নিৰ্বাচনী বতাহ গৰম হৈ থকাৰ সময়তে মধ্য গুৱাহাটী সমষ্টিৰ অসম জাতীয় পৰিষদৰ প্ৰাৰ্থী কুংকি চৌধুৰীয়ে শাসকীয় বিজেপি দলৰ বিৰুদ্ধে এক গুৰুতৰ অভিযোগ উত্থাপন কৰিছে। তেওঁৰ ভাৱমূৰ্তি ম্লান কৰাৰ উদ্দেশ্যে বিজেপিৰ আই টি চেলে এটা কৃত্ৰিম বুদ্ধিমত্তাৰ (এ আই) দ্বাৰা নিৰ্মিত ভুৱা ‘ডীপফেক’ ভিডিঅ’ ছচিয়েল মিডিয়াত প্ৰচাৰ কৰা বুলি প্ৰাৰ্থীগৰাকীয়ে দাবী কৰিছে। এই কুৰুচিপূৰ্ণ কাৰ্যৰ তীব্ৰ বিৰোধিতা কৰি তেওঁ অতি শীঘ্ৰে ইয়াৰ বিৰুদ্ধে কঠোৰ আইনী ব্যৱস্থা গ্ৰহণ কৰিব বুলি স্পষ্ট কৰি দিছে।
ছচিয়েল মিডিয়াযোগে প্ৰকাশ কৰা বিবৃতিত কুংকি চৌধুৰীয়ে বিজেপিৰ এই কাৰ্যক তীব্ৰ ভাষাৰে গৰিহণা দিয়ে। তেওঁ উল্লেখ কৰে যে মুখ্যমন্ত্ৰী ড° হিমন্ত বিশ্ব শৰ্মা আৰু বিজেপি নেতা বিজয় গুপ্তাৰ নেতৃত্বত বিৰোধীৰ বিৰুদ্ধে এনে ধৰণৰ নিম্নস্তৰৰ ৰাজনীতি কৰা হৈছে। প্ৰচাৰিত ভুৱা ভিডিঅ’টোত খাদ্য সম্পৰ্কীয় বিতৰ্কিত বিষয় এটা সাঙুৰি তেওঁক বিপদত পেলোৱাৰ চেষ্টা কৰা হৈছে বুলি তেওঁ প্ৰকাশ কৰে। এই সন্দৰ্ভত প্ৰতিক্ৰিয়া ব্যক্ত কৰি তেওঁ কয় যে কোনে কি খায় সেয়া সম্পূৰ্ণ ব্যক্তিগত কথা আৰু ইয়াৰ ওপৰত ভিত্তি কৰি ৰাজনীতি কৰাটো অতি দুৰ্ভাগ্যজনক। তেওঁ আৰু কয় যে বিজেপি দলৰ আই টি চেলে এনে এটা ভুৱা ভিডিঅ’ বনোৱাত বহু সময় আৰু ধন খৰচ কৰিছে, যিটোৱে নিৰ্বাচনৰ পূৰ্বে শাসকীয় দলটোৰ হতাশাৰ ছবিখনকে উদঙাই দিছে।
প্ৰাৰ্থীগৰাকীয়ে এই সমগ্ৰ ঘটনাক ৰাজনৈতিক ষড়যন্ত্ৰ আখ্যা দি কয় যে তেওঁ এনে উদ্দেশ্যপ্ৰণোদিত আক্ৰমণৰ বিৰুদ্ধে নীৰৱে বহি নাথাকে। তেওঁ ইতিমধ্যে এই সন্দৰ্ভত আৰক্ষীৰ ওচৰত এখন এজাহাৰ (এফ আই আৰ) দাখিল কৰা বুলি জানিব জানিলৈ দিছে। তেওঁৰ মতে, বিৰোধীক ৰাজনৈতিকভাৱে মোকাবিলা কৰিব নোৱাৰি বিজেপিয়ে এনেদৰে প্ৰযুক্তিৰ অপব্যৱহাৰৰে ব্যক্তিগত আক্ৰমণৰ পথ বাছি লৈছে। বৰ্তমান সময়লৈকে এই অভিযোগ সন্দৰ্ভত শাসকীয় বিজেপি দল বা তেওঁলোকৰ আই টি চেলৰ তৰফৰ পৰা কোনো আনুষ্ঠানিক প্ৰতিক্ৰিয়া প্ৰকাশ পোৱা নাই।
