আমেৰিকাৰ দুৰ্ঘটনাত ভাৰতীয় যুৱতীৰ মৃত্যু। প্ৰায় তিনি বছৰীয়া যুঁজৰ অন্তত অৱশেষত ন্যায় পালে মৃতকৰ পৰিয়ালে। আদালতৰ ৰায়দানত গাফিলতিৰ বাবে মৃতকৰ পৰিয়ালক ২৯ মিলিয়ন ডলাৰ ক্ষতিপূৰণ দিব আমেৰিকা প্ৰশাসনে।
উচ্চ শিক্ষাৰ সপোন লৈ আমেৰিকালৈ গৈছিল ভাৰতীয় যুৱতী জাহ্নৱী কাণ্ডুলা। নৰ্থ-ইষ্টাৰ্ণ ইউনিভাৰ্চিটিত ইনফৰ্মেশ্যন চিষ্টেমৰ স্নাতকোত্তৰ পাঠ্যক্ৰমত নামভৰ্তি কৰে। এদিন সন্ধিয়া ৰাস্তা পাৰ হৈ থকাৰ সময়ত আৰক্ষীৰ গাড়ীয়ে খুন্দা মাৰে। ২০২৩ চনৰ জানুৱাৰী মাহত আমেৰিকাৰ ছিয়াটলত সংঘটিত হৈছিল এই মৰ্মান্তিক দুৰ্ঘটনাটো।
আন্তঃৰাষ্ট্ৰীয় সংবাদ মাধ্যমৰ বাতৰি অনুসৰি এয়া কোনো সাধাৰণ পথ দুৰ্ঘটনা নাছিল। ২৩ বছৰীয়া যুৱতীগৰাকী স্বয়ং আইন ৰক্ষকৰ যান-বাহন আইন উলংঘাৰ বলি হৈছিল। আৰক্ষী বিষয়া কেভিন ডেভে চলোৱা এখন গাড়ীয়ে তেওঁক খুন্দা মাৰে। অভিযোগ অনুসৰি দুৰ্ঘটনা সংঘটিত হোৱা পথটোত গাড়ীখনৰ সৰ্বোচ্চ গতিবেগ প্ৰতি ঘণ্টাত ৪০ কিলোমিটাৰ হ’ব লাগিছিল। কিন্তু ডেভ সেই সময়ত ঘণ্টাত ১১৯ কিলোমিটাৰ বেগত চলাইছিল। তেতিয়াই দুৰ্ঘটনাটো সংঘটিত হয়।
সংবাদ সংস্থাৰ প্ৰতিবেদন অনুসৰি আৰক্ষী বিষয়াজনে এটা ঘটনাৰ খবৰ পাই দ্ৰুতগতিত গাড়ী চলাই আহিছিল। যদিও তেওঁ নিয়ম অনুসৰি চাইৰেন আৰু ইমাৰ্জেন্সি লাইট জ্বলাই গাড়ী চলাই আছিল, তথাপিও তেওঁ দেখা নাপাই ৰাস্তা পাৰ হোৱাৰ সময়ত জাহ্নৱীক খুন্দা মাৰে।
এই খুন্দাৰ ফলত ছাত্ৰীগৰাকী এশ ফুট দূৰলৈ ছিটিকি পৰে। থিতাতে তেওঁৰ মৃত্যু হয়। জনা যায় যে ছিয়াটল আৰক্ষীয়ে প্ৰথমে দুৰ্ঘটনাটোক ‘সাধাৰণ’ যেন দেখাবলৈ চেষ্টা কৰিছিল। কেৱল সেয়াই নহয়, নিজৰ দোষ ঢাকিবলৈ তেওঁলোকে ছাত্ৰীগৰাকীৰ ওপৰত দুৰ্ঘটনাৰ দায়িত্ব জাপি দি কয় যে আৰক্ষীৰ গাড়ীখন নিয়ম অনুসৰি চলাই আহিছিল। কিন্তু পিছত তদন্তত প্ৰকৃত ঘটনাটো পোহৰলৈ আহে। সেইদিনা ঘটনাস্থলীত উপস্থিত থকা এজন বিষয়াৰ বডি কেমেৰাৰ ভিডিঅ’ৰ পৰাই এই ৰহস্যৰ কথা পোহৰলৈ আহিছে। আৰক্ষী প্ৰশাসনৰ এটা অংশই সামান্য পৰিমাণৰ ক্ষতিপূৰণ দি বিষয়টো নিষ্পত্তি কৰিব বিচাৰিছিল। কিন্তু প্ৰকৃত তদন্ত আৰম্ভ হৈছিল ভাৰতীয় কূটনীতিবিদৰ হস্তক্ষেপত।
আনহাতে, আৰক্ষী বিভাগে অভিযুক্ত বিষয়াজনক চাকৰিৰ পৰা বৰ্খাস্ত কৰিছে। ইয়াৰ উপৰিও তেওঁক ৫ হাজাৰ ডলাৰ জৰিমনা বিহা হৈছে। শুকুৰবাৰে কিং কাউন্টি চুপিৰিয়েৰ কোৰ্টত এই গোচৰৰ নিষ্পত্তি হয় আৰু ছিয়াটল চহৰ প্ৰশাসনে ২৬২ কোটি টকা ক্ষতিপূৰণ দিবলৈ নিৰ্দেশ দিয়ে।
বুধবাৰে ছিয়াটল চহৰৰ এটৰ্নী এৰিকা ইভান্সে কয় যে, “জাহ্নৱী কাণ্ডুলাৰ মৃত্যু এক মৰ্মান্তিক ঘটনা। আমি আশা কৰিছো যে এই আৰ্থিক ক্ষতিপূৰণ কাণ্ডুলা পৰিয়ালৰ বাবে কামত আহিব।”
