আগন্তুক বিধানসভা নিৰ্বাচন পৰ্যবেক্ষণ কৰিবলৈ ৮ এপ্ৰিলৰ পৰা দুদিনৰ বাবে বিভিন্ন নিৰ্বাচন পৰিচালনা সংস্থাৰ বিদেশী প্ৰতিনিধি দলে অসম ভ্ৰমণ কৰিব।
এক আনুষ্ঠানিক বিবৃতি অনুসৰি, ভ্ৰমণকাৰী দলটোত এংগোলা, ভূটান, ইজিপ্ত, পৰ্তুগাল, শ্ৰীলংকা, মেক্সিকো, বেনিন, ক্ৰ’ৱেচিয়া আদি দেশৰ নিৰ্বাচন পৰিচালনা সংস্থাৰ প্ৰতিনিধি থাকিব।
আন্তঃৰাষ্ট্ৰীয় নিৰ্বাচনী পৰ্যবেক্ষণ কাৰ্যসূচীৰ অধীনত এই ভ্ৰমণৰ আয়োজন কৰা হৈছে। অহা ৯ এপ্ৰিলত ১২৬টা সমষ্টিৰ আটাইকেইটাতে ভোটগ্ৰহণ অনুষ্ঠিত হ’ব। নিৰ্বাচনৰ ভোটগণনা ৪ মে’ত অনুষ্ঠিত হ’ব।
তেওঁলোকৰ ভ্ৰমণৰ প্ৰথম দিনা অৰ্থাৎ ৮ এপ্ৰিলত প্ৰতিনিধিসকলে অসমৰ মুখ্য নিৰ্বাচনী বিষয়া (চিইঅ’)ৰ দ্বাৰা পৰিচালিত বিশদ আলোচনাত অংশ ল’ব৷
ইয়াৰ উপৰিও ডিচপেচ চেণ্টাৰ আৰু কণ্ট্ৰল ৰুম পৰিদৰ্শন কৰি ভোটগ্ৰহণৰ প্ৰস্তুতি আৰু সা-সামগ্ৰীৰ মূল্যায়ন কৰিব।
অহা ৯ এপ্ৰিলত আন্তঃৰাষ্ট্ৰীয় পৰ্যবেক্ষকসকলে ৰাজ্যৰ বিভিন্ন নিৰ্বাচিত জিলালৈ গৈ একাধিক ভোটকেন্দ্ৰ পৰিদৰ্শন কৰিব। এই ভ্ৰমণৰ সময়ত তেওঁলোকে ভোটদানৰ পদ্ধতি, নিৰাপত্তা ব্যৱস্থা আৰু নিৰ্বাচনী প্ৰযুক্তিৰ প্ৰয়োগ আদি প্ৰত্যক্ষ কৰিব।
এই পদক্ষেপৰ লক্ষ্য হৈছে বিদেশী পৰ্যবেক্ষকসকলক ভাৰতৰ নিৰ্বাচনী ব্যৱস্থাৰ প্ৰত্যক্ষ অভিজ্ঞতা প্ৰদান কৰাৰ লগতে ইয়াৰ পৰিসৰ, স্বচ্ছতা, আৰু সক্ষমতাক তুলি ধৰা।
তদুপৰি, আন্তঃৰাষ্ট্ৰীয় সহযোগিতাৰ প্ৰসাৰ আৰু অংশগ্ৰহণকাৰী দেশসমূহৰ মাজত নিৰ্বাচন পৰিচালনাৰ উত্তম পদ্ধতিৰ আদান-প্ৰদানৰ সুবিধা প্ৰদান কৰে।
