পশ্চিম এছিয়াত অব্যাহত থকা সংকট আৰু গোলকীয় তেলৰ বজাৰৰ অস্থিৰতাৰ প্ৰতি লক্ষ্য ৰাখি ৰাছিয়াই পেট্ৰ‘ল (গেছ‘লীন) ৰপ্তানিৰ ওপৰত সাময়িক নিষেধাজ্ঞা আৰোপ কৰাৰ প্ৰস্তুতি চলাইছে। ঘৰুৱা বজাৰত ইন্ধনৰ পৰ্যাপ্ত যোগান নিশ্চিত কৰা আৰু মূল্যবৃদ্ধি নিয়ন্ত্ৰণ কৰাৰ উদ্দেশ্যে অহা ১ এপ্ৰিলৰ পৰা এই নিষেধাজ্ঞা কাৰ্যকৰী কৰাৰ পৰিকল্পনা কৰা বুলি জানিব পৰা গৈছে। প্ৰস্তাৱিত এই নিষেধাজ্ঞা আগন্তুক ৩১ জুলাইলৈকে বাহাল থাকিব পাৰে বুলি ৰাছিয়াৰ চৰকাৰী সংবাদ সংস্থাই প্ৰকাশ কৰিছে।
ৰাছিয়াৰ উপ-প্ৰধানমন্ত্ৰী আলেকজেণ্ডাৰ ন‘ভাকে যোৱা শুকুৰবাৰে দেশখনৰ শক্তি মন্ত্ৰালয়ক ১ এপ্ৰিলৰ পৰা পেট্ৰ‘ল ৰপ্তানি বন্ধ কৰাৰ বাবে এক আনুষ্ঠানিক প্ৰস্তাৱ প্ৰস্তুত কৰিবলৈ নিৰ্দেশ প্ৰদান কৰিছে। চৰকাৰী সূত্ৰ অনুসৰি, বৰ্তমান দেশখনত খাৰুৱা তেল পৰিশোধনৰ মাত্ৰা পূৰ্বৰ বছৰৰ দৰেই অপৰিৱৰ্তিত আছে, যাৰ ফলত তেলজাত সামগ্ৰীৰ যোগান বৰ্তমানলৈকে স্বাভাৱিক অৱস্থাত আছে। তথাপিও, গোলকীয় বজাৰৰ সম্ভাৱ্য সংকটৰ প্ৰতি লক্ষ্য ৰাখি আগতীয়াকৈ এই সতৰ্কতামূলক পদক্ষেপ গ্ৰহণ কৰা হৈছে বুলি প্ৰশাসনৰ ফালৰ পৰা জানিবলৈ দিয়া হৈছে।
গোলকীয় প্ৰেক্ষাপট সন্দৰ্ভত উপ-প্ৰধানমন্ত্ৰী ন‘ভাকে সংবাদ মাধ্যমৰ আগত উল্লেখ কৰে যে পশ্চিম এছিয়াৰ বৰ্তমানৰ পৰিস্থিতিয়ে সমগ্ৰ বিশ্বৰ তেল আৰু পেট্ৰ‘লিয়াম সামগ্ৰীৰ বজাৰখনত তীব্ৰ অস্থিৰতাৰ সৃষ্টি কৰিছে। ইয়াৰ ফলত ইন্ধনৰ মূল্যত অস্বাভাৱিক উত্থান-পতন পৰিলক্ষিত হৈছে। অৱশ্যে, বিদেশী বজাৰসমূহত ৰাছিয়াৰ শক্তি সম্পদৰ যথেষ্ট উচ্চ চাহিদা থকা বিষয়টোক তেওঁ এক ইতিবাচক দিশ হিচাপে অভিহিত কৰে। কিন্তু নিজৰ দেশৰ নাগৰিকৰ স্বাৰ্থ আৰু ঘৰুৱা অৰ্থনীতিক সুৰক্ষিত কৰাই ৰাছিয়া চৰকাৰৰ প্ৰাথমিক লক্ষ্য বুলি তেওঁ স্পষ্ট কৰি দিয়ে।
উল্লেখ্য যে, যোৱা বছৰ ৰাছিয়াৰ বিভিন্ন অঞ্চল আৰু ৰাছিয়াৰ নিয়ন্ত্ৰণত থকা ইউক্ৰেইনৰ একাংশ স্থানত পেট্ৰ‘লৰ তীব্ৰ নাটনিয়ে দেখা দিছিল। ইউক্ৰেইনে ৰাছিয়াৰ তেল পৰিশোধনাগাৰসমূহত চলোৱা ধাৰাবাহিক আক্ৰমণ আৰু ঋতুভিত্তিক চাহিদা বৃদ্ধিৰ ফলতেই এই পৰিস্থিতিৰ সৃষ্টি হৈছিল। সেয়েহে, ঘৰুৱা বজাৰৰ নাটনি দূৰ কৰিবলৈ আৰু বৰ্ধিত মূল্য নিয়ন্ত্ৰণ কৰিবলৈ ৰাছিয়াই মাজে-সময়ে এনেদৰে পেট্ৰ‘ল আৰু ডিজেলৰ ৰপ্তানিত নিষেধাজ্ঞা আৰোপ কৰি আহিছে। উদ্যোগ খণ্ডৰ সূত্ৰ অনুসৰি, ৰাছিয়াই যোৱা বৰ্ষত প্ৰায় ৫০ লাখ মেট্ৰিক টন পেট্ৰ‘ল ৰপ্তানি কৰিছিল, যিটো প্ৰতিদিনে প্ৰায় এক লাখ সোতৰ হাজাৰ বেৰেলৰ সমান।
