শৰীমালা মন্দিৰক লৈ দীৰ্ঘদিন ধৰি চলি থকা বিতৰ্কই এতিয়া এক নতুন মোৰ লৈছে। কেৰালাৰ বাওঁপন্থী গণতান্ত্ৰিক মৰ্চা চৰকাৰে পূৰ্বৰ স্থিতিৰ পৰা আঁতৰি আহি এক গুৰুত্বপূৰ্ণ সিদ্ধান্ত গ্ৰহণ কৰিছে। জানিব পৰা মতে চৰকাৰে এতিয়া উচ্চতম ন্যায়ালয়ত জনাব যে শৰীমালা মন্দিৰত ৫০ বছৰৰ তলৰ মহিলাৰ প্ৰৱেশ বন্ধ ৰখাটোৱেই উচিত যাতে মন্দিৰটোৰ পুৰণি ধৰ্মীয় পৰম্পৰা অক্ষুণ্ণ থাকে।
শুকুৰবাৰে মুখ্যমন্ত্রী পিনাৰায়ী বিজয়নৰ নেতৃত্বত অনুষ্ঠিত হোৱা এখন বিশেষ কেবিনেট বৈঠকত ত্ৰিবাঙ্কুৰ দেৱস্বম বৰ্ডৰ প্ৰস্তাৱক চৰকাৰে সমৰ্থন জনায়। উল্লেখ্য যে এই বৰ্ডখনেই শৰীমালা মন্দিৰৰ পৰিচালনাৰ দায়িত্বত আছে। তেওঁলোকৰ মতে ভগৱান আয়াপ্পাৰ মন্দিৰত ঋতুমতী মহিলাৰ প্ৰৱেশ নিষিদ্ধ কৰাটো এক প্ৰাচীন ৰীতি যিটো পালন কৰা দৰকাৰ।
চৰকাৰে জনাইছে যে অহা ১৪ মাৰ্চৰ ভিতৰত উচ্চতম ন্যায়ালয়ত এই সন্দৰ্ভত এখন শপতনামা দাখিল কৰা হ’ব। ন্যায়ালয়ে সাতটা নিৰ্দিষ্ট সাংবিধানিক আৰু আইনী প্ৰশ্নৰ ওপৰত ৰাজ্য চৰকাৰৰ মতামত বিচাৰিছিল। মন কৰিবলগীয়া যে ২০১৮ চনত উচ্চতম ন্যায়ালয়ে সকলো বয়সৰ মহিলাক শৰীমালাত প্ৰৱেশৰ অনুমতি দি এক ঐতিহাসিক ৰায় প্ৰদান কৰিছিল। সেই ৰায়ৰ পুনৰ বিবেচনাৰ আবেদনৰ শুনানি অহা ৭ এপ্ৰিলৰ পৰা মুখ্য ন্যায়াধীশ সূৰ্য কান্তৰ নেতৃত্বত তিনিজনীয়া বিচাৰপীঠত আৰম্ভ হ’ব। চিপিআইএমৰ এই স্থিতি সলনিক লৈ বিভিন্ন মহলত চৰ্চা আৰম্ভ হৈছে যদিও দলৰ ৰাজ্যিক সম্পাদক এম ভি গোবিন্দনে স্পষ্ট কৰি দিছে যে তেওঁলোকৰ মূল আদৰ্শৰ কোনো পৰিৱৰ্তন হোৱা নাই। তেওঁৰ মতে আইনী বিশেষজ্ঞৰ সৈতে আলোচনা কৰিহে এই সিদ্ধান্ত লোৱা হৈছে।
ৰাজনৈতিক বিশেষজ্ঞসকলৰ মতে আগন্তুক বিধানসভা নিৰ্বাচনৰ কথা মনত ৰাখিয়েই পিনাৰায়ী বিজয়ন চৰকাৰে এই পদক্ষেপ গ্ৰহণ কৰিছে। ২০১৮ চনৰ ন্যায়ালয়ৰ ৰায়ৰ পিছত কেৰালাত তীব্ৰ প্ৰতিবাদৰ সৃষ্টি হৈছিল আৰু তেতিয়া বাওঁপন্থী চৰকাৰে সেই ৰায়টোক সমৰ্থন কৰিছিল। কিন্তু নিৰ্বাচনৰ মুখত এতিয়া ধৰ্মপ্ৰাণ লোকসকলৰ অসন্তুষ্টিৰ পৰা বাচিবলৈ আৰু বিৰোধী দল কংগ্ৰেছ বা বিজেপিয়ে যাতে এই বিষয়টোক লৈ ৰাজনীতি কৰিব নোৱাৰে তাৰ বাবেই চৰকাৰে নিজৰ স্থিতি সলনি কৰা বুলি ধাৰণা কৰা হৈছে। এইদৰেই পৰম্পৰাগত ভক্তসকলক কাষ চপাই নিৰ্বাচনী বৈতৰণী পাৰ হ’বলৈ বাওঁপন্থী চৰকাৰে এতিয়া পুৰণি ধৰ্মীয় ৰীতিৰ পক্ষত থিয় দিছে।
