শৈলধৰ বৰুৱা মেমৰিয়েল ট্ৰাষ্টৰ উদ্যোগত অষ্টমবাৰৰ বাবে উত্তৰ পূৰ্বাঞ্চল ভিত্তিত আয়োজন কৰা চলচ্চিত্ৰ প্ৰতিযোগিতা ২০২৫ বৰ্ষৰ ফলাফলসমূহ ট্ৰাষ্টৰ তৰফৰ পৰা আনুষ্ঠানিকভাৱে ঘোষণা কৰা হৈছে। এইবাৰৰ প্ৰতিযোগিতাত খাচী ভাষাৰ চলচ্চিত্ৰ এপট-এ শ্ৰেষ্ঠ চলচ্চিত্ৰ হিচাপে সন্মান লাভ কৰিছে। ছবিখনৰ প্ৰযোজক তথা পৰিচালক ৰাফেল ৰাস্ত্ৰিয়ে ৫০,০০০ টকাৰ লগতে ট্ৰফী আৰু চাৰ্টিফিকেট লাভ কৰিব। ইফালে নৰা নামৰ চলচ্চিত্ৰখনৰ বাবে নৱাগত পৰিচালক প্ৰকাশ দাসে শ্ৰেষ্ঠ পৰিচালকৰ বঁটা লাভ কৰিছে। তেওঁক পুৰস্কাৰ হিচাপে ২৫,০০০ টকা, ট্ৰফী আৰু চাৰ্টিফিকেট প্ৰদান কৰা হ’ব।
অন্যান্য বিভিন্ন শিতানতো বঁটাপ্ৰাপকসকলৰ নাম ঘোষণা কৰা হৈছে। আকাশ এখন নদীৰ নাম ছবিৰ বাবে সঞ্জীৱ সভাপণ্ডিতক শ্ৰেষ্ঠ চিত্ৰনাট্যকাৰ, এপট ছবিৰ বাবে আগাষ্টিন কুৰবাক শ্ৰেষ্ঠ সংগীত পৰিচালক, তাৰিখ ছবিৰ বাবে অনিৰুদ্ধ বৰুৱাক শ্ৰেষ্ঠ চিত্ৰগ্ৰহণকাৰী আৰু নৰা ছবিৰ বাবে মানস প্ৰতীম গোস্বামীক শ্ৰেষ্ঠ শব্দ গ্ৰহণকাৰীৰ বঁটা প্ৰদান কৰা হ’ব। মণিপুৰী ছবি ওৱাননেছৰ বাবে প্ৰিয়কান্ত লেইচৰামে শ্ৰেষ্ঠ সম্পাদকৰ বঁটা লাভ কৰাৰ বিপৰীতে উদকাটাৰ ছবিৰ বাবে ভাস্কৰজ্যোতি কলিতাই শ্ৰেষ্ঠ কলা নিৰ্দেশকৰ সন্মান লাভ কৰিছে। অভিনয়ৰ ক্ষেত্ৰত নৈ কথা ছবিৰ বাবে ৰাজু ৰয়ে শ্ৰেষ্ঠ অভিনেতা আৰু বোখা দে ভেইন ছবিৰ বাবে ৰ’দালী বৰাই শ্ৰেষ্ঠ অভিনেত্ৰীৰ বঁটা আজুৰি নিবলৈ সক্ষম হৈছে। এই আঠোটা শিতানৰ প্ৰতিগৰাকী বিজয়ীয়ে ২০,০০০ টকাকৈ ধনৰাশিৰ লগতে ট্ৰফী আৰু চাৰ্টিফিকেট লাভ কৰিব।
প্ৰতিযোগিতাখনত জুৰীৰ বিশেষ বঁটাৰ বাবে নিৰ্বাচিত হৈছে তিনিগৰাকী ব্যক্তি। বৰ্খা আৰু গমন ছবিৰ বাবে অভিনেতা যতীন্দ্ৰ নাথ খনিকৰ, ব্ৰহ্মাকন্যাৰ বাবে পৰিচালক ধীৰাজ কাশ্যপ আৰু কাৰ্বি চলচ্চিত্ৰ কেনবো এল টিৰ বাবে পৰিচালক খঞ্জন কিশোৰ নাথক এই বিশেষ সন্মান আগবঢ়োৱা হ’ব। তেওঁলোকে স্মাৰক আৰু চাৰ্টিফিকেট লাভ কৰিব। অহা ১০ জানুৱাৰী ২০২৬ তাৰিখে জ্যোতিচিত্ৰবনৰ ৰুদ্ৰ বৰুৱা প্ৰেক্ষাগৃহত এই বঁটাসমূহ প্ৰদান কৰা হ’ব। উল্লেখযোগ্য যে এইবাৰ পোনপ্ৰথমবাৰৰ বাবে শৈলধৰ বৰুৱা বঁটা প্ৰদান অনুষ্ঠান এদিনৰ পৰিৱৰ্তে দুদিনীয়া কাৰ্যসূচীৰে ১০ আৰু ১১ জানুৱাৰীত অনুষ্ঠিত কৰা হ’ব।
এই দুয়োটা দিনতে দৰ্শকৰ বাবে বঁটাপ্ৰাপক চলচ্চিত্ৰসমূহ প্ৰদৰ্শন কৰাৰ ব্যৱস্থা কৰা হৈছে। ১০ জানুৱাৰীত চাৰিখন ছবি প্ৰদৰ্শন কৰাৰ লগতে দিনৰ ভাগত পুৰস্কৃত ছবিৰ নিৰ্মাতাসকলৰ সৈতে এক অন্তৰংগ আলাপ অনুষ্ঠান অনুষ্ঠিত হ’ব যিটো পৰিচালনা কৰিব বিশিষ্ট লেখক মুনীন বায়নে। সেইদিনা সন্ধিয়া ৫ বজাত অনুষ্ঠিত হ’বলগীয়া মূল বঁটা বিতৰণী অনুষ্ঠানত মুখ্য অতিথি হিচাপে উপস্থিত থাকিব ভাৰতৰ বিশিষ্ট অভিনেত্ৰী তথা ৰাষ্ট্ৰীয়-আন্তঃৰাষ্ট্ৰীয় বঁটাপ্ৰাপক পৰিচালক সুহাসিনী মূলে। তেখেতে জাহ্নু বৰুৱাৰ বিখ্যাত ছবি অপৰূপাত মূল চৰিত্ৰত অভিনয় কৰিছিল। সন্মানীয় অতিথি হিচাপে উপস্থিত থাকিব বিশিষ্ট অভিনেত্ৰী তথা কলা নিৰ্দেশক মঞ্জুলা বৰুৱা।
এই অনুষ্ঠানতে বিশিষ্ট সংগীতজ্ঞ ৰমেন চৌধুৰী আৰু কণ্ঠশিল্পী সমৰ হাজৰিকাক জীৱন জোৰা সাধনা সন্মান জনোৱা হ’ব। অনুষ্ঠানৰ আৰম্ভণিতে ড০ ভূপেন হাজৰিকাৰ জন্ম শতবাৰ্ষিকী উপলক্ষে আৰু শিল্পী জুবিন গাৰ্গৰ স্মৃতিত শ্ৰদ্ধাঞ্জলি জনোৱা হ’ব য’ত শিল্পী ৰূপম ভূঞাই গীত পৰিৱেশন কৰিব। ইয়াৰ উপৰিও ৰঞ্জিত দাসৰ সম্পাদনাৰে চিনে জ্যোতি নামৰ এখন চলচ্চিত্ৰ বিষয়ক স্মৃতিগ্ৰন্থও উন্মোচন কৰা হ’ব। ১১ জানুৱাৰীত পুৱা ৯.৩০ বজাৰ পৰা পুনৰ চাৰিখন চলচ্চিত্ৰ প্ৰদৰ্শন কৰা হ’ব আৰু দিনৰ ১১.৩০ বজাত সুহাসিনী মূলেৰ সৈতে এক আলাপ অনুষ্ঠান অনুষ্ঠিত হ’ব যিটো সঞ্চালনা কৰিব বিশিষ্ট কবি আৰু চলচ্চিত্ৰ সমালোচক মনোজ বৰপূজাৰীয়ে। শৈলধৰ বৰুৱা মেমৰিয়েল ট্ৰাষ্টৰ সভাপতি মৃন্ময় বৰুৱা আৰু সম্পাদক ৰঞ্জিত দাসে এই দুয়োদিনীয়া কাৰ্যসূচীলৈ ৰাইজৰ উপস্থিতি কামনা কৰিছে।
