জানুৱাৰী মাহৰ শেষ সপ্তাহত দেশজুৰি বেংক সেৱা ব্যাহত হোৱাৰ সম্ভাৱনা দেখা দিছে। গণতন্ত্ৰ দিৱসৰ লগতে সাপ্তাহিক বন্ধ আৰু বেংক কৰ্মচাৰীসকলৰ ধৰ্মঘটৰ ফলত একেৰাহে তিনিদিন ধৰি বেংক বন্ধ থাকিব পাৰে। সপ্তাহত পাঁচ দিন কাম কৰাৰ দাবীত বেংক ইউনিয়নসমূহে এই ধৰ্মঘটৰ আহ্বান জনাইছে।
উল্লেখ্য যে, ২৩ জানুৱাৰী শুকুৰবাৰে নেতাজীৰ জন্মজয়ন্তী উপলক্ষে বেংক বন্ধ আছিল। শনিবাৰে বেংক খোলাৰ পাছত ২৫ জানুৱাৰী দেওবাৰে পুনৰ বন্ধ। তাৰ পাছদিনা অৰ্থাৎ ২৬ জানুৱাৰী সোমবাৰে গণতন্ত্ৰ দিৱস উপলক্ষে বেংক বন্ধ থাকিব। আনহাতে, ২৭ জানুৱাৰী মঙলবাৰে বেংক কৰ্মচাৰীসকলে ধৰ্মঘট ঘোষণা কৰিছে।
সংবাদ সংস্থা পিটিআইৰ তথ্য অনুসৰি, ২০২৪ চনৰ মাৰ্চ মাহত ‘ইণ্ডিয়ান বেংকছ এছ’চিয়েশ্যন’ (IBA) আৰু ‘ইউনাইটেড ফ’ৰাম অফ বেংক ইউনিয়নছ’ৰ (UFBU) মাজত দৰমহা পৰ্যালোচনা সম্পৰ্কীয় এক চুক্তি স্বাক্ষৰিত হৈছিল। সেই চুক্তিত দুয়োপক্ষই একমত হৈছিল যে প্ৰতিটো শনিবাৰেই বেংক বন্ধ থাকিব। কিন্তু এতিয়ালৈকে সেই সিদ্ধান্ত কাৰ্যকৰী হোৱা নাই। ইয়াৰ প্ৰতিবাদতে কৰ্মচাৰীসকলে ধৰ্মঘটৰ আহ্বান জনাইছে।
ইতিমধ্যে ব্যক্তিগত খণ্ডৰ বেংকসমূহে গ্ৰাহকসকলক জনাই দিছে যে ধৰ্মঘট হ’লে তেওঁলোক অসুবিধাৰ সন্মুখীন হ’ব পাৰে। ইউএফবিইউৱে ধৰ্মঘটৰ কথা ঘোষণা কৰাৰ পাছত বুধবাৰ আৰু বৃহস্পতিবাৰে মুখ্য শ্ৰম আয়ুক্তৰ সৈতে বৈঠকত বহিছিল যদিও কোনো সমাধান সূত্ৰ নোলাল। সূত্ৰৰ খবৰ অনুসৰি, শনিবাৰে সন্ধিয়া ইউনিয়নৰ তৰফৰ পৰা জনোৱা হৈছে যে মঙলবাৰে ধৰ্মঘট হোৱাটো নিশ্চিত।
ধৰ্মঘট হ’লে পঞ্জাব নেচনেল বেংক, ষ্টেট বেংক অফ ইণ্ডিয়া, বেংক অফ ইণ্ডিয়া আৰু বেংক অফ বৰোদাৰ দৰে ৰাজহুৱা খণ্ডৰ বেংকসমূহৰ কাম-কাজ সম্পূৰ্ণ বন্ধ থাকিব। বৰ্তমান মাহৰ দ্বিতীয় আৰু চতুৰ্থ শনিবাৰে বেংক বন্ধ থাকে। ইউনিয়নৰ দাবী অনুসৰি, যদি প্ৰতি শনিবাৰে ছুটী দিয়া হয়, তেন্তে কৰ্মচাৰীসকলে সপ্তাহৰ বাকী পাঁচটা দিনত অতিৰিক্ত ৪০ মিনিটকৈ কাম কৰিবলৈ সাজু, যাতে গ্ৰাহকৰ অসুবিধা নহয়। তেওঁলোকে লগতে কয় যে ৰিজাৰ্ভ বেংক (RBI), এলআইচি (LIC), ষ্টক এক্সচেঞ্জ আৰু চৰকাৰী কাৰ্যালয়সমূহতো বৰ্তমান সপ্তাহত পাঁচদিনহে কাম হয়।
