ভাৰতীয় নাগৰিক নিখিল গুপ্তাই নিউয়ৰ্কত খালিস্তানীপন্থী গুৰপতৱন্ত সিং পান্নুনক হত্যাৰ ষড়যন্ত্ৰৰ গোচৰত আমেৰিকাৰ আদালতত দোষ স্বীকাৰ কৰিছে। শুকুৰবাৰে আমেৰিকাৰ নিউয়ৰ্কৰ ছাউদাৰ্ণ ডিষ্ট্ৰিকৰ এটৰ্নীৰ কাৰ্যালয়ে এই তথ্য নিশ্চিত কৰে।
৫৪ বছৰীয়া গুপ্তাই মানহাটানৰ ফেডাৰেল আদালতত স্বীকাৰ কৰে যে ২০২৩ চনৰ মাজভাগত তেওঁ ভাড়াতীয়া হত্যাকাৰী বুলি ভবা এজন লোকক ১৫ হাজাৰ ডলাৰৰ অগ্ৰিম ধন দিছিল। ইয়াৰ উদ্দেশ্য আছিল নিউয়ৰ্কত বাস কৰা আৰু ভাৰতত নিষিদ্ধ সংগঠন ‘শিখছ ফৰ জাষ্টিছ’ৰ মুৰব্বী পান্নুনক হত্যা কৰা। যদিও তেওঁ প্ৰথমে অভিযোগ অস্বীকাৰ কৰিছিল।
আমেৰিকাৰ প্ৰচিকিউটৰ (চৰকাৰী অধিবক্তা) জে ক্লেটনে দাবী কৰে যে গুপ্তাই নিজৰ মত প্ৰকাশৰ স্বাধীনতাৰ অধিকাৰ প্ৰয়োগ কৰাৰ বাবে এজন আমেৰিকাৰ নাগৰিকক হত্যা কৰিব বিচাৰিছিল। তেওঁৰ বিৰুদ্ধে ভাড়াতীয়াকৈ হত্যা, হত্যাৰ ষড়যন্ত্ৰ আৰু ধন সৰবৰাহৰ ষড়যন্ত্ৰৰ তিনিটা অভিযোগ উত্থাপন হৈছে। সৰ্বোচ্চ শাস্তি ৪০ বছৰৰ কাৰাদণ্ড হ’ব পাৰে। ২৯ মে’ত ন্যায়াধীশ ভিক্টৰ মাৰোৱে শাস্তি ঘোষণা কৰিব ।
২০২৪ চনৰ জুন মাহত চেক গণৰাজ্যৰ পৰা প্ৰত্যাৰ্পণ কৰাৰ পিছত গুপ্তাক ব্ৰুকলিনত জামিন অবিহনে ৰখা হৈছে। আমেৰিকাৰ অভিযোগনামাত কোৱা হৈছে যে ‘চিচি-১’ নামেৰে চিনাক্ত কৰা এজন ব্যক্তি – পিছলৈ বিকাশ যাদৱ বুলি চিনাক্ত কৰা – তেওঁক এই পৰিকল্পনাৰ সৈতে জড়িত কৰিছিল। অভিযোগ অনুসৰি তেওঁ কেন্দ্ৰীয় সংৰক্ষিত আৰক্ষী বাহিনীৰ প্ৰাক্তন সদস্য আৰু সেই সময়ত ভাৰতৰ কেবিনেট সচিবালয়ত কৰ্মৰত আছিল। ২০২৪ চনৰ অক্টোবৰ মাহত আমেৰিকাৰ ন্যায় বিভাগেও যাদৱৰ বিৰুদ্ধে অভিযোগ উত্থাপন কৰিছিল।
চৰকাৰী অধিবক্তাসকলে দাবী কৰিছে যে গুপ্তাক এক লাখ ডলাৰৰ চুক্তিৰ অধীনত হত্যাৰ পৰিকল্পনা আগবঢ়াই নিবলৈ কোৱা হৈছিল আৰু তেওঁক ১৫ হাজাৰ ডলাৰৰ অগ্ৰিম ধন দিয়া হৈছিল। কিন্তু তেওঁ সহযোগী বুলি ভবা ব্যক্তিজন আচলতে আমেৰিকাৰ কৰ্তৃপক্ষৰ গোপন সূত্ৰ আছিল।
ভাৰত চৰকাৰে কয় যে এনে অভিযোগৰ গুৰুত্ব সহকাৰে চোৱাচিতা কৰিবলৈ এখন উচ্চ পৰ্যায়ৰ তদন্ত সমিতি গঠন কৰা হৈছিল। ২০২৫ চনৰ জানুৱাৰী মাহত গৃহ মন্ত্ৰালয়ে তদন্তত এজন ব্যক্তিৰ বিৰুদ্ধে আইনী ব্যৱস্থা গ্ৰহণৰ পৰামৰ্শ দিয়া বুলি প্ৰকাশ কৰিছিল।
