কিদৰে নাৰীবিদ্বেষী মনোভাৱে কিশোৰসকলক চৰমপন্থাৰ দিশলৈ ঠেলি দিছে সেই সন্দৰ্ভত এক অতি উদ্বেগজনক তথ্য শেহতীয়া এক গৱেষণাত পোহৰলৈ আহিছে। আন্তঃৰাষ্ট্ৰীয় নাৰী দিৱসৰ দিনাই প্ৰকাশ পোৱা এই প্ৰতিবেদনে সমাজত নাৰীৰ প্ৰগতিৰ বিপৰীতে সৃষ্টি হোৱা এক নেতিবাচক প্ৰতিক্ৰিয়াৰ দিশটো আঙুলিয়াই দিছে। অষ্ট্ৰেলিয়াৰ প্ৰায় ২,৩০০ গৰাকী প্ৰাপ্তবয়স্ক আৰু ১,১০০ গৰাকী কিশোৰ-কিশোৰীৰ ওপৰত চলোৱা এই সমীক্ষাত দেখা গৈছে যে ক্ৰমান্বয়ে বাঢ়ি অহা নাৰীবিদ্বেষ কেৱল এক সামাজিক সমস্যাই নহয়, বৰঞ্চ ই হিংসাত্মক চৰমপন্থাৰ এক মুখ্য কাৰণ হৈ পৰিছে। বিশেষকৈ ১৩ ৰ পৰা ১৭ বছৰ বয়সৰ কিশোৰসকলৰ মাজত এনে মনোভাৱ অধিক ভয়াৱহ ৰূপত ধৰা দিছে।
প্ৰতিবেদনখনৰ আটাইতকৈ চাঞ্চল্যিক তথ্যটো হ’ল যে প্ৰায় ৪০ শতাংশ কিশোৰে বিশ্বাস কৰে যে মহিলাসকলে ঘৰুৱা হিংসা আৰু যৌন উৎপীড়নৰ দৰে গুৰুতৰ বিষয়ত মিছা কথা কয়। ইয়াৰ উপৰিও সমীক্ষাটোত দেখা গৈছে যে প্ৰায় ২৮ শতাংশ কিশোৰে নাৰীবাদৰ বিৰোধিতা কৰিবলৈ হিংসাৰ আশ্ৰয় লোৱাটো সঠিক বুলি ভাবে। গৱেষকসকলৰ মতে এই কিশোৰসকলে ধাৰণা কৰে যে নাৰীৰ অধিকাৰ বৃদ্ধি পোৱাৰ ফলত পুৰুষসকল বৈষম্যৰ চিকাৰ হৈছে আৰু তেওঁলোকৰ সামাজিক স্থিতি বিপদাপন্ন হৈ পৰিছে। ইণ্টাৰনেটৰ বিভিন্ন মাধ্যম আৰু অনলাইন গোটবোৰে কিশোৰসকলৰ এই অসন্তুষ্টিক ইন্ধন যোগাই তেওঁলোকৰ মনত নাৰীৰ প্ৰতি ঘৃণা ভাব গঢ়ি তুলিছে।
এই গৱেষণাত পোহৰলৈ অহা আন এক দিশ হ’ল যে কিশোৰসকলে নাৰীৰ বিৰুদ্ধে হিংসাক দুটা ভাগত বিভক্ত কৰিছে। কিছুসংখ্যক কিশোৰে ঘৰুৱা পৰিৱেশত নাৰীক নিয়ন্ত্ৰণ কৰিবলৈ হিংসা কৰাটো জায়েজ বুলি ভাবে, আনহাতে আন একাংশই ৰাজহুৱা ক্ষেত্ৰত নাৰীৰ স্বাধীনতা আৰু অধিকাৰ খৰ্ব কৰাৰ পোষকতা কৰে। তেওঁলোকৰ মতে বহু সময়ত নাৰীয়ে পুৰুষক ইমানেই অতিষ্ঠ কৰি তোলে যে পুৰুষে হিংসা কৰিবলৈ বাধ্য হয়। এনে ধৰণৰ চিন্তাধাৰাই সমাজত এক ভয়ানক বিভাজন সৃষ্টি কৰিছে য’ত পুৰুষ আৰু মহিলাক দুটা বিপৰীত মেৰু হিচাপে উপস্থাপন কৰা হৈছে।
গৱেষকসকলে সতৰ্ক কৰি দিছে যে নাৰীবিদ্বেষ কেৱল এটা ব্যক্তিগত মনোভাৱ নহয়, বৰঞ্চ ই ৰাষ্ট্ৰীয় নিৰাপত্তাৰ বাবেও এক প্ৰত্যাহ্বান হৈ পৰিব পাৰে। অনলাইন জগতত গঢ়ি উঠা নাৰীবিদ্বেষী গোটবোৰে কিশোৰসকলক এজন শত্ৰু বিচাৰি উলিয়াবলৈ শিকায় আৰু সেই শত্ৰু হিচাপে নাৰীক থিয় কৰোৱায়। ইয়াৰ ফলত কিশোৰসকল অতি সহজেই উগ্ৰবাদী আদৰ্শৰ প্ৰতি আকৰ্ষিত হয়। সমাজত বৃদ্ধি পোৱা এই হিংসাত্মক ধাৰা ৰোধ কৰিবলৈ শিক্ষা ব্যৱস্থাত আমূল পৰিৱৰ্তনৰ প্ৰয়োজন বুলি বিশেষজ্ঞসকলে মত পোষণ কৰিছে।
এই সমস্যাৰ সমাধান হিচাপে বিদ্যালয়সমূহত সামাজিক আৰু আৱেগিক দক্ষতা বৃদ্ধি কৰাৰ লগতে লিংগ সমতাৰ সঠিক শিক্ষা দিয়াৰ ওপৰত গুৰুত্ব আৰোপ কৰা হৈছে। মেলবৰ্ণ বিশ্ববিদ্যালয়ৰ গৱেষকসকলে ইতিমধ্যে এনে কিছুমান শিক্ষামূলক কাৰ্যসূচী প্ৰস্তুত কৰিছে যিয়ে কিশোৰসকলৰ মাজত সন্মান আৰু সমতাৰ ভাব জগাই তুলিব পাৰে। কেৱল নাৰীৰ সৱলীকৰণৰ কথা ক’লেই নহ’ব, বৰঞ্চ সমাজত শিপাই যোৱা এই বিদ্বেষ কেনেকৈ নিৰ্মূল কৰিব পাৰি সেইটোৱেই এতিয়া আটাইতকৈ ডাঙৰ প্ৰশ্ন হৈ পৰিছে। যদি সময় থাকোতেই এই দিশত পদক্ষেপ গ্ৰহণ কৰা নহয়, তেন্তে কিশোৰ প্ৰজন্ম এক ভয়ংকৰ চৰমপন্থাৰ দিশলৈ আগবাঢ়ি যোৱাৰ সম্ভাৱনা আছে।
