ভাৰতৰ চিকিৎসা ইতিহাসত এক ঐতিহাসিক পদক্ষেপ হিচাপে নয়ডাত দেশৰ প্ৰথমটো চৰকাৰী কৃত্রিম বুদ্ধিমত্তা বা এআই নির্ভৰ চিকিৎসাকেন্দ্র মুকলি কৰা হৈছে। গ্রেটাৰ নয়ডাৰ গভর্নমেন্ট ইনষ্টিটিউট অৱ মেডিকেল ছায়েন্স চমুকৈ জিআইএমএছত এই অত্যাধুনিক এআই ক্লিনিকটো আৰম্ভ কৰা হৈছে। বিশেষজ্ঞসকলৰ মতে, স্বাস্থ্য সেৱাত কৃত্রিম বুদ্ধিমত্তাৰ ব্যৱহাৰক বাস্তৱ ৰূপ দিয়াৰ দিশত এইয়া এক যুগান্তকাৰী পদক্ষেপ হিচাপে গণ্য কৰা হৈছে। বিশেষকৈ কেন্সাৰ,, হৃদৰোগ, কিডনী আৰু লিভাৰৰ দৰে জটিল বেমাৰবোৰ অতি প্ৰাৰম্ভিক পৰ্যায়ত ধৰা পেলোৱাৰ ক্ষেত্ৰত এই ক্লিনিকে গুৰুত্বপূৰ্ণ ভূমিকা ল’ব।
এই এআই ক্লিনিকটোত উন্নতমানৰ এলগৰিডম আৰু জেনেটিক স্ক্ৰীনিং ব্যৱস্থা ব্যৱহাৰ কৰি জটিল ৰোগসমূহ চিনাক্ত কৰা হ’ব। ইয়াত কেৱল ৰোগ ধৰা পেলোৱাই নহয়, বৰঞ্চ ৰোগীৰ আৰোগ্য হোৱাৰ সম্ভাৱনা কিমান সেই বিষয়েও এআইয়ে বিশ্লেষণ আগবঢ়াব। এজন ৰোগীৰ তেজৰ পৰীক্ষাৰ ৰিপ’ৰ্ট, বিভিন্ন স্কেন আৰু জেনেটিক তথ্যসমূহ তন্ন তন্নকৈ পৰীক্ষা কৰি এই ব্যৱস্থাই নিখুঁত ফলাফল দিবলৈ সক্ষম হ’ব। জিআইএমএছৰ সঞ্চালক ব্রিগেডিয়ার ডাঃ ৰাকেশ কুমাৰ গুপ্তাই জনোৱা মতে, এক্স-ৰে, আল্ট্রাসাউণ্ড, চিটি স্কেন আৰু এমআৰআইৰ দৰে পৰীক্ষাসমূহ এআই টুলৰ জৰিয়তে বিশ্লেষণ কৰা হ’ব যাতে ৰোগ নিৰ্ণয়ত কোনো ভুল নাথাকে।
বৰ্তমান সময়ত প্ৰযুক্তিক আওকাণ কৰি আগবঢ়াটো কঠিন হৈ পৰিছে আৰু এই নতুন উদ্যোগে উদ্ভাৱনী প্ৰযুক্তিৰ সুবিধাসমূহ পোনপটীয়াকৈ ৰোগী আৰু চিকিৎসকৰ ওচৰলৈ লৈ যাব। এই এআই ক্লিনিকৰ জৰিয়তে চিকিৎসালয়ৰ কাম-কাজবোৰ অধিক দ্ৰুত আৰু নিখুঁত হ’ব। বিশেষকৈ জৰুৰীকালীন অৱস্থাত য’ত সময়ৰ মূল্য অতি বেছি, তাত এআইয়ে অতি কম সময়ৰ ভিতৰতে ৰিপ’ৰ্ট প্ৰস্তুত কৰি গুৰুতৰ ৰোগীসকলক অগ্ৰাধিকাৰ দিয়াত সহায় কৰিব। ইয়াৰ ফলত ৰেডিঅ’লজিষ্টসকলৰ কামৰ বোজা প্ৰায় ৪০ শতাংশলৈ কমি যোৱাৰ সম্ভাৱনা আছে।
কেৱল ইমেজিং নহয়, পেথ’লজীৰ ক্ষেত্ৰতো এই ক্লিনিকে বিশেষ সহায় কৰিব। টিছু বা কলাৰ বিশ্লেষণ স্বয়ংক্ৰিয়ভাৱে কৰি এআইয়ে এনে কিছুমান তথ্য ধৰা পেলাব পাৰিব যিবোৰ হয়তো মানুহৰ চকুৱে সহজে ধৰিব নোৱাৰে। কেন্সাৰৰ দৰে মাৰাত্মক ৰোগৰ ক্ষেত্ৰত ইয়াৰ অৱদান হ’ব অপৰিসীম। কিয়নো প্ৰাৰম্ভিক পৰ্যায়তে এই ৰোগ ধৰা পৰিলে চিকিৎসাৰ সফলতাৰ হাৰ বহু পৰিমাণে বৃদ্ধি পায়। ইয়াৰ উপৰি প্ৰতিজন ৰোগীৰ বাবে তেওঁৰ জীৱনশৈলী আৰু জেনেটিক তথ্যৰ ওপৰত ভিত্তি কৰি সুকীয়া চিকিৎসা পদ্ধতি বা পাৰ্চোনালাইজড ট্ৰিটমেণ্টৰ পথো ই মুকলি কৰিব। সামগ্ৰিকভাৱে এই উদ্যোগে ভাৰতৰ স্বাস্থ্য ব্যৱস্থালৈ এক বৃহৎ পৰিৱৰ্তন আনিব বুলি আশা কৰা হৈছে।
