ছত্তীশগড়ত কোৰবা জিলাত এক জঘন্য তথা মানৱতা লজ্জানত কৰা ঘটনা পোহৰলৈ আহিছে। আৰক্ষীৰ জৰুৰীকালীন সেৱা ‘ডায়েল ১১২’ (Dial 112)-ৰ এখন বাহনৰ চালকসহ পাঁচজন লোকে এগৰাকী ১৯ বছৰীয়া যুৱতীক ধৰ্ষণ কৰাৰ গুৰুতৰ অভিযোগ উত্থাপন হৈছে। শনিবাৰে আৰক্ষীয়ে সদৰী কৰা মতে, এই পাশৱিক কাণ্ডত জড়িত থকা আৰক্ষী হেল্পলাইন বাহনখনৰ ব্যক্তিগত চালকজনসহ দুজন অভিযুক্তক ইতিমধ্যে জিম্মাত লোৱা হৈছে।
আৰক্ষী বিষয়াৰ ভাষ্য অনুসৰি, ৮ জানুৱাৰীৰ নিশা বাংকিমংগৰা থানাৰ অন্তৰ্গত এলেকাত এই ঘটনা সংঘটিত হৈছিল। ভুক্তভোগী যুৱতীগৰাকীৰ পৰিচিত এজন অভিযুক্তই তেওঁক ফোন কৰি মাতি আনিছিল।
অভিযুক্তই যুৱতীগৰাকীক বাংকিমংগৰাৰ এটা নিৰ্জন ঘৰলৈ লৈ গৈছিল, য’ত চালকজন আৰু আন চাৰিজন লোকে পাল পাতি তেওঁক ধৰ্ষণ কৰা বুলি অভিযোগ উত্থাপন হৈছে।
ঘটনাৰ পিছত অভিযুক্তই ভুক্তভোগীক অচেতন অৱস্থাত এৰি থৈ ঘটনাস্থলীৰ পৰা পলায়ন কৰে। যুৱতীগৰাকীয়ে পিছত কোনোমতে ঘৰত উপস্থিত হৈ পৰিয়ালৰ লোকক সকলো কথা বিৱৰি কয়। পৰিয়ালে তেওঁক লগে লগে মেডিকেল কলেজ হাস্পতাললৈ লৈ যায় আৰু পিছত আৰক্ষীক খবৰ দিয়ে।
পোনপ্ৰথমে শুকুৰবাৰে চিভিল লাইন থানাত এখন ‘জিৰো এফ আই আৰ’ (Zero FIR) পঞ্জীয়ন কৰা হৈছিল আৰু পিছত তদন্তৰ বাবে গোচৰটো বাংকিমংগৰা থানালৈ হস্তান্তৰ কৰা হয়।
কোৰবাৰ আৰক্ষী অধীক্ষক সিদ্ধাৰ্থ তিৱাৰীয়ে জানিবলৈ দিয়া মতে, ‘ডায়েল ১১২’ সেৱাৰ ব্যক্তিগত চালকজনসহ দুজন অভিযুক্তক আটক কৰা হৈছে আৰু বাকী তিনিজন অভিযুক্তক বিচাৰি অভিযান অব্যাহত ৰখা হৈছে।
