সচৰাচৰ হোৱাৰ দৰে অষ্ট্ৰেলিয়া এতিয়া আনন্দৰ সাগৰত ওপঙি থকাৰ কথা। পাৰ্থত ৮ উইকেটৰ ডাঙৰ জয়েৰে এছেজৰ আৰম্ভণি কৰে ষ্টিভেন স্মিথ আৰু তেওঁৰ দলটোৱে। এই জয় কেৱল সাধাৰণ নাছিল, তেওঁলোকে মাত্ৰ দুদিনতে আলহী দল ইংলেণ্ডক পৰাস্ত কৰিছিল।
কিন্তু ইমান বিশাল জয়ৰ পিছতো ক্ৰিকেট অষ্ট্ৰেলিয়া (CA)ৰ বাবে ডাঙৰ চিন্তা হৈছে। মাত্র দুদিনৰ ভিতৰতে খেলখন সমাপ্ত হোৱাত এতিয়া দেশৰ ক্ৰিকেট ব’ৰ্ডে বৃহৎ লোকচানৰ সন্মুখীন হ’বলগীয়া হৈছে। এই ধনৰ পৰিমাণ ৩০ লাখ অষ্ট্ৰেলিয়ান ডলাৰতকৈও অধিক, যিটো ভাৰতীয় মুদ্ৰাত ১৭ কোটিৰো অধিক।
বাতৰি মতে, অষ্ট্ৰেলিয়া-ইংলেণ্ড পাৰ্থ টেষ্টৰ তৃতীয় আৰু চতুৰ্থ দিনত কেৱল টিকট বিক্ৰীৰ পৰাই ৩০ লাখ ডলাৰতকৈ অধিক উপাৰ্জন হোৱাৰ সম্ভাৱনা আছিল, যিটো এতিয়া লোকচানৰ একাউণ্টত যোগ হ’ব। শুকুৰবাৰে পাৰ্থ টেষ্টৰ প্ৰথম দিনটোত খেলখন চাবলৈ গেলেৰীত উপস্থিত আছিল ৫১,৫৩১ জন দৰ্শক। শনিবাৰে ৪৯,৯৮৩ জন লোক আহিছিল, যিটো যোৱা বছৰৰ অষ্ট্ৰেলিয়া-ভাৰতৰ মেচতকৈ অধিক। দুদিনত খেলখনত ৯৬,৪৬৩ জন দৰ্শক আছিল।
অষ্ট্ৰেলিয়া আৰু ইংলেণ্ডৰ বাবে এছেজ সদায় এক মৰ্যাদাৰ যুঁজ। দুয়োখন দেশৰ দৰ্শকে খেলপথাৰত বহি খেল চাবলৈ আগ্ৰহী। তদুপৰি দেওবাৰটো ছুটিৰ দিন, গতিকে ভিৰো বেছি। পাঁচদিনীয়া খেলখনৰ বাবে গুৰুত্বপূৰ্ণ সময় হিচাপে বিবেচিত পাৰ্থ টেষ্টত দেওবাৰে খেলখনৰ তৃতীয় দিন আছিল।
মুঠতে ৬০ হাজাৰ আসনৰ পাৰ্থ ষ্টেডিয়ামত তৃতীয় দিনটোৰ বেছিভাগ টিকট বিক্ৰী হৈ গৈছিল। কিন্তু এই দৰ্শকসকলৰ খেলপথাৰলৈ অহাৰ হেপাঁহ কালি খেলপথাৰতে ‘শেষ হৈ থাকিল’। প্ৰথমে ইংলেণ্ডে অতি আক্ৰমণাত্মক বেটিং কৰিবলৈ গৈ দ্বিতীয় ইনিংছত ৩৪.৪ অভাৰত অল আউট হৈছিল। তাৰ পিছত অষ্ট্ৰেলিয়াই ২০৪ ৰানৰ লক্ষ্য অনুসৰণ কৰি ২৮.২ অভাৰত মেচখন জয় কৰে। অকল ট্ৰেভিছ হেডেই ৮৩টা বলত ১২৩ ৰান সংগ্ৰহ কৰে।
দ্বিতীয় দিনৰ আৰম্ভণিতে ক্ৰিকেট অষ্ট্ৰেলিয়াৰ চিইঅ’ টড গ্ৰীনবাৰ্গে কয় যে খেলখন আগতীয়াকৈ শেষ হ’লে বৃহৎ আৰ্থিক লোকচান হ’ব। অষ্ট্ৰেলিয়াৰ প্ৰথম ইনিংছ তেতিয়াও শেষ হোৱা নাছিল যদিও তেওঁ এছ ই এন ৰেডিঅ’ক ধেমালি কৰি কয় যে খেলখন তৃতীয় দিনটোলৈ নাযায় যেন লাগে।
তৃতীয় দিনটোত খেলখন নগ’লে কি ক্ষতি হ’ব তাৰ ধাৰণা দি তেওঁ কয়, “বহু অংশীদাৰৰ লোকচান হ’ব। প্ৰথমতে সম্প্ৰচাৰকসকলৰ। আমাৰ ক্ৰিকেট ব’ৰ্ডৰো ক্ষতি হ’ব, বিশেষকৈ টিকট বিক্ৰীৰ অভাৱৰ বাবে। আমাৰ পৃষ্ঠপোষক আৰু অন্যান্য অংশীদাৰসকলেও ক্ষতিগ্ৰস্ত হ’ব। এই ছিৰিজৰ আৰ্থিক প্ৰভাৱ বৃহৎ।”
পাৰ্থ টেষ্টখন দ্ৰুতগতিত শেষ হৈ যোৱাৰ ফলত শৃংখলাৰ দ্বিতীয়খন মেচৰ বাবে অপেক্ষা সকলো পক্ষৰ বাবে দীঘলীয়া হৈ পৰিছে। ব্রিজবেনত পৰৱৰ্তী টেষ্ট ৪ ডিচেম্বৰৰ পৰা আৰম্ভ হ’ব৷
