প্ৰধানমন্ত্ৰী নৰেন্দ্ৰ মোদীৰ সংসদীয় সমষ্টি বৰাণসীত এজন কৰ্তব্যৰত আৰক্ষী উপ-পৰিদৰ্শকক আক্ৰমণ কৰাৰ গুৰুতৰ অভিযোগ উত্থাপন হৈছে। এই ঘটনাত জড়িত থকাৰ অভিযোগত হিমাংশু শ্ৰীবাস্তৱ নামৰ এজন যুৱকক আৰক্ষীয়ে গ্ৰেপ্তাৰ কৰিছে। অভিযুক্ত হিমাংশু হুকুলগঞ্জৰ বিজেপি কাউঞ্চিলৰ ব্ৰিজেশচন্দ্ৰ শ্ৰীবাস্তৱৰ পুত্ৰ বুলি জানিব পৰা গৈছে।
বৃহস্পতিবাৰে সন্ধিয়া চওক থানা এলেকাৰ মণিকৰ্ণিকা ঘাটৰ সমীপত এই অপ্ৰীতিকৰ পৰিস্থিতিৰ সৃষ্টি হয়। চৰকাৰী কৰ্মচাৰীক কৰ্তব্য পালনত বাধা দিয়া আৰু শাৰীৰিকভাৱে অপদস্থ কৰাৰ অপৰাধত তেওঁক আৰক্ষীয়ে জিম্মাত লৈছে।
ঘটনাৰ বিৱৰণি অনুসৰি, বৃহস্পতিবাৰে সন্ধিয়া তিনিজন যুৱকে এখন বাইকত উঠি মণিকৰ্ণিকা ঘাট এলেকাত উপস্থিত হৈছিল। সেই সময়ত অঞ্চলটোত তীব্ৰ ভিৰ থকাৰ বাবে বাহন চলাচল আৰু পাৰ্কিং নিষিদ্ধ কৰা হৈছিল। কিন্তু যুৱক কেইজনে নীতি-নিয়ম উলংঘা কৰি নো-ভেহিকল জ’নত বাইকখন পাৰ্ক কৰিবলৈ চেষ্টা কৰে। তাত কৰ্তব্যৰত অৱস্থাত থকা উপ-পৰিদৰ্শক অভিষেক ত্ৰিপাঠীয়ে তেওঁলোকক বাইকখন আঁতৰাই নিবলৈ অনুৰোধ জনায়। তেনে সময়তে এজন যুৱকে নিজক কাউঞ্চিলৰৰ পুত্ৰ বুলি পৰিচয় দি আৰক্ষী বিষয়াজনক ওলোটাকৈ ধমকি দিবলৈ আৰম্ভ কৰে।
আৰক্ষী বিষয়াজনে পুনৰ বাইকখন আঁতৰাবলৈ কোৱাত পৰিস্থিতি অধিক উত্তপ্ত হৈ পৰে। অভিযোগ উঠিছে যে হিমাংশু শ্ৰীবাস্তৱে হঠাতে উত্তেজিত হৈ উপ-পৰিদৰ্শক অভিষেক ত্ৰিপাঠীক ৰাজহুৱাকৈ চৰ মাৰে। এই দৃশ্য দেখি তাত থকা স্থানীয় ৰাইজে ক্ষোভিত হৈ পৰে আৰু অভিযুক্ত যুৱকজনক কৰায়ত্ত কৰি প্ৰহাৰ কৰিবলৈ ধৰে। পিছত আৰক্ষীৰ এটা দল ঘটনাস্থলীত উপস্থিত হৈ পৰিস্থিতি নিয়ন্ত্ৰণ কৰে আৰু হিমাংশুক উদ্ধাৰ কৰি থানালৈ লৈ যায়।
ডিচিপি গৌৰৱ বনসৱালে জনোৱা মতে, উপ-পৰিদৰ্শকজনৰ ভাষ্যৰ ভিত্তিত এটা গোচৰ ৰুজু কৰি হিমাংশুক গ্ৰেপ্তাৰ কৰা হৈছে।
এই ঘটনাৰ পাছতে সমগ্ৰ অঞ্চলটোত উত্তেজনাৰ সৃষ্টি হয়। প্ৰায় ৪০-৫০ জনীয়া এটা দলে উত্তপ্ত পৰিস্থিতিৰ সৃষ্টি কৰিবলৈ চেষ্টা চলাইছিল। আনহাতে হিমাংশুক থানালৈ নিয়াৰ পাছত একাংশ বিজেপি কৰ্মীয়ে থানাৰ সন্মুখত ভিৰ কৰি প্ৰতিবাদ সাব্যস্ত কৰে।
আৰক্ষীৰ সূত্ৰই জনোৱা মতে, ৰাইজৰ আক্ৰমণত আহত হোৱা হিমাংশুক চিকিৎসালয়ত ভৰ্তি কৰোৱা হৈছে। বৰাণসী আৰক্ষীয়ে বৰ্তমান সমগ্ৰ ঘটনাটোৰ তদন্ত অব্যাহত ৰাখিছে।
