নৱবৰ্ষক আদৰণি জনোৱাৰ আনন্দই এক ভয়ংকৰ বিষাদলৈ পৰিণত হ’ল। ছুইজাৰলেণ্ডৰ আলপাইন অঞ্চলৰ জনপ্ৰিয় ৰিজ’ৰ্ট চহৰ ক্ৰেন্স-মন্টানাৰ এখন বাৰত ভয়ংকৰ বিস্ফোৰণ আৰু অগ্নিকাণ্ড সংঘটিত হয়।
স্থানীয় আৰক্ষীয়ে জনোৱা মতে, বৃহস্পতিবাৰে পুৱা সংঘটিত হোৱা এই দুৰ্ঘটনাত কেইবাজনো লোকৰ মৃত্যু হোৱাৰ লগতে বহু লোক গুৰুতৰভাৱে আহত হয়। শেহতীয়া বাতৰি মতে এই ঘটনাত কমেও ৪০ জন লোক নিহত হৈছে।
চুইজাৰলেণ্ডৰ সংবাদ মাধ্যম আৰ টি এছে প্ৰকাশ কৰা অনুসৰি স্থানীয় সময় অনুসৰি পুৱা প্ৰায় ১:৩০ বজাত পৰ্যটক আৰু স্থানীয় লোকে নৱবৰ্ষৰ পূৰ্বে উদযাপন কৰি থকাৰ সময়তে ‘লে কনষ্টেলেচন’ নামৰ বাৰখনত এটা বা ততোধিক বিস্ফোৰণ সংঘটিত হয়।
প্ৰাথমিক অনুমান অনুসৰি এই বিস্ফোৰণটো বাৰৰ বেছমেণ্টত সংঘটিত হৈছিল, যাৰ ফলত নিমিষতে সমগ্ৰ অট্টালিকাটোত বিধ্বংসী জুই জ্বলি উঠে। সাধাৰণতে ৪০০ লোক বহিব পৰা এই বাৰখনত দুৰ্ঘটনা সংঘটিত হোৱাৰ সময়ত ভিৰ আছিল।
ভেলেছ কেণ্টন আৰক্ষীৰ মুখপাত্ৰ গেটান লেথিয়নে এএফপিক জনোৱা মতে, বিস্ফোৰণৰ কাৰণ এতিয়াও স্পষ্ট হোৱা নাই যদিও কেইবাজনো লোকৰ মৃত্যু হৈছে আৰু বহু লোক আহত হৈছে। ঘটনাস্থলীত কেইবাখনো এম্বুলেন্স নিয়োগ কৰা হৈছে আৰু ‘এয়াৰ-গ্লেচিয়াৰ’ হেলিকপ্টাৰখন উদ্ধাৰৰ কামত ব্যৱহাৰ কৰা হৈছে। প্ৰশাসনে নিহত পৰিয়ালৰ বাবে হেল্পলাইন নম্বৰ স্থাপন কৰিছে।
উদ্ধাৰ কামৰ সৈতে জড়িত এক সূত্ৰই এই কাণ্ডক ‘বৃহৎ দুৰ্যোগ’ বুলি অভিহিত কৰিছে। তেওঁৰ মতে, হতাহতৰ সংখ্যা ইমানেই বেছি হ’ব পাৰে যে ই ২০১২ চনৰ ছিয়েৰ বাছ দুৰ্ঘটনাৰ (য’ত ২৮ জন লোকৰ মৃত্যু হৈছিল)ৰ ভয়ংকৰ স্মৃতি ঘূৰাই আনিব পাৰে। অৱশ্যে আনুষ্ঠানিকভাৱে কোনো নিৰ্দিষ্ট সংখ্যা জনোৱা নাই আৰক্ষীয়ে।
আৰক্ষীয়ে এই পৰ্যন্ত প্ৰাৰম্ভিক তদন্তত কোনো ধৰণৰ কূটাঘাতমূলক বা অপৰাধমূলক কাৰ্যকলাপৰ প্ৰমাণ পোৱা নাই। ই এক দুৰ্ঘটনা বুলি অনুমান কৰা হৈছে যদিও ফৰেনছিক দলে বিস্ফোৰণৰ সঠিক উৎস নিৰ্ণয়ৰ বাবে কাম কৰি আছে।
