হোজাই জিলাৰ কেন্দুগুৰী জনজাতীয় উচ্চ মাধ্যমিক বিদ্যালয়ৰ এগৰাকী মহিলা শিক্ষয়িত্ৰীয়ে বিদ্যালয়খনৰ প্ৰধান শিক্ষকৰ বিৰুদ্ধে যৌন নিৰ্যাতন আৰু স্বামীক শাৰীৰিকভাৱে আক্ৰমণ কৰাৰ এক চাঞ্চল্যকৰ অভিযোগ উত্থাপন কৰিছে। প্ৰধান শিক্ষক ইন্দ্ৰপাল গোৱালাৰ বিৰুদ্ধে ইতিমধ্যে হোজাই আৰক্ষী থানাত এখন এজাহাৰ দাখিল কৰা হৈছে।
এজাহাৰখনৰ তথ্য অনুসৰি, ভাৰতী গুপ্তা নামৰ শিক্ষয়িত্ৰীগৰাকীয়ে যোৱা ২৪ ডিচেম্বৰ, ২০২৫ তাৰিখে বিদ্যালয়খনত যোগদান কৰিছিল। অভিযোগ উঠিছে যে যোগদানৰ দিনৰে পৰা প্ৰধান শিক্ষক ইন্দ্ৰপাল গোৱালাই কোনো চৰকাৰী কাম নোহোৱাকৈয়ে তেওঁক বাৰে বাৰে ফোন আৰু বাৰ্তা প্ৰেৰণ কৰি মানসিক নিৰ্যাতন চলাই আহিছিল। ইয়াৰ উপৰি প্ৰধান শিক্ষকজনে শিক্ষয়িত্ৰীগৰাকীক জোৰকৈ ঘৰত থৈ অহাৰ প্ৰস্তাৱ দিয়াৰ লগতে তেওঁৰ গতিবিধিৰ ওপৰত তীক্ষ্ণ নজৰ ৰখাৰ দৰে কাৰ্যত লিপ্ত হোৱাৰো গুৰুতৰ অভিযোগ উত্থাপিত হৈছে।
প্ৰাপ্ত খবৰ অনুসৰি, এই নিৰ্যাতনৰ ফলত শিক্ষয়িত্ৰীগৰাকী মানসিকভাৱে বিধ্বস্ত হৈ পৰিছিল। যোৱা ৩০ জানুৱাৰীত পৰিস্থিতি অধিক ভয়াৱহ হৈ পৰে। সেইদিনা শিক্ষয়িত্ৰীগৰাকীয়ে তেওঁৰ স্বামী অভিজিৎ দেৱক লগত লৈ প্ৰধান শিক্ষকজনৰ এনে আচৰণৰ সন্দৰ্ভত স্পষ্টীকৰণ বিচাৰি বিদ্যালয়লৈ গৈছিল।
এজাহাৰত উল্লেখ কৰা মতে, কথা-বতৰা চলি থকাৰ মাজতে প্ৰধান শিক্ষকজন হঠাৎ আক্ৰমণাত্মক হৈ পৰে আৰু শিক্ষয়িত্ৰীগৰাকীৰ স্বামীক শাৰীৰিকভাৱে প্ৰহাৰ কৰে। অভিযোগ অনুসৰি, প্ৰধান শিক্ষকজনে অভিজিৎ দেৱক মূৰ আৰু মুখত ঘোচা মৰাৰ লগতে কাৰ্যালয়ৰ পৰা চোঁচৰাই নি মাটিত বগৰাই দিয়ে। কেৱল এয়াই নহয়, সংঘৰ্ষৰ সময়ত অভিযুক্ত প্ৰধান শিক্ষকজনে শিক্ষয়িত্ৰীগৰাকীকো আক্ৰমণ কৰিবলৈ পিছে পিছে খেদি যোৱা বুলি জানিব পৰা গৈছে।
শিক্ষয়িত্ৰীগৰাকীয়ে জনোৱা মতে, তেওঁ এই নিৰ্যাতনৰ সন্দৰ্ভত যোৱা ৬ জানুৱাৰীত হোজাইৰ বিদ্যালয় পৰিদৰ্শক আৰু ৭ জানুৱাৰীত হোজাইৰ জিলা আয়ুক্তক লিখিত অভিযোগ দিছিল। কিন্তু পূৰ্বে অভিযোগ দিয়াৰ পাছতো সংশ্লিষ্ট কৰ্তৃপক্ষই কোনো ফলপ্ৰসূ ব্যৱস্থা গ্ৰহণ নকৰাৰ বাবেই ৩০ জানুৱাৰীত এনে অনাকাংক্ষিত পৰিস্থিতিৰ সৃষ্টি হোৱা বুলি ভুক্তভোগী পৰিয়ালটোৱে ক্ষোভ প্ৰকাশ কৰিছে।
হোজাই আৰক্ষীয়ে ইতিমধ্যে এজাহাৰখন গ্ৰহণ কৰি সমগ্ৰ ঘটনাৰ তদন্ত আৰম্ভ কৰিছে। কৰ্মৰত মহিলাৰ সুৰক্ষা আৰু মৰ্যাদাৰ প্ৰতি ভাবুকি কঢ়িয়াই অনা এই ঘটনাটোৱে জিলাখনৰ শৈক্ষিক মহলত তীব্ৰ প্ৰতিক্ৰিয়াৰ সৃষ্টি কৰিছে। তদন্তৰ ফলাফলৰ ওপৰত ভিত্তি কৰি অভিযুক্তৰ বিৰুদ্ধে পৰৱৰ্তী আইনী ব্যৱস্থা গ্ৰহণ কৰা হ’ব বুলি আৰক্ষীয়ে সদৰী কৰিছে।
