পৰিয়ালৰ সামান্য কন্দল যে ইমান ভয়ংকৰ হ’ব পাৰে, সেয়া কল্পনাও কৰিব পৰা নাছিল ওড়িশাৰ দেৱগড় জিলাৰ গৰিয়াপালি গাঁৱৰ বাসিন্দাসকলে। বুধবাৰে নিশা এগৰাকী বৃদ্ধৰ আক্ৰমণত প্ৰাণ হেৰুৱালে তেওঁৰ পত্নী, বোৱাৰী আৰু মাত্ৰ চাৰি বছৰীয়া নাতিনীয়ে। অভিযুক্ত পৰিয়ালৰ মুৰব্বী ৰমেশ গৰিয়াই এই কাণ্ড সংঘটিত কৰি বৰ্তমান পলাতক হৈ আছে।
আৰক্ষীৰ সূত্ৰ অনুসৰি, বুধবাৰে নিশা প্ৰায় ১১:৩০ বজাত ৰমেশৰ সৈতে তেওঁৰ পত্নী গুল গৰিয়াৰ তীব্ৰ তৰ্কাতৰ্কি হয়। পৰিস্থিতি বিষম হোৱা দেখি প্ৰাণৰ ভয়ত গুল দেৱীয়ে তেওঁৰ বোৱাৰী লিপি মহাকুলৰ কোঠাত আশ্ৰয় লৈছিল। কিন্তু তাতো তেওঁ ৰক্ষা নপৰিল। খঙৰ ভমকত জ্ঞান হেৰুৱাই ৰমেশে হাতুৰী লৈ সেই কোঠাত প্ৰৱেশ কৰে আৰু হাতুৰীৰ উপৰ্যুপৰি কোবত থিতাতে মৃত্যু হয় গুল আৰু লিপিৰ। ইয়াৰ পিছতে নিজৰ চাৰি বছৰীয়া নাতিনী ঈশাণীকো একেদৰেই আক্ৰমণ কৰি অভিযুক্ত বৃদ্ধজন পলাই যায়। পিছত ৰমেশৰ পুত্ৰ ধীৰেনে ঘৰলৈ আহি তিনিজনৰ মৃতদেহ পৰি থকা দেখি আৰক্ষীক খবৰ দিয়ে। দেৱগড়ৰ আৰক্ষী অধীক্ষক অনিল মিশ্ৰই জনোৱা মতে, পাৰিবাৰিক বিবাদৰ বাবেই এই আক্ৰমণ চলোৱা হৈছে বুলি প্ৰাথমিক তদন্তত ধৰা পৰিছে আৰু ফৰেনচিক দলে ঘটনাস্থলীৰ পৰা নমুনা সংগ্ৰহ কৰিছে।
আনহাতে, মহাৰাষ্ট্ৰৰ নাছিক জিলাতো পোহৰলৈ আহিছে এক নৃশংস হত্যাকাণ্ডৰ কাহিনী। এজন নিৰুদ্দিষ্ট যুৱকৰ মৃতদেহ উদ্ধাৰ হোৱাৰ পিছতেই উন্মোচিত হৈছে পৰকীয়া প্ৰেমৰ ভয়ংকৰ পৰিণতি। শাদাব ৰজ্জাক তাম্বোলি নামৰ এজন যুৱকক হত্যা কৰাৰ অভিযোগত তেওঁৰ পত্নী, পত্নীৰ প্ৰেমিক আৰু খুলশালিকক আৰক্ষীয়ে গ্ৰেপ্তাৰ কৰিছে। আৰক্ষীৰ মতে, প্ৰেমিকৰ সৈতে সংসাৰ কৰাৰ পথত স্বামীক হেঙাৰ বুলি গণ্য কৰিয়েই এই পৰিকল্পিত হত্যাকাণ্ড সংঘটিত কৰা হৈছিল।
যোৱা ১৮ ফেব্ৰুৱাৰীৰ পৰা নিখোজ হৈ থকা শাদাবৰ মৃতদেহ ২২ ফেব্ৰুৱাৰীত নাছিকৰ চান্দভাড় অঞ্চলৰ এখন নদীত ভাঁহি থকা অৱস্থাত উদ্ধাৰ কৰা হয়। হত্যাকাৰীয়ে প্ৰমাণ লুকুৱাবলৈ মৃতদেহটোৰ কঁকাল আৰু উৰুত গধুৰ ডাম্বেল বান্ধি দিছিল যাতে দেহটো পানীৰ ওপৰলৈ ভাঁহি নাহে। লগতে হাত-ভৰি নাইলনৰ ৰছীৰে বান্ধি দিয়া হৈছিল। তদন্তত পোহৰলৈ আহে যে শাদাবৰ পত্নী মুসকান তাম্বোলিৰ সৈতে ঋষভ বাৰ্মা নামৰ এজন যুৱকৰ প্ৰেমৰ সম্পৰ্ক আছিল।
এই ঘটনাত আৰক্ষীয়ে মুসকানসহ মুঠ সাতজন লোকক গ্ৰেপ্তাৰ কৰিছে আৰু তদন্ত অব্যাহত ৰাখিছে।
