সম্পূৰ্ণৰূপে সুৰা নিষিদ্ধ ৰাজ্য বিহাৰত পুনৰ সংঘটিত হৈছে এক শোকাবহ ঘটনা। শুকুৰবাৰে ৰাজ্যখনৰ পূব চম্পাৰণ জিলাত বিষাক্ত সুৰাপান কৰাৰ ফলত কমেও ৫ জন লোকৰ কৰুণ মৃত্যু হোৱাৰ লগতে আন ১৫ জন লোক গুৰুতৰভাৱে অসুস্থ হৈ পৰে। বিগত ২৪ ঘণ্টাৰ ভিতৰত জিলাখনৰ তুৰকৌলিয়া আৰু ৰঘুনাথপুৰ আৰক্ষী থানাৰ অন্তৰ্গত কেইবাখনো গাঁৱত এনে মৰ্মান্তিক ঘটনাটো সংঘটিত হোৱাৰ পিছত সমগ্ৰ অঞ্চলটোতে তীব্ৰ চাঞ্চল্যৰ সৃষ্টি হৈছে।
আৰক্ষীয়ে প্ৰকাশ কৰা তথ্য অনুসৰি, অবৈধ সুৰাপান কৰাৰ কিছু সময়ৰ পাছতেই আক্ৰান্তসকলৰ দৃষ্টিশক্তি হ্ৰাস পোৱাকে ধৰি বিভিন্ন জটিল স্বাস্থ্যজনিত সমস্যাই দেখা দিয়ে। বৰ্তমান পূব চম্পাৰণ জিলাৰ সদৰ চহৰ মোতিহাৰীৰ চৰকাৰী সদৰ চিকিৎসালয়ত ছয়জন লোকে চিকিৎসা গ্ৰহণ কৰি আছে। আনহাতে, প্ৰাথমিক চিকিৎসাৰ অন্তত সাতজন লোকক চিকিৎসালয়ৰ পৰা যাবলৈ দিয়া হৈছে যদিও চিকিৎসাধীন আন তিনিজন ৰোগীৰ অৱস্থা অতি সংকটজনক বুলি জানিব পৰা গৈছে।
এই ভয়ংকৰ ঘটনাৰ সন্দৰ্ভত পূব চম্পাৰণৰ জিলা দণ্ডাধীশ সৌৰভ জোৰৱালে সংবাদ মাধ্যমৰ আগত প্ৰতিক্ৰিয়া ব্যক্ত কৰি কয় যে বৰ্তমানলৈকে চাৰিজন লোকৰ মৃত্যু নিশ্চিত কৰা হৈছে আৰু মৃতদেহসমূহ মৰণোত্তৰ পৰীক্ষাৰ বাবে প্ৰেৰণ কৰা হৈছে। আনহাতে, স্থানীয় আৰক্ষী প্ৰশাসনৰ চৰম গাফিলতিৰ প্ৰতি কঠোৰ স্থিতি গ্ৰহণ কৰি পূব চম্পাৰণ জিলাৰ আৰক্ষী অধীক্ষক স্বৰ্ণ প্ৰভাতে তুৰকৌলিয়া আৰক্ষী থানাৰ ভাৰপ্ৰাপ্ত আৰক্ষী বিষয়া উমাশংকৰ মাঞ্ঝিক তৎকালীনভাৱে কাৰ্যকৰী হোৱাকৈ নিলম্বন কৰিছে।
উল্লেখ্য যে, বিগত কেইবাবছৰ ধৰি বিহাৰত সুৰাৰ বিক্ৰী আৰু সেৱন সম্পূৰ্ণৰূপে নিষিদ্ধ কৰি ৰখা হৈছে। কিন্তু তাৰ পিছতো এমাহৰো কম সময়ৰ ভিতৰত ৰাজ্যখনত সংঘটিত এইটো দ্বিতীয়টো বিষাক্ত সুৰাপানৰ ঘটনা। এনে সঘনাই সংঘটিত ঘটনাই চৰকাৰৰ সুৰা নিবাৰণী আইনৰ কাৰ্যকাৰিতা আৰু ৰাজ্যখনত সক্ৰিয় হৈ থকা অবৈধ সুৰা মাফিয়াৰ দপদপনিৰ ওপৰত গুৰুতৰ প্ৰশ্ন উত্থাপন কৰিছে।
