আবকাৰী নীতিৰ দুৰ্নীতিৰ গোচৰত সকাহ লাভ কৰিছে আপৰ মুৰব্বী অৰবিন্দ কেজৰিৱালে। ইয়াৰ পিছতে দেওবাৰে দিল্লীৰ যন্তৰ মন্তৰত দলৰ বৃহৎ সমাৱেশত যোগদান কৰে। আইনী সকাহ পোৱাৰ পিছত এইখনেই আছিল তেওঁৰ প্ৰথম বৃহৎ ৰাজহুৱা সভা।
দলীয় সমাৱেশৰ পৰা প্ৰধানমন্ত্ৰী নৰেন্দ্ৰ মোডী আৰু কেন্দ্ৰীয় গৃহমন্ত্ৰী অমিত শ্বাহক লক্ষ্য কৰি লয় দিল্লীৰ প্ৰাক্তন মুখ্যমন্ত্ৰীগৰাকীয়ে। তেওঁ দাবী কৰে যে, ‘বিজেপিক ক্ষমতাৰ পৰা আঁতৰোৱাৰ কাউণ্টডাউন আৰম্ভ হৈছে।’
তেওঁ অভিযোগ কৰে যে প্ৰধানমন্ত্ৰী আৰু গৃহমন্ত্ৰীয়ে আবকাৰী নীতিৰ গোচৰত তেওঁক ফঁচোৱাৰ ষড়যন্ত্ৰ কৰিছিল। সোণম ৱাংচুকক জেলত ভৰোৱাৰ বিৰুদ্ধেও সৰৱ হয় কেজৰিৱালে।
আপৰ মুৰব্বীগৰাকীয়ে অভিযোগ কৰে যে বিগত ১২ বছৰত বিজেপিৰ শাসনৰ অধীনত সমগ্ৰ দেশৰ স্বাস্থ্য আৰু শিক্ষা ব্যৱস্থাৰ পতন ঘটিছে। প্ৰধানমন্ত্ৰীৰ ‘উন্নত ভাৰত’ শ্লোগানক লৈ কেজৰিৱালে কয় যে মানুহে ‘ৰহনে লায়ক ভাৰত’ (বসবাসৰ উপযুক্ত ভাৰত) বিচাৰে।
দিল্লীৰ কথা উল্লেখ কৰি তেওঁ কয় যে বিজেপিৰ শাসনৰ এবছৰতে সমগ্ৰ চহৰখন ধ্বংস হৈছে। বেয়া বাট-পথ, প্ৰদূষিত পানী আৰু প্ৰদূষণৰ বাবে সাধাৰণ জনতা ক্ষতিগ্ৰস্ত হৈছে।
একে সময়তে তেওঁ ভোটাৰ তালিকাত হোৱা ষড়যন্ত্ৰৰ কথাও কয়। তেওঁ কয়, ‘মোডীজী, আপুনি ক্ষমতাৰ বাবে কাম কৰক। মই দেশৰ বাবে কাম কৰিম।’
২০১১ চনৰ ৪ এপ্ৰিলত যন্তৰ মন্তৰত সংঘটিত হোৱা আন্দোলনৰ কথা সোঁৱৰাই দি তেওঁ কয়, ‘সেইদিনা কংগ্ৰেছ যেনেকৈ আঁতৰিছিল, এইবাৰ বিজেপিৰ বিদায়ৰ সূচনা হৈছে।’
দেওবাৰে সমাৱেশত পঞ্জাৱৰ মুখ্যমন্ত্রী ভগৱন্ত মান, মনীষ চিছ’দিয়া, আপ নেতা আতিশী, সঞ্জয় সিং আৰু সৌৰভ ভৰদ্বাজেও ভাষণ দিয়ে৷
