তেওঁৰ বয়স মাত্ৰ ১৪ বছৰ। স্কুলৰ বেঞ্চ, নেট প্ৰেকটিছ আৰু বয়সভিত্তিক ক্ৰিকেটেই বৈভৱ সূৰ্য্যবংশীৰ জগত হৈ পৰিছে।
আইনৰ দৃষ্টিত তেওঁৰ বয়স এতিয়াও গাড়ীৰ ষ্টিয়াৰিং ধৰিব পৰা হোৱা নাই, ড্ৰাইভিং লাইচেন্স ল’বলৈ তেওঁৰ নূন্যতম বয়স পূৰণ কৰিবলৈ এতিয়াও চাৰি বছৰ বাকী আছে। কিন্তু ক্ৰিকেট খেলপথাৰত ধুমুহাৰ সৃষ্টি কৰা সূৰ্যবংশীৰ জীৱনৰ গতিয়ে যেন বয়সৰ কেলেণ্ডাৰ অনুসৰণ নকৰে।
যি বয়সত বহুতে চাইকেলৰ পৰা মটৰবাইকত উঠাৰ সপোন দেখে, সেই বয়সত সূৰ্যবংশী দুখন বিলাসী গাড়ীৰ মালিক হৈ পৰিছে। যিহেতু তেওঁৰ ড্ৰাইভিং লাইচেন্স নাই, গতিকে ষ্টিয়াৰিঙৰ পিছফালে বহিবলৈ সুযোগ নাপায়। কিন্তু তাতে কি হ’ল! গাড়ীৰ মালিক হ’বলৈ অনুজ্ঞাপত্ৰৰ প্ৰয়োজন নাই। খেলপথাৰত নিজৰ বেটেৰে বিপক্ষৰ বলাৰক চাপত পেলাইছে, খেলপথাৰৰ বাহিৰতো সূৰ্যবংশীৰ সফলতাৰ পুৰস্কাৰ হিচাপে ধৰা দিছে চাৰিচকীয়া বাহনত।
২০২৫ চনৰ আই পি এলত ‘ছুপাৰ ষ্ট্ৰাইকাৰ অৱ দ্য ছিজন’ বঁটা লাভ কৰা সূৰ্যবংশীয়ে ৰাজস্থান ৰয়েলছৰ হৈ ২০৬.৬০ ষ্ট্ৰাইক ৰেটত ২৫২ ৰান সংগ্ৰহ কৰি কমেও ১০০টা বল খেলা বেটছমেনৰ ভিতৰত সৰ্বাধিক ৰান সংগ্ৰহ কৰে। ইয়াৰ পুৰস্কাৰ হিচাপে সূৰ্যবংশীয়ে লাভ কৰে টাটা মটৰ্ছৰ পৰা এখন নতুন বগা ৰঙৰ এছ ইউ ভি। এইখন তেওঁৰ দ্বিতীয়খন গাড়ী।
ইয়াৰ পূৰ্বে ৰাজস্থান ৰয়েলছৰ স্বত্বাধিকাৰী ৰঞ্জিত বৰঠাকুৰে সূৰ্যবংশীক এখন মাৰ্চিডিজ বেঞ্জ উপহাৰ দিছিল। ছাৱাই মানসিং ষ্টেডিয়ামত গুজৰাট টাইটানছৰ বিৰুদ্ধে মাত্ৰ ৩৫টা বলত শতক অৰ্জন কৰি তেওঁ এই উপহাৰ লাভ কৰে। আই পি এলৰ ইতিহাসত এইটো আছিল কোনো ভাৰতীয়ৰ দ্ৰুততম শতক আৰু টুৰ্ণামেণ্টৰ দ্বিতীয় দ্ৰুততম শতক।
বুধবাৰে পাটনাত দ্বিতীয়খন গাড়ী গ্ৰহণ কৰাৰ সময়তে সূৰ্যবংশীয়ে গাড়ীৰ চাবি মাকৰ হাতত গতাই দিয়ে। বাওঁহতীয়া অ’পেনাৰগৰাকীয়ে সেই সময়ত আৱেগিক হৈ কৈছিল, “এইটোৱেই মোৰ মাক দিয়া প্ৰথম উপহাৰ।”
সূৰ্যবংশীয়ে ৫০ লাখ টকাৰ নগদ পুৰস্কাৰো লাভ কৰে। ৬ ফেব্ৰুৱাৰীত সমাপ্ত হোৱা ১৯ বছৰ অনুৰ্ধ বিশ্বকাপত ভাৰতে জয়লাভ কৰিছিল, য’ত সূৰ্যবংশীৰ এক বিশেষ ভূমিকা আছিল। ফাইনেলত এক বিস্ফোৰক শতক অৰ্জন কৰাৰ লগতে ৪৩৯ ৰানেৰে টুৰ্নামেন্টৰ শ্ৰেষ্ঠ খেলুৱৈৰ সন্মানো লাভ কৰে। এই কৃতিত্বৰ বাবে বিহাৰৰ মুখ্যমন্ত্ৰী নীতিশ কুমাৰে ৫০ লাখ টকাৰ নগদ পুৰস্কাৰ প্ৰদান কৰে।
