ৰাজস্থানৰ আজমেৰত ফুৰিবলৈ আহি এতিয়া তীব্ৰ বিপদৰ সন্মুখীন হৈছে দুজন ব্ৰিটিছ নাগৰিক। পৰ্যটন ভিছা লৈ ভাৰতলৈ অহা এই বিদেশী নাগৰিক দুজনে ৰাজহুৱা স্থানত ইজৰাইল বিৰোধী আৰু পেলেষ্টাইনৰ সমৰ্থনত ষ্টীকাৰ লগাইছিল। এই কাৰ্যৰ বাবে তেওঁলোকক অতি সোনকালে ভাৰত ত্যাগ কৰিবলৈ চৰকাৰীভাৱে নিৰ্দেশ দিয়া হৈছে। এনডিটিভিৰ এক প্ৰতিবেদনত প্ৰকাশ পোৱা অনুসৰি ৰাজস্থান চোৰাংচোৱা বিভাগৰ তথ্যৰ ভিত্তিত আজমেৰ আৰক্ষীয়ে লুই গেব্ৰিয়েল ডি আৰু তেওঁৰ সংগী অনুশী এমা ক্ৰীষ্টিনৰ বিৰুদ্ধে এই কঠোৰ ব্যৱস্থা গ্ৰহণ কৰিছে।
যোৱা ২১ জানুৱাৰীত চোৰাংচোৱা বিভাগে প্ৰথম খবৰ পাইছিল যে এহাল বিদেশী দম্পতীয়ে চহৰখনৰ বিভিন্ন ঠাইত আপত্তিজনক ষ্টীকাৰ লগাই ফুৰিছে। ইয়াৰ পিছতে আৰক্ষীয়ে চিচিটিভি ফুটেজ পৰীক্ষা কৰি আৰু স্থানীয় লোকৰ পৰা তথ্য সংগ্ৰহ কৰি তেওঁলোকক চিনাক্ত কৰে। আৰক্ষীয়ে ইতিমধ্যে সেই ষ্টীকাৰসমূহ আঁতৰাই পেলাইছে আৰু ব্ৰিটিছ নাগৰিক দুজনক আটক কৰি দীৰ্ঘসময় ধৰি জেৰা কৰে। অতিৰিক্ত আৰক্ষী অধীক্ষক ৰাজেশ মীনাৰ নেতৃত্বত চলা এই জেৰাৰ অন্তত স্পষ্ট হয় যে তেওঁলোকে ভাৰতৰ ভিছা নিয়ম উলংঘা কৰিছে।
আৰক্ষী বিষয়াসকলৰ মতে পৰ্যটন ভিছাত ভাৰতলৈ আহি কোনো ধৰণৰ ৰাজনৈতিক কাৰ্যকলাপত লিপ্ত হোৱাটো আইনমতে নিষিদ্ধ। যিহেতু এই দুই ব্ৰিটিছ নাগৰিকে বিদেশত থাকিও ৰাজনৈতিক প্ৰচাৰ চলাইছিল, সেয়েহে ইমিগ্ৰেচন আৰু বিদেশী আইনৰ অধীনত তেওঁলোকৰ ভিছা বাতিল কৰা হৈছে। ইয়াৰ লগে লগে তেওঁলোকৰ হাতত ভাৰত ত্যাগ কৰাৰ জাননী তুলি দিয়া হৈছে। নিয়ম অনুসৰি তেওঁলোকে এতিয়া নিৰ্দিষ্ট সময়ৰ ভিতৰত নিজ দেশলৈ উভতি যাব লাগিব।
বিশেষ কথাটো হ’ল পেলেষ্টাইনৰ বৈদেশিক মন্ত্ৰী ভাৰ্চেন আঘাবেকিয়ান শ্বাহিনে নতুন দিল্লী ভ্ৰমণ কৰি যোৱাৰ মাত্ৰ কেইদিনমান পিছতে এই ঘটনাটো ঘটিছে। উল্লেখ্য যে যোৱা ২৯ জানুৱাৰীত বৈদেশিক মন্ত্ৰীগৰাকীয়ে ভাৰতক ইজৰাইল আৰু পেলেষ্টাইনৰ মাজত এজন দক্ষ মধ্যস্থতাকাৰী হিচাপে অভিহিত কৰিছিল। তেওঁ আশা প্ৰকাশ কৰিছিল যে ভাৰতে গাজাৰ পুনৰ্গঠনত সহায় কৰিব পাৰে। ভাৰতৰ সৈতে দুয়োখন দেশৰ বন্ধুত্ব থকাৰ পিছতো বিদেশী পৰ্যটকে দেশৰ মাটিত এনেদৰে ভিছাৰ নিয়ম ভংগ কৰা কাৰ্যক আৰক্ষীয়ে গুৰুত্বসহকাৰে লৈছে।
