অসম প্রদেশ কংগ্ৰেছৰ আভ্যন্তৰীণ বিবাদ এতিয়া তুংগত উঠিছে। বিশেষকৈ সাংসদ ৰকিবুল হুছেইনৰ বৰ্ধিত প্ৰভাৱক লৈ ক্ষোভৰ বহিঃপ্ৰকাশ এপচিচিৰ প্ৰাক্তন সভাপতি ভূপেন বৰাৰ। প্ৰত্যক্ষভাৱে নাম উল্লেখ নকৰিলেও ‘এপিচিচি(আৰ)’ বুলি সম্বোধন কৰি ৰকিবুল হুছেইনৰ বিৰুদ্ধে প্ৰচণ্ড ক্ষোভ প্ৰকাশ কৰিছে বৰাই।
সংবাদ মাধ্যমৰ আগত ভূপেন বৰাই অত্যন্ত তাৎপৰ্যপূৰ্ণভাৱে কয় যে, ‘‘এতিয়া কংগ্ৰেছত এপিচিচি নহয়, এপিচিচি(আৰ)হে চলিছে। মই আচল কংগ্ৰেছত থাকিবলৈ ৰাজী, কিন্তু এই বিশেষ ব্যক্তিৰ দ্বাৰা পৰিচালিত এপিচিচি(আৰ)ত নাথাকো।’’ তেওঁৰ মতে, দলটোৰ বহু জিলা কমিটীও এতিয়া এপিচিচি(আৰ)লৈ ৰূপান্তৰিত হৈছে।
নিজৰ স্পষ্টবাদিতাৰ কথা দোহাৰি বৰাই কয় যে তেওঁৰ সত্য কোৱাৰ দুঃসাহস আছে আৰু সেইবাবেই তেওঁ সতীৰ্থসকলক সজাগ কৰি দিছে। তেওঁ কয় যে বৰ্তমানৰ পৰিস্থিতিত কংগ্ৰেছত থাকিবলৈ হ’লে এজন বিশেষ ব্যক্তিৰ ইচ্ছানুসৰি চলিব লাগিব, যিটো তেওঁৰ বাবে সম্ভৱ নহয়। এগৰাকী শীৰ্ষ নেতাই পঠিওৱা মেছেজৰ উত্তৰত বৰাই ইংৰাজীতে লিখিছে— “You can love him, you can hate him, but you cannot ignore him. APCC is now APCC(R)।”
কংগ্ৰেছৰ বৰ্তমানৰ কাৰ্যপন্থাৰ ওপৰত বিষোদগাৰ প্ৰকাশ কৰি তেওঁ কয়, ‘‘ৰাজনীতিত ব্যক্তিগত, দলীয় আৰু দেশৰ স্বাৰ্থ থাকে। কিন্তু বৰ্তমান সকলো স্বাৰ্থ কেৱল এজন মানুহৰ মতে চলিছে। মই বুকু ফিন্দাই আৰু ৰাজহাড় পোন কৰি কথা কোৱা মানুহ, এনেকৈ কাৰোবাৰ তলতীয়া হৈ কাম কৰাৰ অভ্যাস মোৰ নাই।’’
ভৱিষ্যতৰ পৰিকল্পনা সন্দৰ্ভত বৰাই কয় যে তেওঁ হাজাৰ হাজাৰ শুভাকাংক্ষীৰ বাৰ্তা লাভ কৰিছে। বৰ্তমান তেওঁ এক মানসিক অন্তৰ্দ্বন্দ্বত ভুগি থকা বুলি স্বীকাৰ কৰিছে। তেওঁ কয়, ‘‘কংগ্ৰেছৰ বহু নিষ্ঠাৱান কৰ্মীয়ে দল এৰিব নিবিচাৰে, কিন্তু তেওঁলোকে ‘এপিচিচি(আৰ)’ গ্ৰহণ কৰিবলৈও সাজু নহয়। নিশালৈ শুভাকাংক্ষীসকলৰ সৈতে আলোচনা কৰি মই মোৰ চূড়ান্ত সিদ্ধান্ত জনাম।’’
মুখ্যমন্ত্ৰী ড° হিমন্ত বিশ্ব শৰ্মা তেওঁৰ ঘৰলৈ যোৱা প্ৰসংগত ভূপেন বৰাই কয় যে যিহেতু তেওঁ বৰ্তমান কোনো দলৰ সক্ৰিয় সদস্য হৈ থকা নাই, সেয়ে মুখ্যমন্ত্ৰী আহিলে আপত্তি কৰিবলগীয়া একো নাই। তেওঁলোকৰ মাজত পুৰণি বন্ধুত্ব থকাৰ কথা সোঁৱৰাই দি তেওঁ কয় যে ৰাজনৈতিক পাৰ্থক্য কেৱল ২০১৫ চনৰ পৰাহে আৰম্ভ হৈছিল।
উল্লেখ্য যে আজি সন্ধিয়া মুখ্যমন্ত্ৰী হিমন্ত বিশ্ব শৰ্মা ভূপেন বৰাৰ বাসগৃহলৈ যোৱাৰ কথা আছে। ইয়াৰ পাছতে বৰাই দলত্যাগ কৰি গেৰুৱা বসন পিন্ধিব নেকি, তাক লৈ ৰাজ্যজুৰি তীব্ৰ চৰ্চা আৰম্ভ হৈছে।
