মহাৰাষ্ট্ৰৰ পুনে চহৰৰ চাকান এলেকাত সোমবাৰে পুৱতি নিশা এক অতি শোকাবহ ঘটনা সংঘটিত হৈছে। এটা কুকুৰৰ জাকে আক্ৰমণ কৰাৰ ফলত এগৰাকী ৩২ বছৰীয়া মহিলাৰ থিতাতে মৃত্যু হয় আৰু পিছত তেওঁৰ ক্ষত-বিক্ষত মৃতদেহটো ৰাস্তাত পৰি থকা অৱস্থাত উদ্ধাৰ কৰা হয়। এই সমগ্ৰ ঘটনাটো অঞ্চলটোৰ এটা চিচিটিভি কেমেৰাত আবদ্ধ হৈছে। মৃত মহিলাগৰাকীক শোভা ৱাঘমাৰে বুলি চিনাক্ত কৰা হৈছে।
ভিডিঅ’ ফুটেজত দেখা গৈছে যে নিশা প্ৰায় ২:১৫ বজাত বগা শাৰী পিন্ধা মহিলাগৰাকীক ছয়-সাতটা কুকুৰে চাৰিওফালৰ পৰা ঘেৰি ধৰিছিল। প্ৰথমতে কুকুৰ কেইটাই তেওঁৰ ফালে খেদি যোৱাত তেওঁ হাত জোকাৰি সেইবোৰক খেদিবলৈ চেষ্টা কৰিছিল যদিও মুহূৰ্তৰ ভিতৰতে সকলোবোৰ কুকুৰে তেওঁক একেলগে আক্ৰমণ কৰে। মহিলাগৰাকীয়ে নিজকে বচাবলৈ আপ্রাণ চেষ্টা চলাইছিল যদিও কুকুৰৰ জাকটোৰ আগত তেওঁ বিফল হয়। কুকুৰৰ কামোৰত মহিলাগৰাকীৰ বগা শাৰীখন তেজৰে ৰাঙলী হৈ পৰিছিল আৰু অতি যন্ত্ৰণাত তেওঁ তাতে মৃত্যুবৰণ কৰিছিল।
পুৱা বাটৰুৱাসকলে মহিলাগৰাকীৰ মৃতদেহটো অতি বিভৎস ৰূপত পৰি থকা দেখি আৰক্ষীক খবৰ দিয়ে। আৰক্ষীয়ে প্ৰথম অৱস্থাত এয়া এক হত্যাকাণ্ড বুলি সন্দেহ কৰিছিল যদিও অঞ্চলটোৰ চিচিটিভি ফুটেজ পৰীক্ষা কৰাৰ পিছতহে কুকুৰৰ আক্ৰমণত মৃত্যু হোৱাৰ কথা নিশ্চিত কৰে। এই ঘটনাই সমগ্ৰ দেশতে তীব্ৰ চাঞ্চল্যৰ সৃষ্টি কৰিছে।
বিগত এবছৰত দেশৰ বিভিন্ন প্ৰান্তত এনে কুকুৰৰ আক্ৰমণৰ ঘটনা বৃদ্ধি পোৱা দেখা গৈছে। যাৰ ফলত এটা বিতৰ্কৰো সৃষ্টি হৈছে। অলপতে তেলেংগানাত প্ৰায় ১০০ টা পথৰ কুকুৰক বিষ দি হত্যা কৰাৰ বাতৰিও ওলাইছে। যোৱা বছৰ উচ্চতম ন্যায়ালয়ে জনবসতিপূৰ্ণ অঞ্চলৰ পৰা কুকুৰবোৰ আশ্ৰয় শিবিৰলৈ স্থানান্তৰ কৰাৰ নিৰ্দেশ দিছিল যদিও পিছলৈ সেই নিৰ্দেশ সংশোধন কৰি কুকুৰবোৰক বন্ধ্যাকৰণ আৰু টিকাকৰণৰ পিছত পুনৰ একে ঠাইতে এৰি দিবলৈ কয়। অৱশ্যে জলাতংক ৰোগত আক্ৰান্ত বা অতি হিংস্ৰ কুকুৰৰ ক্ষেত্ৰত এই নিয়ম প্ৰযোজ্য নহয় বুলি আদালতে স্পষ্ট কৰি দিছে।
