শুকুৰবাৰে কলিয়াবৰ আৰু জখলাবন্ধাৰ মাজত ৰাষ্ট্ৰীয় ঘাইপথ অৱৰোধ কৰে স্থানীয় ৰাইজে। কলিয়াবৰ-নুমলীগড় সংমণ্ডলৰ চাৰিলেণ্ডযুক্ত পথটো নিৰ্মাণৰ ক্ষেত্ৰত প্ৰস্তাৱিত ডাইভাৰ্চন সলনি কৰাৰ বিৰোধিতা কৰি স্থানীয় ৰাইজে এই প্ৰতিবাদ সাব্যস্ত কৰে।
এই পথ অৱৰোধৰ ফলত উজনি অসম আৰু উত্তৰ-পূৰ্বাঞ্চলৰ কেইবাখনো ৰাজ্যৰ সৈতে স্থলপথৰ যোগাযোগ সম্পূৰ্ণৰূপে বিচ্ছিন্ন হৈ পৰে।
প্ৰতিবাদকাৰীসকলে চক্ৰ বিষয়াৰ কাৰ্যালয়ৰ সন্মুখতো বিক্ষোভ প্ৰদৰ্শন কৰে, যাৰ ফলত সমগ্ৰ অঞ্চলটোত স্বাভাৱিক যাতায়ত স্তব্ধ হৈ পৰে।
আন্দোলনকাৰীসকলৰ মতে, নতুন নক্সা অনুসৰি কলিয়াবৰ তিনিআলিৰ পৰা পথটো ডাইভাৰ্চন কৰা হ’ব, যাৰ ফলত কুঁৱৰীটোল, হাটবৰ আৰু জখলাবন্ধা অঞ্চলটো মূল পথৰ পৰা আঁতৰি পৰিব। ইয়াৰ ফলত অঞ্চলটোৰ প্ৰায় ৮০,০০০ তকৈও অধিক বাসিন্দা পোনপটীয়াকৈ প্ৰভাৱিত হ’ব আৰু স্থানীয় ব্যৱসায়-বাণিজ্যত মোক্ষম আঘাত পৰিব।
উল্লেখ্য যে ৬,৯৬৭ কোটি ব্যয় সাপেক্ষেপে এই পথটোৰ দৈৰ্ঘ্য ৮৬ কিলোমিটাৰ (কলিয়াবৰৰ পৰা নুমলীগড়লৈ)। ইয়াত কাজিৰঙা ৰাষ্ট্ৰীয় উদ্যানৰ সুৰক্ষাৰ বাবে ৩৪ কিলোমিটাৰ দৈৰ্ঘ্যৰ এক উৰণীয়া সেতু অন্তৰ্ভুক্ত কৰা হৈছে।
‘কলিয়াবৰ ফ’ৰ লেন ডিমাণ্ড কমিটি’য়ে ইতিমধ্যে এই বিষয়ত কেন্দ্ৰীয় পথ পৰিবহণ মন্ত্ৰী নীতিন গাডকাৰীক এখন স্মাৰক পত্ৰ প্ৰদান কৰিছে। তেওঁলোকে দাবী জনাইছে যে ডাইভাৰ্চনৰ পৰিৱৰ্তে বৰ্তমানৰ পথটোকেই উন্নীতকৰণ আৰু বহল কৰিব লাগে। কমিটিখনে ইতিমধ্যে গুৱাহাটী উচ্চ ন্যায়ালয়তো এই সন্দৰ্ভত গোচৰ তৰা বুলি জানিব পৰা গৈছে।
আদালতত জ্যেষ্ঠ অধিবক্তা কে. এন. চৌধুৰীয়ে যুক্তি দৰ্শায় যে এই পথ ডাইভাৰ্চনৰ ফলত আটাইতকৈ বেছি লাভান্বিত হ’ব ‘প্ৰাইড ইষ্ট এণ্টাৰটেইনমেণ্ট প্ৰাইভেট লিমিটেড’ নামৰ এটা ব্যক্তিগত প্ৰতিষ্ঠান, যিহেতু প্ৰস্তাৱিত পথৰ কাষত তেওঁলোকৰ ১০০ বিঘাতকৈও অধিক মাটি আছে।
কেৱল অৰ্থনৈতিক দিশেই নহয়, পৰিৱেশবিদসকলেও উদ্বেগ প্ৰকাশ কৰিছে যে নতুন পথটো কেইবাটাও পৰিৱেশ-সংবেদনশীল জলাশয় আৰু হাতীৰ কৰিডৰৰ মাজেৰে পাৰ হৈ যাব। ইয়াৰ ফলত মানুহ-হাতীৰ সংঘাত বৃদ্ধি পোৱাৰ লগতে জলাশয়সমূহৰ জৈৱ-বৈচিত্ৰ্যও ধ্বংস হোৱাৰ সম্ভাৱনা আছে।
