অসমীয়া ভোগালীৰ উছাহে আজি সমগ্ৰ ৰাজ্যতে এক উখল-মাখল পৰিৱেশৰ সৃষ্টি কৰিছে। আজি মাঘ বিহুৰ উৰুকা উপলক্ষে চুকে-কোণে সকলোতে এক আনন্দময় পৰিৱেশ বিৰাজ কৰিছে। বিশেষকৈ খেতি চপোৱাৰ পিছত এই ভোগৰ উৎসৱক লৈ অসমীয়া ৰাইজৰ মাজত ব্যাপক উৎসাহ দেখিবলৈ পোৱা গৈছে। গাঁৱে-ভূঁয়ে আৰু চহৰে-নগৰে পুৱাৰে পৰাই বজাৰত মানুহৰ ভিৰ পৰিলক্ষিত হৈছে। মাছ, মাংস আৰু বিভিন্ন ধৰণৰ থলুৱা খাদ্য সামগ্ৰীৰে ভৰি পৰিছে বজাৰসমূহ। পৰম্পৰা অনুসৰি আজি নিশা সকলোৱে একেলগে বহি এসাজ লগে-ভাগে খোৱাৰ প্ৰস্তুতি চলাইছে।
ৰাজ্যৰ পথাৰসমূহত ইতিমধ্যে ডেকাসকলে অতি সুন্দৰকৈ ভেলাঘৰ আৰু মেজি সাজি উলিয়াইছে। এই ভেলাঘৰসমূহক কেন্দ্ৰ কৰিয়েই আজি নিশা উৰুকাৰ ভোজৰ আয়োজন কৰা হৈছে। সৰু-বৰ সকলোৱে মিলি খৰি সংগ্ৰহ কৰা আৰু ভোজৰ বজাৰ কৰাত ব্যস্ত হৈ পৰা দৃশ্যই অসমীয়া সমাজৰ একতাৰ নিদৰ্শন দাঙি ধৰিছে। ডেকা-গাভৰুৰ লগতে জ্যেষ্ঠসকলেও এই উছাহৰ পৰা আঁতৰি থকা নাই। সকলোৰে মাজত কেৱল এটাই লক্ষ্য যে আজিৰ ৰাতিটো কেনেকৈ আনন্দ-উল্লাসৰ মাজেৰে অতিবাহিত কৰিব পাৰি।
ঘৰৰ চোতালত বিশেষকৈ মহিলাসকলে বিভিন্ন ধৰণৰ পিঠা-পনা আৰু জলপান প্ৰস্তুত কৰাত ব্যস্ত হৈ আছে। তিল পিঠা, ঘিলা পিঠা আৰু সান্দহৰ সুঘ্ৰাণে গাঁৱৰ পৰিৱেশ আমোলমোলাই তুলিছে। কাইলৈ পুৱা পৰম্পৰাগতভাৱে মেজি জ্বলাই অগ্নি দেৱতাক সেৱা জনাই আশীৰ্বাদ বিচাৰিব। প্ৰতিবছৰৰ দৰে এইবাৰো উৰুকাৰ এই দিনটোৱে অসমীয়া মানুহৰ মাজত ভাতৃত্ববোধ আৰু চেনেহৰ সম্পৰ্ক অধিক দৃঢ় কৰি তুলিছে। সকলোৰে মনত এতিয়া এটাই আশা যাতে এই ভোগালীৰ উছাহে সকলোৰে জীৱনলৈ সুখ আৰু সমৃদ্ধি কঢ়িয়াই আনে।
