মধ্যপ্ৰাচ্যত চলি থকা সংঘাতৰ মাজতে ইৰাণৰ শীৰ্ষ নেতৃত্বক কেন্দ্ৰ কৰি নতুন জল্পনা-কল্পনা বিয়পি পৰিছে। ইজৰাইল আৰু আমেৰিকাৰ বিমান আক্ৰমণত ইৰাণৰ প্ৰয়াত সৰ্বোচ্চ নেতা আলী খামেনেইৰ মৃত্যুৰ পিছত খবৰ বিয়পি পৰে যে তেওঁৰ পত্নী মনছুৰেহ খোজাষ্টেহ বাঘৰজাদেও এই আক্ৰমণত আহত হৈ মৃত্যুমুখত পৰিছে। অৱশ্যে এই দাবীক লৈ হোৱা বিতৰ্কত ইৰাণৰ এক সংবাদ মাধ্যমে নতুন তথ্য সদৰী কৰিছে। বৃহস্পতিবাৰে ইৰাণৰ অৰ্ধ চৰকাৰী সংবাদ মাধ্যমে খামেনেইৰ পত্নী জীয়াই থকা বুলি আৰু তেওঁৰ মৃত্যুৰ খবৰ সম্পূৰ্ণ ভুৱা বুলি প্ৰকাশ কৰে।
এই খবৰ প্রকাশ পোৱাৰ পাছতে আন্তর্জাতিক মহলত নতুন নতুন প্রশ্ন উত্থাপন হ’বলৈ ধৰিলে৷ কাৰণ, যুদ্ধৰ পিছত ইৰাণৰ কেইবাটাও চৰকাৰী সংবাদ মাধ্যমে দাবী কৰিছিল যে এই আক্ৰমণত খামেনেই আৰু তেওঁৰ পত্নীও নিহত হৈছিল। কিন্তু সেই দাবীক সম্পূৰ্ণভাৱে খাৰিজ কৰিছে ফাৰ্চ নিউজে, যিটো ইৰাণৰ প্ৰভাৱশালী সামৰিক সংগঠন ইছলামিক ৰিভল্যুচনেৰী গাৰ্ড কৰ্পছৰ ঘনিষ্ঠ বুলি জনা যায়।
এই বিতৰ্কত আন এটা গুৰুত্বপূৰ্ণ বিষয় চৰ্চালৈ আহিছে। ইৰাণৰ নতুন সৰ্বোচ্চ নেতা মোজতাবা খামেনেই প্ৰথম আনুষ্ঠানিক বিবৃতিত পিতৃৰ মৃত্যুৰ কথা কৈছিল যদিও মাতৃৰ কথা উল্লেখ কৰা নাছিল। এই মৌনতাই বিভিন্ন মহলত জল্পনা-কল্পনাৰ ইন্ধন যোগাইছে। বহুতে ধাৰণা কৰে যে যদি সঁচাকৈয়ে তেওঁৰ মাতৃক হত্যা কৰা হ’লহেঁতেন তেন্তে নতুন নেতাই তেওঁৰ বিবৃতিত সেই বিষয়টো উল্লেখ থাকিলেহেঁতেন।
উল্লেখ্য যে মধ্যপ্ৰাচ্যৰ যুদ্ধৰ আৰম্ভণিতে আমেৰিকা আৰু ইজৰাইল বাহিনীৰ যৌথ বিমান আক্ৰমণত ইৰাণৰ সৰ্বোচ্চ নেতা আলী খামেনেই নিহত হোৱা বুলি বিভিন্ন আন্তঃৰাষ্ট্ৰীয় প্ৰতিবেদনত দাবী কৰা হৈছিল। পিছৰ দিনকেইটাত বিভিন্ন সূত্ৰৰ পৰা জানিব পৰা মতে, সেই আক্ৰমণত তেওঁৰ পত্নীয়েও প্ৰাণ হেৰুৱাইছিল। অৱশ্যে শেহতীয়াকৈ ফাৰ্চ নিউজৰ প্ৰতিবেদনত উল্লেখ কৰা হৈছে যে মনছুৰেহ খোজাষ্টেহ বাঘৰজাদে সুস্থ আৰু তেওঁৰ মৃত্যুৰ খবৰ ভিত্তিহীন।
ইৰাণৰ এটা ধৰ্মীয় আৰু ৰক্ষণশীল পৰিয়ালত জন্মগ্ৰহণ কৰিছিল মনছুৰেহ খোজাষ্টেহৰ। তেওঁৰ দেউতাক আছিল দেশৰ এজন বিশিষ্ট ব্যৱসায়ী। ১৯৬৪ চনত যুৱ ধৰ্মগুৰু আলী খামেনেইৰ সৈতে বিবাহপাশত আবদ্ধ হয়। তেওঁলোকৰ ছটা সন্তান আছে— চাৰিজন পুত্ৰ আৰু দুগৰাকী কন্যা। পুত্ৰ মোজতাবা, মুস্তাফা, মাছৌদ, আৰু মাইছাম, আৰু কন্যা বোশ্ৰা আৰু হোদা। বৰ্তমান তেওঁলোকৰ ডাঙৰ পুত্ৰ মোজতাবা খামেনেই ইৰাণৰ নতুন সৰ্বোচ্চ নেতাৰ দায়িত্ব গ্ৰহণ কৰিছে।
