঁৱত যান্ত্ৰিক বিজুতিৰ ঘটনাই ক্ষোভৰ সৃষ্টি কৰিলেও, ছবিখনে সমগ্ৰ অসমতে দৰ্শকৰ অভূতপূৰ্ব সঁহাৰি লাভ কৰিছে। প্ৰতিটো ছবিগৃহতে দৰ্শকৰ ভিৰ পৰিলক্ষিত হৈছে আৰু আগন্তুক কেইবাটাও দিনৰ বাবে বহু ছবিগৃহৰ টিকট প্ৰায় সম্পূৰ্ণ বিক্ৰী হৈ গৈছে।
এই ছবিখনত জুবিন গাৰ্গে মুখ্য চৰিত্ৰত অভিনয় কৰিছে। ছবিখনৰ কাম তেওঁৰ মৃত্যুৰ পূৰ্বেই প্ৰায় সম্পূৰ্ণ হৈছিল। জুবিন গাৰ্গ কায়িকভাৱে আমাৰ মাজত নথকা স্বত্ত্বেও, তেওঁৰ এই অন্তিমখন ছবিয়ে তেওঁৰ অনুৰাগীসকলক পুনৰবাৰ ছবিগৃহলৈ টানি আনিছে।
