দেশজুৰি ৰন্ধন গেছ বা এলপিজি যোগানক লৈ বৰ্তমান কোনো ডাঙৰ সমস্যা নাই বুলি কেন্দ্ৰীয় চৰকাৰৰ সূত্ৰই স্পষ্ট কৰি দিছে। চৰকাৰী সূত্ৰৰ মতে দেশৰ কোনো প্ৰান্ততে ডিষ্ট্ৰিবিউটৰৰ ওচৰত ষ্টক শেষ হৈ যোৱা নাই আৰু সাধাৰণ ৰাইজৰ চাহিদা পূৰণ কৰিব পৰাকৈ পৰ্যাপ্ত পৰিমাণৰ এলপিজি চিলিন্ডাৰ মজুত আছে। চৰকাৰে জানিবলৈ দিছে যে ঘৰুৱা গ্ৰাহকসকলৰ চাহিদা পূৰণ কৰাটোৱেই তেওঁলোকৰ বাবে সৰ্বোচ্চ অগ্ৰাধিকাৰৰ বিষয়। সেই লক্ষ্যৰেই দেশৰ প্ৰতিটো প্ৰান্ততে যাতে অবিৰতভাৱে গেছ চিলিন্ডাৰ যোগান ধৰিব পৰা যায় তাৰ বাবে যাৱতীয় সকলো ব্যৱস্থা গ্ৰহণ কৰা হৈছে।
যোগান ব্যৱস্থা স্বাভাৱিক ৰখাৰ লগতে এলপিজি আৰু অন্যান্য ইন্ধনৰ ক’লা বজাৰ ৰোধ কৰিবলৈ চৰকাৰে বিশেষ নিৰীক্ষণৰ ব্যৱস্থা কৰিছে। কোনো ধৰণৰ ইন্ধন যাতে বেআইনীভাৱে বজাৰলৈ নাযায় তাৰ বাবে কঠোৰ পদক্ষেপ লোৱা হৈছে। ইফালে আন্তঃৰাষ্ট্ৰীয় পৰ্যায়ত ইৰাণ আৰু আমেৰিকাৰ মাজত চলি থকা সংঘাতৰ বাবে ইন্ধনৰ বজাৰত কিছু অস্থিৰতাৰ সৃষ্টি হৈছে যদিও ভাৰতত পেট্ৰ’ল আৰু ডিজেলৰ মূল্য সুস্থিৰ হৈ থকাৰ সম্ভাৱনা আছে। চৰকাৰী বিষয়াসকলে শেহতীয়াকৈ হোৱা গেছৰ মূল্য বৃদ্ধিক তেনেই সামান্য বুলিহে অভিহিত কৰিছে।
ভাৰতে বৰ্তমান ইন্ধনৰ বাবে আৰৱ দেশসমূহৰ ওপৰত নিৰ্ভৰশীলতা হ্ৰাস কৰাৰ চেষ্টা চলাইছে। পূৰ্বে ভাৰতৰ আমদানি কৰা তেল আৰু গেছৰ প্ৰায় ৬০ শতাংশ বিকল্প উৎসৰ পৰা আহিছিল যদিও বৰ্তমান সেই পৰিমাণ ৭০ শতাংশলৈ বৃদ্ধি কৰা হৈছে। ইয়াৰ দ্বাৰা হৰমুজ প্ৰণালীৰ ওপৰত নিৰ্ভৰশীলতা হ্ৰাস কৰি কোনো ভূ-ৰাজনৈতিক সংকটৰ সময়তো ইন্ধনৰ যোগান ব্যৱাহত নোহোৱাকৈ ৰখাৰ পৰিকল্পনা কৰা হৈছে। সম্ভাব্য যিকোনো সংকট মোকাবিলা কৰিবলৈ চৰকাৰে ইতিমধ্যে বিশেষ ‘ফুৱেল ছাপ্লাই মেনেজমেণ্ট চেইন’ কাৰ্যসূচী ৰূপায়ণ কৰিছে আৰু অতিৰিক্ত কেইবাখনো দেশৰ পৰা তেল আৰু গেছ আমদানি আৰম্ভ কৰিছে।
ইমানৰ পাছতো বিভিন্ন চহৰত গেছ চিলিন্ডাৰৰ দাম বৃদ্ধি আৰু বুকিং কৰিবলৈ পলম হোৱা খবৰ বিয়পি পৰাৰ লগে লগে সাধাৰণ ৰাইজৰ মাজত এক আতংকৰ সৃষ্টি হৈছে। বহু পৰিয়ালে বিকল্প হিচাপে ইলেকট্ৰিক কুকটপ বা ইণ্ডাকচন অভেন কিনিবলৈ ভিৰ কৰিছে। যাৰ ফলত বজাৰত ইণ্ডাকচনৰ চাহিদা অভাৱনীয়ভাৱে বৃদ্ধি পাইছে আৰু বহু ঠাইত ইয়াৰ নাটনি হোৱা বুলিও জানিব পৰা গৈছে। অৱশ্যে চৰকাৰে এইক্ষেত্ৰত কোনো ধৰণৰ উৰাবাতৰিত ভোল নাযাবলৈ আৰু আতংকিত নহ’বলৈ জনসাধাৰণক আহ্বান জনাইছে।
