কাজিৰঙা ৰাষ্ট্ৰীয় উদ্যান আৰু ব্যাঘ্ৰ প্ৰকল্পত ১৫ ফেব্ৰুৱাৰী, দেওবাৰে দুপৰীয়া এক কৰুণ ঘটনা সংঘটিত হয়। উদ্যানখনৰ কৰ্তব্যৰত এজন বনৰক্ষী গঁড়ৰ আক্ৰমণত নিহত হোৱাৰ বিপৰীতে আন এজন বনকৰ্মী গুৰুতৰভাৱে আহত হয়।
প্ৰাপ্ত তথ্য অনুসৰি, দেওবাৰে দিনৰ প্ৰায় ১২ বজাত উদ্যানখনৰ কঁহৰা বনাঞ্চলৰ অন্তৰ্গত বৰডলনি কেম্পত এই ঘটনাটো সংঘটিত হয়। কৰ্তব্যৰত হোমগাৰ্ড চাহাবুদ্দিন আৰু আন এজন বনকৰ্মী ৰমেন বৰাই নিয়মীয়া তহল দি থকাৰ সময়তে এটা গঁড়ে হঠাৎ তেওঁলোকক আক্ৰমণ কৰে। গঁড়ৰ আক্ৰমণত চাহাবুদ্দিনে গুৰুতৰ আঘাত পায়। তেওঁক ততাতৈয়াকৈ কঁহৰা চিকিৎসালয়লৈ নিয়া হয় যদিও জৰুৰীকালীন চিকিৎসা চলি থকা অৱস্থাতে তেওঁ শেষ নিশ্বাস ত্যাগ কৰে।
একেটা ঘটনাতে আনগৰাকী বনকৰ্মী ৰমেন বৰাও আহত হয়। তেওঁক প্ৰথমতে প্ৰাথমিক চিকিৎসা প্ৰদান কৰা হয় যদিও উন্নত চিকিৎসাৰ বাবে যোৰহাট চিকিৎসা মহাবিদ্যালয় হাস্পতাললৈ (JMCH) প্ৰেৰণ কৰা হৈছে। বৰ্তমান তেওঁৰ অৱস্থা চিকিৎসাধীন বুলি জানিব পৰা গৈছে।
বন বিভাগে জনোৱা মতে, কৰ্তব্যৰত অৱস্থাত সংঘটিত হোৱা এই আক্ৰমণে বন্যপ্ৰাণী সুৰক্ষা আৰু সংৰক্ষণৰ কামত নিয়োজিত সন্মুখৰ শাৰীৰ বনকৰ্মীসকলে কেনেধৰণৰ বিপদসংকুল পৰিৱেশত কাম কৰিবলগীয়া হয়, তাক পুনৰ স্পষ্ট কৰি তুলিছে। বন বিভাগৰ উচ্চপদস্থ বিষয়াসকলে সমগ্ৰ ঘটনাৰ পৰিস্থিতি পৰ্যবেক্ষণ কৰি থকাৰ লগতে অধিক তথ্য সংগ্ৰহ কৰি আছে।
