ভেলেণ্টাইন ডে’ৰ দিনাই নয়ডাত সংঘটিত হৈছে এক মৰ্মান্তিক ঘটনা। এখন গাড়ীৰ ভিতৰত উদ্ধাৰ হৈছে এক প্ৰেমিক যুগলৰ মৃতদেহ। প্ৰাৰম্ভিক আৰক্ষীৰ তদন্তত এই ঘটনাক আত্মহত্যা বুলি গণ্য কৰা হৈছে যদিও মৃত যুৱকজনৰ পৰিয়ালে দাবী কৰিছে যে এয়া হত্যাকাণ্ড। দুয়ো ভিন্ন জাতিৰ হোৱাৰ বাবেই হত্যা কৰা বুলি অভিযোগ উত্থাপন কৰিছে। ঘটনাটোক লৈ অঞ্চলজুৰি উত্তেজনা বিয়পি পৰিছে।
নয়দাৰ ছেক্টৰ ৩৯ থানা এলেকাত সংঘটিত হৈছে এই ঘটনা। মাজনিশা বন্দুকৰ গুলীৰ শব্দ শুনি স্থানীয় ৰাইজে স্থানীয় থানাত খবৰ দিয়ে। আৰক্ষী উপস্থিত হৈ এখন লক কৰা গাড়ীৰ ভিতৰৰ পৰা অচেতন অৱস্থাত দুজনক উদ্ধাৰ কৰে। অৱশ্যে তেওঁলোকক চিকিৎসালয়লৈ নিয়াৰ সময়ত চিকিৎসকে তেওঁলোকক মৃত ঘোষণা কৰে। মৃত দুজনৰ নাম ৰেখা (২৬) আৰু সুমিত (৩২)।
আৰক্ষীৰ সূত্ৰ অনুসৰি ৰেখা নয়ডাৰ ছেক্টৰ ৫৮ৰ বাসিন্দা আছিল আৰু সুমিত দিল্লীৰ ত্ৰিলোকপুৰীত বাস কৰিছিল। দুয়োজনেই আগদিনা ঘৰৰ পৰা ওলাই আহি আৰু ঘূৰি নাহিল। তেওঁলোকৰ পৰিয়ালে নিৰুদ্দেশৰ অভিযোগ দাখিল কৰে।
বিগত ১৫ বছৰ ধৰি দুয়োৰে সম্পৰ্ক আছিল আৰু দুয়োটা পৰিয়ালে এই কথা জানিছিল। আৰক্ষীয়ে দাবী কৰিছে যে গাড়ীখনৰ ভিতৰৰ পৰা লক কৰা আছিল আৰু সুমিতৰ হাতৰ পৰা এটা পিষ্টল উদ্ধাৰ হয়। ঘটনাস্থলীত উদ্ধাৰ হৈছে কাৰ্টিজো। দুয়োটা মৃতদেহ মৰণোত্তৰ পৰীক্ষাৰ বাবে প্ৰেৰণ কৰা হৈছে।
সূত্ৰৰ পৰা জানিব পৰা মতে, আত্মহত্যাৰ পূৰ্বে সুমিতে হোৱাটছএপত মেছেজ প্ৰেৰণ কৰিছিল। তাত তেওঁ লিখিছিল যে ১৫ বছৰীয়া সম্পৰ্কত তেওঁক প্ৰতাৰণা কৰাৰ বাবেই তেওঁ আত্মহত্যাৰ সিদ্ধান্ত লৈছে। তেওঁৰ বাৰ্তাৰ পৰা স্পষ্ট যে ৰেখাই আন ঠাইত বিয়া হোৱাৰ সিদ্ধান্ত লৈছিল, সেয়েহে তেওঁ এই পথটো বাছি লৈছে।
অৱশ্যে সুমিতৰ পৰিয়ালৰ দাবী সম্পূৰ্ণ বেলেগ। তেওঁলোকৰ অভিযোগ যে এই মৃত্যু আত্মহত্যা নহয়, পৰিকল্পিত হত্যাহে। লগতে দাবী কৰা হৈছে যে যিহেতু সুমিত বেলেগ জাতিৰ, গতিকে ৰেখাৰ পৰিয়ালৰ আপত্তি আছিল। কিন্তু সুমিতে মানি ল’বলৈ ইচ্ছুক নাছিল। সেয়ে দুয়োকে হত্যা কৰাৰ ষড়যন্ত্ৰ ৰচনা কৰে।
পৰিয়ালটোৰ অভিযোগক গুৰুত্বসহকাৰে লৈছে আৰক্ষীয়ে। ফৰেনছিক ৰিপৰ্ট, মোবাইল ডাটা, পৰিয়ালৰ বিবৃতি – সকলো দিশ পৰীক্ষা কৰি তদন্ত চলোৱা হৈছে।
