ওড়িশাৰ ৰুড়কেলাৰ সমীপত বুধবাৰে এখন চাৰ্টাৰ্ড বিমান দুৰ্ঘটনাত পতিত হয়। ৰুড়কেলাৰ জগদা ব্লকৰ অন্তৰ্গত জাল্ডা এলেকাত এই দুৰ্ঘটনা সংঘটিত হয়। জানিব পৰা মতে, ৰুড়কেলাৰ পৰা ভুৱনেশ্বৰলৈ গৈ থকা অৱস্থাত বিমানখন নিয়ন্ত্ৰণ হেৰুৱাই মাটিত আচাৰ খাই পৰে।
বিমানখনত চাৰিগৰাকী যাত্ৰী আৰু দুগৰাকী ক্ৰু সদস্য আছিল। প্ৰাথমিক তথ্য অনুসৰি, পাইলটসহ আটাইকেইগৰাকী যাত্ৰী আৰু ক্ৰু সদস্য আহত হৈছে যদিও সৌভাগ্যক্ৰমে কোনো লোকৰ মৃত্যু হোৱা নাই। দুৰ্ঘটনাৰ প্ৰকৃত কাৰণ এতিয়াও স্পষ্ট হোৱা নাই।
ওড়িশাৰ মুখ্যমন্ত্ৰী মোহন মাঝিয়ে সামাজিক মাধ্যম ‘এক্স’ত (X) এটা পোষ্ট যোগে কয়, “ৰুড়কেলাত সংঘটিত বিমান দুৰ্ঘটনাৰ খবৰ পাই মই অত্যন্ত দুখিত হৈছোঁ। ভগৱান জগন্নাথৰ কৃপাত সকলো যাত্ৰী সুৰক্ষিত থকাৰ খবৰে আশ্বস্ত কৰিছে। মই সংশ্লিষ্ট কৰ্তৃপক্ষক আহতসকলক তৎক্ষণাৎ উন্নত চিকিৎসা সেৱা প্ৰদান কৰিবলৈ নিৰ্দেশ দিছোঁ। পৰিস্থিতিৰ ওপৰত মই ব্যক্তিগতভাৱে নজৰ ৰাখি আছোঁ।”
ৰাজ্যৰ বাণিজ্য আৰু পৰিবহণ মন্ত্ৰী বি. বি. জেনাই জনোৱা মতে, ৰুড়কেলাৰ পৰা ভুৱনেশ্বৰলৈ ছয়গৰাকী লোকক লৈ যোৱা ব্যক্তিগত বিমান ‘চাৰ্লি-২০৮’ ৰুড়কেলাৰ পৰা প্ৰায় ১০ কিলোমিটাৰ দূৰত্বৰ জাল্ডা এলেকাত দুৰ্ঘটনাত পতিত হয়। ৰাজ্য চৰকাৰে ইতিমধ্যে অসামৰিক বিমান পৰিবহণ সঞ্চালক প্ৰধানক (DGCA) এই বিষয়ে অৱগত কৰিছে।
ভুৱনেশ্বৰ বিমানবন্দৰৰ সঞ্চালক প্ৰসন্ন প্ৰধানে জনোৱা মতে, আহত যাত্ৰীসকল হৈছে— সুশান্ত কুমাৰ বিশ্বল, অনিতা চাহু, সুনীল আগৰৱালা আৰু সবিতা আগৰৱালা। আনহাতে, আহত ক্ৰু সদস্য দুগৰাকী হৈছে কেপ্টেইন নবীন কদংগা আৰু কেপ্টেইন তৰুণ শ্ৰীবাস্তৱ।
শীৰ্ষ অগ্নিনিৰ্বাপক বিষয়া ৰমেশ চন্দ্ৰ মাঁঝিয়ে জনায় যে, বিয়লি প্ৰায় ২:৫০ বজাত দুৰ্ঘটনাৰ খবৰ পোৱাৰ লগে লগে ৰুড়কেলা আৰু পানপোছৰ অগ্নিনিৰ্বাপক বাহিনীৰ দল ঘটনাস্থলীত উপস্থিত হয়। স্থানীয় লোকৰ সহায়ত যাত্ৰীসকলক উদ্ধাৰ কৰি জে.পি. হাস্পতাল আৰু আৰ.জি.এইচ. (RGH) হাস্পতাললৈ প্ৰেৰণ কৰা হয়। অগ্নিনিৰ্বাপক বাহিনীয়ে বিশেষ পদ্ধতিৰে বিমানখনৰ পৰা তেল নিঃসৰণ বন্ধ কৰি এক সম্ভাৱ্য ভয়ংকৰ অগ্নিকাণ্ডৰ পৰা ৰক্ষা কৰে।
সম্প্ৰতি সংশ্লিষ্ট কৰ্তৃপক্ষই দুৰ্ঘটনাৰ প্ৰকৃত কাৰণ জানিবলৈ তদন্ত অব্যাহত ৰাখিছে।
