নাৰীৰ সমানাধিকাৰৰ দাবীত নাৰীয়ে দিৱস পালন কৰি থকাৰ অৰ্থ হল, নাৰী নিৰ্যাতিত। ব্যৱস্থাটো সলনি কৰাৰ প্ৰয়োজন অনুভৱ কৰিব পাৰিলেহে নাৰী দিৱস তাৎপৰ্যপূৰ্ণ হৈ উঠিব পাৰে। মনুবাদী সমাজ ব্যৱস্থাৰ আলোকত নাৰী দিৱস উদযাপন অৰ্থহীন। আম্বেদকাৰে মনুস্মৃতিক ৰাজহুৱাকৈ দাহন কৰিছিল।কাৰণ মনুস্মৃতিত মহিলাসকলক দাস হিচাবে জীয়াই থকাৰ বিভিন্ন বিধান দিয়া হৈছিল।
আম্বেদকাৰৰৰ মতে “সঁচা অৰ্থত প্রজাতন্ত্ৰ তেতিয়াহে সম্ভৱ হ’ব যেতিয়া মহিলাৰ অধিকাৰ সুনিশ্চিত হয়। নাৰীয়ে সমাজ আৰু পৰিয়ালত পুৰুষৰ সমান মর্যদা লাভ কৰিলেহে শিক্ষা আৰু আর্থিক ক্ষেত্ৰত নাৰী আগবাঢ়ি যাব পাৰিব।”
বিজ্ঞান মানসিকতাত বিশ্বাসী জৱাহৰলাল নেহেৰুৱে আম্বেদকাৰৰ প্ৰতি সমৰ্থন জনালেও ড° ৰাজেন্দ্ৰ প্ৰসাদৰ দৰে মহিলা বিৰোধী হিন্দু নেতাৰ প্ৰতিবাদৰ বাবে সংসদত এই বিল গৃহীত হ’ব নোৱাৰিলে। এই কথাত আম্বেদকাৰে ইমানেই দুখ পাইছিল যে তেওঁ নিজৰ অসন্তষ্টি প্রকাশ কৰিবলৈ পদত্যাগ পত্ৰ প্ৰেৰণ কৰিছিল। পিছত ১৯৫৫_১৯৫৬ চনত “HINDU CODE BILL” ৰ সংশোধন কৰি চাৰিখন আইনৰ ৰূপত পৃথকে পৃথকে গৃহীত কৰা হয়। এইদৰে মহিলাক পিতৃ আৰু স্বামীৰ সম্পত্তিৰ অংশিদাৰী প্ৰদান কৰা, তালাকৰ অধিকাৰ, সন্তান তুলি লোৱা অধিকাৰ পুনঃবিবাহ আৰু অসবৰ্ণ বিবাহ অধিকাৰ প্ৰদানৰ মাজেৰে আম্বেদকাৰে চাব বিচাৰিছিল সঁচা অৰ্থত এখন প্ৰগতিশীল ভাৰতবৰ্ষ।
ভাৰতৰ আইনমন্ত্ৰী হিচাপে ভীমৰাও আম্বেদকৰৰ ‘হিন্দু ক’ড বিল’ সম্পৰ্কত ভাৰতৰ প্ৰধানমন্ত্রী জৱাহৰলাল নেহৰুৱে কৈছিল- “হিন্দু ক’ড বিল’’ ৰাষ্ট্ৰৰ বিধানমণ্ডলৰ দ্বাৰা প্ৰণয়ন কৰা সকলোবিলাক বিধিৰ তুলনাত আটাইতকৈ মহত্বপূৰ্ণ। অৰ্থ আৰু মহত্বৰ দৃষ্টিকোণৰ পৰা এই বিল অতুলনীয়।” পিছে দুখৰ বিষয়। এইজন নেহেৰু সম্পৰ্কে আজিৰ শাসকে নানা অপপ্ৰচাৰ চলাই অহাৰ মূলতে নেহেৰুৰ প্ৰগতিশীল দৃষ্টিভংগী। আজিৰ নাৰী সমাজে এই কথাবোৰ বুজিব লাগিব।
