গুৱাহাটী নিবাসী অসমৰ লেখক অনিন্দিত দত্ত ২০২৫ চনৰ বাবে আমেৰিকাৰ টিন হাউচ অটম ৰাইটাৰ্চ ৱৰ্কশ্বপলৈ নিৰ্বাচিত হৈছে। এই বছৰ নবেম্বৰ মাহৰ আৰম্ভণীত আয়োজিত এই আন্তঃৰাষ্ট্ৰীয় কৰ্মশালা আৰু সমাৰোহৰ বাবে সমগ্ৰ বিশ্বৰ পৰা মাত্ৰ ত্ৰিশজন নবীন উপন্যাসিকক বাছনি কৰা হৈছে।
টিন হাউচ ৱৰ্কশ্বপক মার্কিন যুক্তৰাষ্ট্ৰৰ সাহিত্য জগতত কেৰিয়াৰৰ আৰম্ভণিতে এক গুৰুত্বপূৰ্ণ সফলতা হিচাপে গণ্য কৰা হয়, কিয়নো এই লেখকসকলক এক অত্যন্ত প্ৰতিযোগিতামূলক বাছনি প্ৰক্ৰিয়াৰ দ্বাৰা নিৰ্বাচিত কৰা হয়।
অনিন্দিত দত্তই শ্বিলঙৰ ইংলিচ এণ্ড ফৰেইণ লেংগুৱেজেছ ইউনিভাৰচিটি (EFLU)ৰ পৰা ইংৰাজীত বি.এ. আৰু হাইদৰাবাদ বিশ্ববিদ্যালয়ৰ পৰা এম.এ. ডিগ্ৰী লাভ কৰিছিল। তেওঁ শেহতীয়াকৈ ২০২৫ চনত ইউনিভাৰচিটি অফ টেক্সাস এট অস্টিনৰ পৰা সৃষ্টিশীল লেখনীৰ পাঠ্যক্ৰমত এশ শতাংশ জলপানিৰে এম.এফ.এ. ডিগ্ৰী অৰ্জন কৰিছে।
অস্টিনত থকা সময়ছোৱাত অনিন্দিতে প্ৰথিতযশা আমেৰিকান ঔপন্যাসিক এলিজাবেথ মেকক্ৰেকেন আৰু দেব অলিন আনফাৰ্থৰ দৰে সাহিত্যিকৰ ওচৰত উপন্যাস আৰু গল্প লিখাৰ শৈলীৰ বিষয়ে অধ্যয়ন কৰে। তদুপৰি, তেওঁ ৰাষ্ট্ৰীয় পৰ্যায়ৰ সাহিত্য আলোচনী ‘বেট চিটি বিভিউ’ৰ সম্পাদকো আছিল। ইয়াৰ পূৰ্বে তেওঁ নিউয়ৰ্ক টাইমছ বেষ্টচেলাৰ ঔপন্যাসিক মেঘা মজুমদাৰৰ পৰাও পাঠ্যক্ৰম গ্ৰহণ কৰিছিল।
বৰ্তমান অনিন্দিত দত্তই ইউনিভাৰচিটি অফ জিঅ’ৰজিয়াত ইংৰাজী বিভাগত ডক্টৰেট কৰি আছে আৰু অসমৰ পটভূমিত এখন উপন্যাসৰ কামত ব্ৰতী আছে।
২০০৩ চনত আৰম্ভ কৰা টিন হাউচ পাব্লিছিঙৰ এই ৰাইটাৰ্চ ৱৰ্কশ্বপ নবীন সাহিত্যিকৰ বাবে এক আগশাৰীৰ সন্মান। অৰেগন ৰাজ্যৰ সুন্দৰ পটলেণ্ড চহৰত আয়োজিত এই কৰ্মশালাত অনিন্দিতে সমালোচকৰ দ্বাৰা বহুল প্ৰশংসিত উপন্যাস “লেকাৰউড”ৰ স্ৰষ্টা লেখিকা মেগান গিডিঙছৰ সৈতে কাম কৰাৰ সুযোগ পাব।
তেওঁ নিজৰ অপ্ৰকাশিত লেখা সাহিত্যিক গিডিঙছৰ ওচৰত জমা দি সেই লেখাৰ উন্নয়নৰ বাবে পৰামৰ্শ ল’বলৈ সক্ষম হ’ব।
ইফালে, তেওঁ বিভিন্ন সাহিত্যিক এজেণ্ট আৰু আন্তঃৰাষ্ট্ৰীয় প্ৰকাশকৰ সৈতে লগ ধৰাৰো সুযোগ লাভ কৰিব।
মেগান গিডিঙছৰ প্ৰথম কিতাপখনক নিউয়ৰ্ক মেগাজিনে ২০২০ চনত প্ৰকাশিত দহখন শ্ৰেষ্ঠ কিতাপৰ এখন বুলি অভিহিত কৰিছিল। আমেৰিকাৰ নেচনেল পাব্লিক ৰেডিঅ’ইও ইয়াক ২০২০ চনৰ শ্ৰেষ্ঠ কিতাপৰ ভিতৰত এখন বুলি আখ্যা দিছিল। তেওঁৰ দ্বিতীয় উপন্যাস “ইফ ৱি মেইন কুড ফ্লাই”খনো একেদৰে সমাদৃত আৰু পুৰস্কৃত হৈছে।
