বৰ্তমানৰ অনিয়মিত খাদ্যাভ্যাস আৰু ব্যায়ামৰ অভাৱৰ বাবে পেটৰ গেছ বা বদহজম আমাৰ সমাজৰ এক অতি অশান্তিদায়ক সমস্যা হৈ পৰিছে। এই সমস্যাৰ অন্তৰালত কেইবাটাও কাৰণ নিহিত হৈ থাকে, যাৰ ভিতৰত অতিমাত্ৰা জ্বলা-পোৰা বা তেলযুক্ত আহাৰ গ্ৰহণ কৰা, দ্ৰুতগতিত খাদ্য খোৱা আৰু পৰ্যাপ্ত পৰিমাণে পানী নোখোৱাটোৱেই প্ৰধান। ইয়াৰ উপৰি খাদ্য গ্ৰহণ কৰিয়েই লগে লগে শুই পৰা অভ্যাস অথবা অতিমাত্ৰা মানসিক চাপে আমাৰ পাচনতন্ত্ৰত বিৰূপ প্ৰভাৱ পেলায়।
এই অস্বস্তিকৰ পৰিস্থিতিৰ পৰা পৰিত্ৰাণ পাবলৈ আমি কিছুমান ফলপ্ৰসূ ঘৰুৱা উপায় অৱলম্বন কৰিব পাৰোঁ। উদাহৰণস্বৰূপ, আদা গেছৰ বাবে এক মহৌষধ হিচাপে পৰিগণিত হয়, সেয়েহে আহাৰৰ পিছত অলপ কেঁচা আদা নিমখৰ সৈতে চোবাই খালে বা আদা চাহ খালে যথেষ্ট উপকাৰ পোৱা যায়। একেদৰে এগিলাচ পানীত এচামুচ জিৰা উতলাই সেই পানী কুহুমীয়া অৱস্থাত খালে অথবা আহাৰৰ পিছত নিয়মীয়াকৈ মৌৰী চোবাই খালেও হজম শক্তি বৃদ্ধি পায়। পেট ফুলা বা গেছৰ তীব্ৰতা হ্ৰাস কৰিবলৈ নেমুৰ ৰস আৰু অলপ বেকিং চোডা মিহলাই খোৱাটোও এক কাৰ্যকৰী পদ্ধতি।
তদুপৰি সদায় ৰাতিপুৱা খালী পেটত এগিলাচ কুহুমীয়া পানী খোৱাৰ অভ্যাস কৰিলে পেট পৰিষ্কাৰ হয়।কেৱল ঘৰুৱা প্ৰতিকাৰতে ক্ষান্ত নাথাকি জীৱনশৈলীৰ কিছু পৰিৱৰ্তন কৰিলেহে এই সমস্যাৰ পৰা স্থায়ী মুক্তি লাভ কৰিব পাৰি। আহাৰ গ্ৰহণ কৰোঁতে সদায় লাহে লাহে আৰু ভালদৰে চোবাই খোৱা উচিত যাতে লালটিয়ে হজম প্ৰক্ৰিয়াত সহায় কৰিব পাৰে।
নিশাৰ আহাৰ সদায় শুবলৈ যোৱাৰ অন্তত ২-৩ ঘণ্টা আগতে গ্ৰহণ কৰিব লাগে আৰু খোৱাৰ পিছত ১০-১৫ মিনিট খোজ কঢ়াৰ অভ্যাস কৰিব লাগে। নিয়মীয়া যোগাসন আৰু শাৰীৰিক পৰিশ্ৰমে পেটৰ পেশী মজবুত কৰাত সহায় কৰে। অৱশ্যে এই সমস্যাটো যদি দীৰ্ঘদিন ধৰি চলি থাকে বা বুকুৰ বিষৰ দৰে লক্ষণ দেখা দিয়ে, তেন্তে পলম নকৰি বিশেষজ্ঞ চিকিৎসকৰ পৰামৰ্শ লোৱাটো অত্যন্ত প্ৰয়োজনীয়।
