মুখ্যমন্ত্ৰী হিমন্ত বিশ্ব শৰ্মাৰ বিৰুদ্ধে আজি গুৱাহাটী উচ্চ ন্যায়ালয়ত এখন ৰাজহুৱা স্বাৰ্থজড়িত আবেদন দাখিল কৰা হয়। বিশিষ্ট বুদ্ধিজীৱী ড০ হীৰেন গোহাঁই, অসম আৰক্ষীৰ প্ৰাক্তন সঞ্চালক প্ৰধান তথা বিশিষ্ট কবি হৰেকৃষ্ণ ডেকা আৰু নৰ্থইষ্ট নাওৰ মুখ্য সম্পাদক পৰেশ মালাকাৰে যুটীয়াভাৱে এই আবেদন দাখিল কৰে। তিনিওজন বিশিষ্ট ব্যক্তিৰ লগতে চি পি আই (এম) আৰু চি পি আই-এ মুখ্যমন্ত্ৰীগৰাকীয়ে বিভিন্ন সময়ত প্ৰদান কৰা বিতৰ্কিত আৰু সাম্প্ৰদায়িক মন্তব্যৰ বিৰুদ্ধে আন এখন আবেদন ২১ ফেব্ৰুৱাৰীত গুৱাহাটী উচ্চ ন্যায়ালয়ত দাখিল কৰিছিল বুলি জানিব পৰা গৈছে। চি পি আই (এম) আৰু চি পি আই-এ দাখিল কৰা এই আবেদনখনৰ শুনানি ২৫ ফেব্ৰুৱাৰী অৰ্থাৎ কাইলৈ গ্ৰহণ কৰা হ’ব।
ইয়াৰ পূৰ্বে এই আবেদনকাৰীত্ৰয়ে অধিবক্তা শান্তনু বৰঠাকুৰৰ সৈতে উচ্চতম ন্যায়ালয়ৰ দ্বাৰস্থ হৈছিল। ষোল্ল ফেব্ৰুৱাৰীত দেশৰ সৰ্বোচ্চ ন্যায়ালয়ৰ মুখ্য ন্যায়াধীশ সূৰ্য কান্ত, ন্যায়াধীশ জয়মাল্য বাগচী আৰু ন্যায়াধীশ বিপুল পাঞ্চোলীৰ বিচাৰপীঠে এই আবেদনৰ শুনানি গ্ৰহণ কৰিছিল। শুনানিকালত উচ্চতম ন্যায়ালয়ে আবেদনকাৰীসকলক পোনপটীয়াকৈ সৰ্বোচ্চ ন্যায়ালয়লৈ অহাৰ পৰিৱৰ্তে উচ্চ ন্যায়ালয়ৰ দ্বাৰস্থ হ’বলৈ পৰামৰ্শ দিয়ে। উচ্চ ন্যায়ালয়ৰ ক্ষমতা আৰু মৰ্যাদাৰ প্ৰতি লক্ষ্য ৰাখি আবেদনকাৰীসকলক গুৱাহাটী উচ্চ ন্যায়ালয়ৰ ওচৰত আবেদন জনাবলৈ পৰামৰ্শ দিয়াৰ পাছতে আজি এই নতুন আবেদনখন দাখিল কৰা হয়।
আবেদনকাৰীসকলৰ অভিযোগ অনুসৰি মুখ্যমন্ত্ৰী হিমন্ত বিশ্ব শৰ্মাই লক্ষ্য কৰি লোৱা ‘মিঞা’ মুছলমান বিৰোধী মন্তব্যই সমাজত বিভাজন আনিব পাৰে। বিশেষকৈ শেহতীয়াকৈ অসম প্ৰদেশ বিজেপিৰ সামাজিক মাধ্যমৰ হেণ্ডেলত প্ৰকাশ পোৱা এটা বিতৰ্কিত ভিডিঅ’ৰ প্ৰসংগ আবেদনখনত উত্থাপন কৰা হৈছে য’ত এজন ব্যক্তিক গুলীওৱাৰ দৃশ্য দেখুওৱা হৈছিল। উচ্চতম ন্যায়ালয়ৰ শুনানিত আবেদনকাৰীৰ হৈ জ্যেষ্ঠ অধিবক্তা অভিষেক মনু সিংভী আৰু নিজাম পাছাই আদালতত যুক্তি দিছিল যে এজন দায়িত্বশীল মুখ্যমন্ত্ৰীৰ মুখত এনে ভাষ্য শোভা নাপায় আৰু ইয়াৰ বিৰুদ্ধে এটা বিশেষ তদন্তকাৰী দল গঠন কৰিব লাগে।
উচ্চতম ন্যায়ালয়ৰ নিৰ্দেশনাৰ পাছত এতিয়া সমগ্ৰ গোচৰটো গুৱাহাটী উচ্চ ন্যায়ালয়ত দাখিল কৰা হৈছে। উল্লেখ্য যে, উচ্চতম ন্যায়ালয়ে ১৬ ফেব্ৰুৱাৰীৰ শুনানিত জনাইছিল যে এইটো এটা অত্যন্ত স্পৰ্শকাতৰ বিষয় আৰু ইয়াৰ দ্ৰুত শুনানি গ্ৰহণৰ বাবে আবেদনকাৰীসকলে উচ্চ ন্যায়ালয়ক অনুৰোধ জনাব লাগে। বৰ্তমানলৈকে এই সন্দৰ্ভত কোনো এফ আই আৰ পঞ্জীয়ন নোহোৱাৰ বিষয়টো উচ্চ ন্যায়ালয়েই চালি-জাৰি চাব বুলি সৰ্বোচ্চ ন্যায়ালয়ে ১৬ ফেব্ৰুৱাৰীৰ শুনানিৰ অন্ত পেলায়।
