দেশজুৰি বৃদ্ধি পোৱা ইন্ধন সংকট আৰু মধ্যপ্ৰাচ্যৰ উত্তপ্ত পৰিস্থিতিৰ মাজতে ইৰাণৰ ৰাষ্ট্ৰপতি ড০ মাসউদ পেজেশকিয়ানৰ সৈতে টেলিফোনিক বাৰ্তালাপত মিলিত হৈছে প্ৰধানমন্ত্ৰী নৰেন্দ্ৰ মোদী। বিশেষকৈ ইৰাণে হৰমুজ প্ৰণালী বন্ধ কৰি দিয়াৰ কঠোৰ সকীয়ানি আৰু ইয়াৰ ফলত ভাৰতত এলপিজি যোগানত দেখা দিয়া ব্যাঘাতৰ পৰিপ্ৰেক্ষিতত এই কথোপকথন অত্যন্ত গুৰুত্বপূৰ্ণ বিবেচিত হৈছে। বৃহস্পতিবাৰে নিশা প্ৰধানমন্ত্ৰীয়ে সামাজিক মাধ্যম এক্সত এটা পোষ্টৰ জৰিয়তে জানিবলৈ দিয়ে যে মধ্যপ্ৰাচ্যৰ বৰ্তমানৰ অস্থিৰ পৰিস্থিতি, সাধাৰণ জনতাৰ প্ৰাণহানি আৰু সম্পত্তিৰ ক্ষয়-ক্ষতিৰ সন্দৰ্ভত তেওঁ গভীৰ উদ্বেগ প্ৰকাশ কৰিছে। মোদীয়ে স্পষ্ট কৰি দিয়ে যে ভাৰতীয় নাগৰিকৰ নিৰাপত্তা নিশ্চিত কৰাৰ লগতে ইন্ধন আৰু সামগ্ৰীৰ বাধাহীন চলাচল বজাই ৰখাটোৱেই ভাৰতৰ সৰ্বোচ্চ অগ্ৰাধিকাৰ। তেওঁ এই জটিল সমস্যাৰ সমাধানৰ বাবে কোনো যুদ্ধ বা সংঘৰ্ষ নহয়, বৰঞ্চ আলোচনা আৰু কূটনৈতিক পথ অৱলম্বন কৰিবলৈহে আহ্বান জনায়।
আনহাতে, দেশত ইন্ধনৰ নাটনি হোৱাৰ আশংকাক নস্যাৎ কৰি কেন্দ্ৰীয় পেট্ৰ’লিয়াম আৰু প্ৰাকৃতিক গেছ মন্ত্ৰী হৰদীপ সিং পুৰীয়ে সংসদত এক আশ্বস্তকাৰী মন্তব্য আগবঢ়াইছে। মন্ত্ৰীগৰাকীয়ে জনায় যে ভাৰতত বৰ্তমান পৰ্যাপ্ত পৰিমাণৰ পেট্ৰ’ল, ডিজেল আৰু কেৰাচিন মজুত আছে, সেয়েহে জনসাধাৰণে চিন্তিত হোৱাৰ কোনো কাৰণ নাই। সমগ্ৰ দেশতে ইন্ধন যোগানৰ শৃংখল সম্পূৰ্ণ স্বাভাৱিকভাৱে চলি আছে বুলিও তেওঁ দাবী কৰে। এলপিজিৰ নাটনিৰ সন্দৰ্ভত উত্থাপিত প্ৰশ্নৰ উত্তৰ দি পুৰীয়ে কয় যে বিশ্বজুৰি ভূ-ৰাজনৈতিক উত্তেজনা বৃদ্ধি পালেও ভাৰতৰ ঘৰুৱা এলপিজি যোগান সম্পূৰ্ণ সুৰক্ষিত হৈ আছে। চৰকাৰে যোৱা কেইবছৰমানৰ পৰা কেৱল এটা নিৰ্দিষ্ট অঞ্চলৰ ওপৰত নিৰ্ভৰ নকৰি ইন্ধন আমদানিৰ উৎসসমূহ বিবিধ কৰি তুলিছে, যাৰ ফলত বিশ্ব বজাৰত অশোধিত তেলৰ মূল্য বৃদ্ধি পালেও ভাৰতত ইয়াৰ প্ৰভাৱ সীমিত হৈ থাকিব। চৰকাৰী বিষয়াসকলেও জানিবলৈ দিছে যে বিশ্বৰ ইন্ধন পৰিস্থিতিৰ ওপৰত চৰকাৰে তীক্ষ্ণ নজৰ ৰাখিছে আৰু দেশত অপ্ৰতিৰোধ্য যোগান নিশ্চিত কৰিবলৈ সকলো ধৰণৰ প্ৰয়োজনীয় পদক্ষেপ গ্ৰহণ কৰা হৈছে।
