ত্ৰিপুৰাৰ ২৪ বছৰীয়া যুৱক এঞ্জেল চাকমাক হত্যাৰ প্ৰতিবাদত বুধবাৰে সন্ধিয়া ডেৰাডুনৰ ৰাজপথত উত্তৰ-পূৰ্বাঞ্চলৰ ছাত্ৰ-ছাত্ৰীসকলে এক বিশাল প্ৰতিবাদী কাৰ্যসূচী ৰূপায়ণ কৰে। বৰ্ণ বৈষম্যৰ বিৰুদ্ধে সোচ্চাৰ হৈ শিক্ষাৰ্থীসকলে এঞ্জেলৰ বাবে ন্যায়ৰ দাবী উত্থাপন কৰে।
‘ইউনিফাইড ত্ৰিপুৰা ষ্টুডেণ্টছ এছ’চিয়েচন’ (UTSA)-ৰ নেতৃত্বত ডেৰাডুনৰ বিভিন্ন শিক্ষানুষ্ঠানত অধ্যয়নৰত ছাত্ৰ-ছাত্ৰীসকলে সমবেত হয়। হাতে হাতে জ্বলন্ত মম লৈ উলিওৱা এই সমদলত আন ৰাজ্যৰ একাংশ শিক্ষাৰ্থীয়েও সমদলত অংশগ্ৰহণ কৰে। প্ৰতিবাদকাৰীসকলে এঞ্জেল চাকমাৰ ছবি থকা বেনাৰ লৈ “বৰ্ণবাদ বন্ধ কৰক”, “আমি ভাৰতীয়”, “আমি ন্যায় বিচাৰো” আদি শ্ল’গানেৰে ডেৰাডুনৰ ৰাজপথ উত্তাল কৰি তোলে।
UTSA-ৰ সাধাৰণ সম্পাদক চুৰান্তা ত্ৰিপুৰাই অভিযোগ কৰে যে আৰক্ষীয়ে সমগ্ৰ গোচৰটো গাপ দিবলৈ চেষ্টা চলাইছে। তেওঁৰ মতে, এই ঘটনাক আৰক্ষীয়ে বৰ্ণবাদী হিংসাৰ গোচৰ হিচাপে গণ্য কৰা নাই। ইয়াৰ উপৰিও, নৱবৰ্ষৰ প্ৰস্তুতিৰ বাবে যান-বাহনৰ সমস্যাৰ অজুহাত দেখুৱাই আৰক্ষীয়ে সমদলটো বন্ধ কৰিবলৈ চেষ্টা কৰা বুলিও শিক্ষাৰ্থীসকলে অভিযোগ উত্থাপন কৰে।
উল্লেখ্য যে ডেৰাডুনৰ এখন ব্যক্তিগত বিশ্ববিদ্যালয়ত এম.বি.এ. (MBA) চূড়ান্ত বৰ্ষত অধ্যয়নৰত এঞ্জেল চাকমাক যোৱা ৯ ডিচেম্বৰত একাংশ দুষ্কৃতিকাৰীয়ে ছুৰী আৰু অন্যান্য মাৰাত্মক অস্ত্ৰৰে আক্ৰমণ কৰি গুৰুতৰভাৱে আহত কৰিছিল। সুদীৰ্ঘ ১৭ দিন চিকিৎসালয়ত যুঁজ দিয়াৰ পিছত যোৱা ২৬ ডিচেম্বৰত তেওঁ মৃত্যুক সাৱটি লয়।
এঞ্জেলৰ পৰিয়াল আৰু বন্ধুবৰ্গই এই আক্ৰমণক বৰ্ণ বৈষম্যৰ পৰিণতি বুলি দাবী কৰিছে যদিও ডেৰাডুন আৰক্ষীয়ে ইয়াক অস্বীকাৰ কৰিছে। ডেৰাডুনৰ এছ.এছ.পি. অজয় সিঙে জনোৱা মতে, বৰ্তমানলৈকে চলা তদন্তত বৰ্ণ বৈষম্যৰ কোনো নিৰ্দিষ্ট প্ৰমাণ পোৱা হোৱা নাই। তেওঁ লগতে উল্লেখ কৰে যে উত্তৰ-পূৰ্বাঞ্চলৰ প্ৰায় ২,০০০ শিক্ষাৰ্থীসহ দেশৰ বিভিন্ন প্ৰান্তৰ ছাত্ৰ-ছাত্ৰীয়ে ডেৰাডুনত অধ্যয়ন কৰে, যাৰ ভিতৰত কেৱল ত্ৰিপুৰাৰেই প্ৰায় ২৫০ গৰাকী শিক্ষাৰ্থী আছে।
