ইৰাণৰ ৰাজনৈতিক পৰিস্থিতি সম্প্ৰতি অত্যন্ত উত্তপ্ত হৈ পৰিছে। শেহতীয়াকৈ এক বাতৰি অনুসৰি ইৰাণৰ নতুন উচ্চতম নেতা মোজতাবা খামেনেইৰ অৱস্থা অতি সংকটজনক। তেওঁ বৰ্তমান এখন হাস্পতালত ক’মাত আছে বুলি জানিব পৰা গৈছে। ব্ৰিটিছ সংবাদ মাধ্যম দ্য ছানৰ এক প্ৰতিবেদনত কোৱা হৈছে যে পিতৃ আয়াতুল্লাহ আলী খামেনেইৰ মৃত্যু হোৱা সেই ভয়াৱহ বিমান আক্ৰমণৰ সময়তে মোজতাবাও গুৰুতৰভাৱে আঘাতপ্ৰাপ্ত হৈছিল। এই আক্ৰমণত তেওঁৰ অন্ততঃ এখন ভৰি চিগি যোৱাৰ লগতে পেট আৰু যকৃততো গুৰুতৰ আঘাত পাইছে বুলি প্ৰতিবেদনত উল্লেখ কৰা হৈছে।
তেহৰাণৰ চিনা ইউনিভাৰ্চিটি হাস্পতালত অতি কটকটীয়া নিৰাপত্তাৰ মাজত তেওঁক চিকিৎসাধীন কৰি ৰখা হৈছে। হাস্পতালখনৰ যিটো কক্ষত তেওঁক ৰখা হৈছে, সেই অংশটো সম্পূৰ্ণৰূপে ছীল কৰি দিয়া হৈছে আৰু বাহিৰৰ লোকৰ প্ৰৱেশ নিষিদ্ধ কৰা হৈছে। ইৰাণৰ স্বাস্থ্য মন্ত্ৰী তথা অভিজ্ঞ ট্ৰমা চাৰ্জন মহম্মদ ৰেজা জাফাৰগাণ্ডীৰ তত্ত্বাৱধানত তেওঁৰ চিকিৎসা চলিছে। বাতৰি অনুসৰি, তেওঁৰ অৱস্থা অতি গুৰুতৰ হোৱাৰ বাবেই চৰকাৰী পক্ষই পৰিস্থিতিটো অতি গোপনে ৰখাৰ চেষ্টা চলাইছে।
ইফালে, দেশৰ শাসন ব্যৱস্থা যাতে অচল হৈ নপৰে, তাৰ বাবে ইৰাণৰ চৰকাৰী টেলিভিছনত মোজতাবাৰ নামত এক বিবৃতি পাঠ কৰা হৈছে। এই বিবৃতিটো নিজে নেতাগৰাকীয়ে পঢ়া নাই, বৰঞ্চ এজন সংবাদ এংকৰৰ জৰিয়তে প্ৰচাৰ কৰা হৈছে। বিবৃতিটোত ইৰাণে ইয়াৰ প্ৰতিশোধ ল’ব আৰু আঞ্চলিক জাহাজ চলাচলত বাধা দিব বুলি সকীয়নি দিয়া হৈছে। ইৰাণৰ সামৰিক বিশ্লেষকসকলৰ মতে, দেশখনৰ যুদ্ধ কৌশল বা সামৰিক অভিযানসমূহৰ বাবে এতিয়াও কোনো এজন সক্ৰিয় নেতাৰ প্ৰত্যক্ষ হস্তক্ষেপৰ প্ৰয়োজন নাই, কিয়নো পূৰ্বৰ নেতাই গঢ়ি থৈ যোৱা ব্যৱস্থাই স্বয়ংক্রিয়ভাৱে কাম কৰি আছে। অৱশ্যে, ইৰাণৰ ভিতৰচৰাত ইণ্টাৰনেটৰ ওপৰত লগোৱা নিষেধাজ্ঞাৰ বাবে এই খবৰবোৰৰ সত্যতা স্বতন্ত্ৰভাৱে প্ৰমাণ কৰা কঠিন হৈ পৰিছে।
