নতুন বছৰৰ আৰম্ভণিতে বিশ্ব ৰাজনীতিত এক অভূতপূৰ্ব পৰিঘটনাৰ সাক্ষী হৈ পৰিল সমগ্ৰ বিশ্ব। গভীৰ নিশাৰ এক নিখুঁত অভিযানত ট্ৰাম্পৰ সেনাই ভেনিজুৱেলাৰ ৰাষ্ট্ৰপতি নিকোলাছ মাদুৰো আৰু তেওঁৰ পত্নীক কৰায়ত্ত কৰি আমেৰিকালৈ লৈ আহিছে।
এই খবৰে বিশ্বৰ ৰাজনীতি জোকাৰি গ’ল যদিও এজন অচিনাকি ব্যক্তিয়ে ক’ৰবাত মনে মনে বহি উদযাপন কৰিছিল। কাৰণ এই খবৰটোৱে তেওঁক আনি দিছে প্ৰায় ৪ লাখ ডলাৰ। এতিয়া এটাই প্ৰশ্ন – এয়া কেৱল ভাগ্য নে প্ৰশাসনৰ ভিতৰ মহলৰ থবৰ জনাৰ সুফল?
‘দ্য নিউ ৰিপাব্লিক’ৰ এক প্ৰতিবেদন অনুসৰি এই বৃহৎ পৰিমাণৰ ধন অনলাইন প্ৰেডিকশ্যন মাৰ্কেট পলিমাৰ্কেটত উপাৰ্জন হৈছে। এই প্লেটফৰ্মত ব্যৱহাৰকাৰীয়ে ভৱিষ্যতৰ ৰাজনৈতিক আৰু বিশ্বৰ পৰিঘটনাৰ ওপৰত বাজি ধৰে। আৰু তাতেই পোহৰলৈ আহিল এটা ৰহস্যময় একাউন্ট।
প্ৰতিবেদনত কোৱা হৈছে যে একাউণ্টটো ২৭ ডিচেম্বৰত খোলা হৈছিল। একাউণ্টটোৱে মাত্ৰ দুটা কথাত বাজি ধৰিছিল—
১)আমেৰিকাই ভেনিজুৱেলাত বোমা আক্ৰমণ চলাব
২) ৩১ জানুৱাৰীৰ ভিতৰত নিকোলাছ মাদুৰোক ক্ষমতাৰ পৰা অপসাৰণ কৰা হ’ব
ব্যক্তিজনে এই দুটা বাজিত একেলগে প্ৰায় ৩৫ হাজাৰ ডলাৰ লগায়। আটাইতকৈ আচৰিত কথাটো হ’ল, যেতিয়া এই বাজি ধৰা হৈছিল, তেতিয়া এই ঘটনাৰ সম্ভাৱনা আছিল মাত্ৰ ৬ শতাংশ।
নিশাটোৰ ভিতৰতে সলনি হৈ গ’ল সৌভাগ্য
ভাগ্যই যেন মানুহজনক অদ্ভুতভাৱে সহায় কৰিছিল। বাজি ধৰাৰ কেইঘণ্টামানৰ ভিতৰতে সেই ভৱিষ্যদ্বাণী সঁচা হৈ পৰিল। এদিন নৌহওঁতেই এই একাউণ্টটোৱে ৪ লাখ ডলাৰতকৈ অধিক উপাৰ্জন কৰে। Axios য়ে জনোৱা মতে এই খবৰৰ জৰিয়তে আন কেইবাজনো ব্যৱহাৰকাৰীয়েও হাজাৰ হাজাৰ ডলাৰ লাভ কৰিছে। কিন্তু একেলগে ইমান বৃহৎ ধন লাভ কৰাটো অভূতপূৰ্ব।
সংবাদ মাধ্যমৰ বাতৰি অনুসৰি আমেৰিকাত স্থানীয় সময় অনুসৰি শুকুৰবাৰে গভীৰ নিশা হঠাতে এনে বাজিৰ পৰিমাণ বৃদ্ধি পায়। আৰু মাত্ৰ কেইঘণ্টামানৰ পিছতে আমেৰিকাৰ ৰাষ্ট্ৰপতি ড’নাল্ড ট্ৰাম্পে এই অভিযানৰ কথা ঘোষণা কৰে। ৱাল ষ্ট্ৰীট জাৰ্নেলে প্ৰকাশ কৰা অনুসৰি শুকুৰবাৰে নিশা ১০ বজাৰ আগতেই ‘মাদুৰো ধৰা পৰিব নে নাই’ এই প্ৰশ্নটোৰ ওপৰত বাজিৰ পৰিমাণ দ্ৰুতগতিত বৃদ্ধি পাবলৈ ধৰিলে। এই হাৰ কেইবা সপ্তাহ ধৰি সৰ্বনিম্ন আছিল।
পুৱা ৪:২০ বজাত ৩১ জানুৱাৰীৰ ভিতৰত মাদুৰো আমেৰিকাৰ জিম্মাত থাকিব নে নাই সেই প্ৰশ্নত বাজিৰ হাৰ হঠাতে আকাশলংঘী হৈ পৰিল। এই সময়তে ট্ৰাম্পে ছ’চিয়েল মিডিয়াত এই অভিযানৰ কথা ঘোষণা কৰে। এক্সিওছৰ মতে, অভিযানৰ পিছত সেই একাউণ্টটোৰ মুঠ আয় হয় ৪৩৬,৭৫৯.৬১ ডলাৰ।
এই মুহূৰ্তত আটাইতকৈ ডাঙৰ প্ৰশ্নটো হ’ল – বিশাল অংকৰ বাজি জয় কৰা ব্যক্তিজনে কি হ’ব আগতীয়াকৈ জানিছিল নেকি? অৱশ্যে ব্যক্তিজনৰ পৰিচয় এতিয়াও পোহৰলৈ অহা নাই। পলিমাৰ্কেটেও এই সন্দৰ্ভত কোনো আনুষ্ঠানিক বিবৃতি দিয়া নাই।
চিবিএছৰ এক প্ৰতিবেদন অনুসৰি বৰদিনৰ সময়ত ভেনিজুৱেলাৰ আক্ৰমণৰ বিষয়ে আমেৰিকাৰ সামৰিক বিষয়াসকলে আলোচনা কৰিছিল। পিছত এই পৰিকল্পনা সলনি কৰি নাইজেৰিয়াত থকা আইছিছৰ ঘাটিত আক্ৰমণ কৰাৰ সিদ্ধান্ত লোৱা হয়। অৱশ্যে প্ৰশ্ন ৰৈ গৈছে – এই গোপন আলোচনাবোৰ ক’ৰবাত ফাদিল হৈছিল নেকি?
ভেনিজুৱেলাৰ অভিযানক লৈ ট্ৰাম্প প্ৰশাসনে ৰাজহুৱাভাৱে মৌনতা অৱলম্বন কৰাৰ বিপৰীতে বিত্তীয় এই লেনদেনে নতুন সন্দেহৰ সৃষ্টি কৰিছে। বহুতে ধাৰণা কৰে যে কোনোবাই ভিতৰৰ তথ্য জনাৰ সুবিধা লৈ এই বৃহৎ ধনৰাশি লাভ কৰিছে। এতিয়া এই ৰহস্যময় জুৱাৰ আঁৰৰ ব্যক্তিজনৰ পৰিচয় কেতিয়াবা পোহৰলৈ আহে নে নাই সেয়া হ’ব লক্ষ্যণীয়।
